سۋرەتتى تۇسىرگەن – ەرلان ومار, «EQ»
ءۇشىنشى اينالىمدا ايقاسقا شىعانداپ العا شىقتى. جۇيرىك, شىن جۇيرىك. جارىسقا قاتىسقان وتىز قارالى بايگە اتتارىنىڭ ءبارى وسى توڭىرەكتىڭ اتى شىققان جۇيرىكتەرى.
– ايقاسقا جارادى, ءۇمىتىڭدى اقتادى, – دەپ قۋانىپ جاتىر اۋىلداس اعايىن.
كوپ تىلەگى قابىل بولىپ, ايقاسقا ءبىرىنشى بولىپ كەلدى. ساۋىرىنا دەيىن اقسابىندانىپ تەرلەگەن. سولىقتاپ تۇر. تالاي كورىپ جۇرگەن جانۋار. ءبىر قاراعاندا بىتىمىنە كوڭىل تولا قويمايتىن. تۇرقى شاعىنداۋ. شوقتىعى دا اناۋ ايتقانداي بيىك ەمەس. تاناۋى قۇتتى بوكەننىڭ تاناۋى ءتارىزدى دەلديىپ جاتىر.
ەندىگىسى قورىتىندى. بيىل جازعى العاشقى بايگە. بالكىم سودان با ەكەن, بايگەنى قىزىقتاۋشىلار قاراسى كوپ. ءبىرىنشى ورىنعا 1 ميلليون تەڭگە ءتيدى. سوڭعى جىلدارى اۋىل-ايماقتا جۇيرىك جىلقى ۇستاپ, ات جاراتىپ, بايگەگە قوساتىن اتبەگىلەر كوبەيدى. ءبىزدىڭ جيەن نۇربول دا سولاردىڭ قاتارىندا. انە ءبىر جىلى اعىلشىن تۇقىمداس قۇنان ساتىپ العان. ونىسى ءبىر بايگەگە قوسقاندا تاسىرقاپ, الدىڭعى وڭ جاق اياعىن مەرتىكتىرىپ الدى. قانشاما قاراجاتى شىعىن بولسا دا, نۇربول مۇلدە قايعىرعان جوق. «تۇلپار تۇياقتان قالادى» دەدى دە قويدى.
ات يەسىن قاۋمالاي قورشاپ, قۇتتى بولسىندى جاۋدىرىپ جاتىرمىز. قولىنداعى ءبىر بۋما اقشانى وزىمەن بىرگە قۋانىپ, تۇلپارىنا تىلەكتەس بولعان اعايىنعا تاراتىپ بەرىپ جاتىر. بايگەنى قىزىقتاي كەلگەن كورشىنىڭ ون جاسار بالاسى:
– اعا, انا كىسى نەگە اقشا تاراتىپ جاتىر؟ – دەپ سۇرادى.
– تابارىك, – دەدىم مەن, – بۇرىنعىنىڭ جورالعىسى. اتبەگىلەر, قۇسبەگىلەر وسىنداي توتەننەن بۇيىرعان ولجادان اعايىنعا سىي-سياپاتىن جاسايدى. بۇل ءداستۇر بۇرىن تابارىك دەپ اتالعان. اتام قازاقتىڭ كوڭىلىنىڭ دارقاندىعىن, پەيىلىنىڭ كەڭدىگىن بىلدىرەتىن ءداستۇرى.
كورشىنىڭ بالاسى كەكىلىن ءبىر سيپاپ قويىپ, ويلانىپ قالدى. نەسى بار, وسىنداي جاقسىلىقتى سۇيەگىنە سىڭىرە بەرسە, ىزگىلىكتىڭ ىزەتىنە بولەنىپ وسپەي مە؟
كوكشەتاۋ
