- قازاقستاننىڭ سەمسەرلەسۋشىلەرى (سابليا) كۋۆەيتتە ءوتىپ جاتقان ازيا چەمپيوناتىندا قولا مەدالعا قول جەتكىزدى. باستاپقى باسەكەلەردە وزبەكستان مەن جاپونيانى جەڭگەن جەرلەستەرىمىز جارتىلاي فينالدا يرانعا ەسە جىبەردى. بۇل كوماندانىڭ ساپىندا باقداۋلەت قۇرالبەك ۇلى, ارتەم ساركاسيان, ساتتارحان نازارباي جانە جانات نابيەۆ ونەر كورسەتتى. ال بۇعان دەيىن ەرلىك سەرتاي شپاگاشىلار سايىسىندا ۇزدىك ۇشتىكتى تۇيىندەگەن بولاتىن.
- قازاقستاننىڭ تۋى استىندا ونەر كورسەتەتىن كەنيالىق جەلاياق, الەم چەمپيونى نورا دجەرۋتوعا بىلتىر كۇزدە «دوپينگ قولداندى» دەگەن ايىپ تاعىلعان ەدى. كۇنى كەشە عانا ول تولىقتاي اقتالدى. شتاب-پاتەرى پاريجدە ورنالاسقان حالىقارالىق تورەلىك سوتى ءىستىڭ اق-قاراسىن انىقتاي كەلە, دجەرۋتونىڭ ەشقانداي دا ارامزا ارەكەتكە بارماعانىن دالەلدەپ, جوعارىداعىداي شەشىم شىعاردى.
- تالدىقورعاندا شوسسەدەگى ۆەلوسپورتتان قازاقستان چەمپيوناتى اياقتالدى. ەرلەر اراسىنداعى 178 شاقىرىمدىق توپتىق باسەكەدە دميتري گرۋزدەۆ توپ جاردى. ەكىنشى جانە ءۇشىنشى ورىنداردا – گلەب برۋسەنسكي مەن يوگان شتەين. ايەلدەردىڭ 100 شاقىرىمدىق سايىسىندا ريناتە سۇلتانوۆا التىننان القا تاقسا, كۇمىس پەن قولا مەدالدى ۆيولەتتا كازاكوۆا مەن ەليزاۆەتا سكلياروۆا يەلەندى.
- قازاقستان چەمپيوناتىندا باق سىنايتىن وسكەمەننىڭ «التاي» كلۋبىنىڭ باس باپكەرى بولىپ ۆاحيد ماسۋدوۆ تاعايىندالدى. بۇل ەسىم جانكۇيەرلەرگە جاقسى تانىس. 64 جاستاعى جامبىل فۋتبول مەكتەبىنىڭ تۇلەگى وتكەن عاسىردىڭ 80-جىلدارى الماتىنىڭ «قايراتىنىڭ» ساپىندا جاسىنداي جارقىلدادى. ۇلكەن سپورتتان قول ۇزگەن سوڭ ەلىمىزدىڭ ءتۇرلى كوماندالارى مەن قازاقستان قۇراماسىن جاتتىقتىردى.
