جاقىندا تۇرمىستىق زورلىق-زومبىلىققا توسقاۋىل بولاتىن ارنايى زاڭ كۇشىنە ەندى. بۇل – وتە قاجەتتى قۇجات. بۇل ماسەلە بويىنشا مەنىڭ كوزقاراسىم – بارشاڭىزعا ايقىن. ەلىمىزدەگى ءاربىر شاڭىراق قازاق وتباسىنىڭ ۇلگىسىنە اينالۋى كەرەك. ارينە, قابىلدانعان زاڭ بارلىق قاتەردى بىردەن جويىپ جىبەرمەيدى. بۇل – ۇزاق ءارى كۇردەلى ۇدەرىس. زاڭ جازالاۋ ءۇشىن ەمەس, ەڭ الدىمەن, قۇقىقتىق مادەنيەتتى قالىپتاستىرۋ ءۇشىن ماڭىزدى. وعان بۇكىل قوعام بولىپ اتسالىسۋ قاجەت. وسى جولدا اقپارات وكىلدەرىنىڭ ءرولى ەرەكشە, - دەدى مەملەكەت باسشىسى.
پرەزيدەنت سونداي-اق قوعامنىڭ قاسىرەتىنە اينالعان لۋدومانيا تۋرالى دا ءسوز قوزعادى.
ەڭ قاۋىپتى الەۋمەتتىك كەسەلدىڭ ءبىرى – لۋدومانيا. قۇمار ويىنعا تاۋەلدىلىك كوپتەگەن ازاماتتى ورعا جىعىپ, قارىزعا بەلشەسىنەن باتىرادى, وتباسىنىڭ شىرقىن بۇزادى, قىلمىسقا, سۋيتسيدكە يتەرمەلەيدى. ينتەرنەت دامىعان سايىن لۋدومانيا پروبلەماسى ۋشىعا ءتۇستى جانە ناعىز الەۋمەتتىك ىندەتكە اينالا باستادى. بۇل ۇلتىمىزدىڭ بولاشاعىنا قاتەر توندىرەدى. سوندىقتان مەملەكەت باسشىسى رەتىندە مەن وسى قاۋىپتى قۇبىلىسپەن كۇرەسۋ ءۇشىن بىرقاتار پارمەندى شارالار قابىلدادىم, - دەدى ق.توقاەۆ.
مەملەكەت باسشىسى بىلتىر كۇزدە وسى ماسەلە بويىنشا قاۋىپسىزدىك كەڭەسىنىڭ ارنايى وتىرىسى وتكەنىن اتاپ ءوتتى.
جۋىردا مەنىڭ تاپسىرماممەن ۇكىمەت زاڭسىز ويىن بيزنەسى مەن لۋدومانياعا قارسى ءىس-قيمىل جونىندەگى كەشەندى جوسپاردى بەكىتتى. سونىمەن قاتار ءتيىستى زاڭ جوباسىن تەز ارادا قابىلداۋ جونىندە بۇعان دەيىن بىرنەشە رەت ايتقان ەدىم. ال بۇگىن سەنات لۋدومانياعا قارسى زاڭ جوباسىن قارايدى. ەگەر ماقۇلدانسا, كوپ ۇزاتپاي مەن وعان قول قويامىن, دەدى قاسىم-جومارت كەمەل ۇلى.
پرەزيدەنت اتالعان زاڭنىڭ كۇشىنە ەنۋى ازاماتتارىمىزدى, ەڭ الدىمەن, وسكەلەڭ ۇرپاقتى وسى زياندى الەۋمەتتىك دەرتتەن ساقتاۋعا مۇمكىندىك بەرەتىنىنە سەنىمدى ەكەنىن ايتتى. جانە ورايلى ءساتتى پايدالانا وتىرىپ, ماسەلەگە بەي-جاي قاراماي, زاڭ جوباسىن جەدەل ءارى ساپالى ازىرلەگەنى ءۇشىن ءماجىلىس پەن سەنات دەپۋتاتتارىنا العىس ايتتى.
