كەزدەسۋ ECECACD-مەن اقپارات الماسۋداعى ىنتىماقتاستىقتى نىعايتۋعا جانە ناشاقورلىققا, ەسىرتكى ساۋداسىنا قارسى كۇرەستەگى ۇزدىك تاجىريبەلەردى بولىسۋگە ارنالدى.
ق.توقاەۆ ەسىرتكى قۇرالدارىن ءوندىرۋ مەن زاڭسىز ساتۋعا قاتىسى بار ادامداردى جازالاۋدى قاتاڭداتۋ ماقساتىندا زاڭنامانى قايتا قاراۋ قاجەتتىگىن اتاپ ءوتتى. بۇل تۋرالى ول ءىىى ۇلتتىق قۇرىلتايداعى سوزىندە مالىمدەگەن بولاتىن.
ءوز كەزەگىندە ا.كۆاسنەۆسكي ەسىرتكىگە قارسى ساياساتتىڭ تيىمدىلىگىن ارتتىرۋعا باعىتتالعان جاڭا باعدارلامالار مەن شارالاردى تانىستىردى. ەكى تاراپ ناشاقورلىقتىڭ الدىن الۋ جانە ەسىرتكىنىڭ زاڭسىز تارالۋىنا قارسى كۇرەس بويىنشا بىرلەسكەن جۇمىستاردى قولعا الۋعا كەلىستى.
ۆيزالىق راسىمدەر جەڭىلدەتىلەدى
قازاقستان مەن ەۋروپالىق وداق ۆيزالىق راسىمدەردى جەڭىلدەتۋ بويىنشا كەلىسسوز باستادى. اتالعان جاڭالىقتى ەۋرووداقتىڭ سانكتسيالار جونىندەگى حالىقارالىق ارنايى ۋاكىلى دەۆيد و’سالليۆان قازاقستانعا ساپارى كەزىندە حابارلادى. ول سونداي-اق ەو-نىڭ قازاقستانمەن قارىم-قاتىناسى بەلسەندى دامىپ كەلە جاتقانىن اتاپ ءوتتى.
– ەو قازاقستاننىڭ الەۋەتتى ساۋدا سەرىكتەسى جانە تىكەلەي شەتەلدىك ينۆەستيتسيالاردىڭ قاينار كوزى بولىپ ەسەپتەلەدى. ءبىز ماڭىزدى ستراتەگيالىق سەرىكتەستىك ورناتتىق. وسى ارىپتەستىك اياسىندا ەكونوميكالىق ىنتىماقتاستىقتى دامىتىپ, ىلگەرىلەتۋگە كۇش سالامىز, – دەدى دەۆيد و’سالليۆان.
سونىمەن قاتار ارنايى ۋاكىل ۆيزالىق رەجىمدى جەڭىلدەتۋ بويىنشا اتقارىلىپ جاتقان جۇمىستار تۋرالى باياندادى. ەگەر بۇل ءىس ءساتتى جۇزەگە اسسا, ىنتىماقتاستىق ودان ءارى نىعايا تۇسپەك.
5G ۇيالى بايلانىسى ەنگىزىلەدى
تسيفرلىق دامۋ, يننوۆاتسيا جانە اەروعارىش ونەركاسىبى ءمينيسترى جاسلان ماديەۆتىڭ ايتۋىنشا, كەلەر جىلدىڭ سوڭىنا دەيىن قازاقستان 5G ۇيالى بايلانىسىنا قوسىلۋى مۇمكىن.
– مەملەكەت باسشىسىنىڭ تاپسىرماسىنا سايكەس, 5G ۇيالى بايلانىسىن ەنگىزۋ 2025 جىلدىڭ سوڭىنا دەيىن اياقتالۋعا ءتيىس. تۇتاستاي العاندا, 2027 جىلدىڭ سوڭىنا دەيىن ۇيالى بايلانىس وپەراتورلارى تەلەكوممۋنيكاتسيا سالاسىنا 450 ملرد تەڭگەدەن استام (شامامەن 980 ملن دوللار) ينۆەستيتسيا جاسايتىن بولادى, – دەدى مينيستر.
5G تەحنولوگياسىن ودان ءارى دامىتۋعا قاتىستى «كسەلل» جانە «تەلە2» وپەراتورلارى استانا, الماتى, شىمكەنت قالاسىندا جانە وبلىس ورتالىقتارىندا جۇمىس اتقارادى. قازىر قازاقستاننىڭ 20 قالاسىندا 1 144 بازالىق ستانسا ورناتىلعان. 2020 جىلعا قاراعاندا رەسپۋبليكادا ترافيك 61,5%-عا, ال ابونەنتتەر سانى 12,9%-عا وسكەن.
«Speedtest Ookla» مالىمەتى بويىنشا, 2024 جىلى ساۋىردە قازاقستانداعى بايلانىستىڭ ورتاشا جىلدامدىعى 43,6 مبيت/س-نى قۇراپ, الەمدە 66-ورىندا تۇر. بۇل كورسەتكىش رەسەيگە, قىرعىزستان مەن وزبەكستانعا قاراعاندا جوعارى.
– ەلىمىزدە 6 290 اۋىل بار, ونىڭ ىشىندە سىمدى ينتەرنەت 2 606 اۋىلعا جەتكىزىلگەن. ۇلتتىق جوبا شەڭبەرىندە بايلانىستىڭ وپتيكالىق جەلىلەرىن 3010 اۋىلعا قوسۋ كوزدەلىپ وتىر, – دەدى ج.ماديەۆ. – ءموبيلدى ينتەرنەت قازاقستاننىڭ 4866 اۋىلىندا قولجەتىمدى. سالىقتىق جەڭىلدىكتەر اياسىندا 2023 جىلى 1161 اۋىل 4G تەحنولوگياسىنا قوسىلعان. قالعان 1424 اۋىلعا قاتىستى جۇمىستار جالعاسىپ جاتىر.
ورتا ءدالىزدى دامىتۋ ماڭىزدى
قازاقستان سەناتى تۇركى ەلدەرى اراسىنداعى ترانسكاسپي حالىقارالىق كولىك باعدارىن (ورتا ءدالىز) جانە ارالاس جۇك تاسىمالىن دامىتۋعا باعىتتالعان بىرقاتار حالىقارالىق كەلىسىمدى راتيفيكاتسيالادى.
قۇجاتتاردىڭ ءبىرى ەكى ەل اۋماعى بويىنشا كونتەينەرلىك پويىزدارمەن تاسىمالداۋدى ۇلعايتۋ جانە جۇك تاسىمالداۋدىڭ جىل سايىنعى بولجامدارىن دايىنداۋدى كوزدەيدى. باسقا كەلىسىم ورتا ءدالىز باعىتتارىندا اۆتوموبيل, تەمىر جول جانە تەڭىز كولىك تۇرلەرىن ءتيىمدى پايدالانۋعا نەگىزدەلگەن.
– بارلىق قۇجاتتىڭ نەگىزگى مىندەتى – حالىقارالىق جۇك تاسىمالى راسىمدەرىن جەڭىلدەتۋ جانە ترانزيتتىك-كولىكتىك الەۋەتتى, حالىقارالىق ساۋدا-ەكونوميكالىق قاتىناستاردى ودان ءارى نىعايتۋ ءۇشىن قولايلى جاعداي جاساۋ, – دەپ جازىلعان پارلامەنت سەناتىنىڭ حابارلاماسىندا.
2024 جىلدىڭ العاشقى 4 ايىندا ورتا ءدالىز بويىنشا جۇك تاسىمالداۋ كولەمى وتكەن جىلمەن سالىستىرعاندا 14%-عا ۇلعايىپ, 1,4 ملن توننانى قۇرادى. ال 2023 جىلى جۇك تاسىمالداۋ كولەمى 2022 جىلمەن سالىستىرعاندا 65%-عا ۇلعايىپ, 2,7 ملن توننا بولعان.
ترانسكاسپي حالىقارالىق كولىك مارشرۋتى قىتاي, قازاقستان, كاسپي تەڭىزىنىڭ اكۆاتورياسى, ازەربايجان, گرۋزيا جانە ودان ءارى تۇركيا مەن ەۋروپا ەلدەرىنە وتەدى.
