كوللاجدى جاساعان – قونىسباي شەجىمباي, «EQ»
وتكەن جىلى تۇتىنۋشىلار قۇقىعىن قورعاۋ كوميتەتى مەن اۋماقتىق دەپارتامەنتتەر 50 مىڭنان استام ءوتىنىشتى قاراعان. بىلتىر 23 مىڭعا تاياۋ وتىنىشكە بايلانىستى قۇقىقتىق كومەك كورسەتىلگەن. 19 مىڭىنىڭ تالابى قاناعاتتاندىرىلىپ, 9 مىڭعا جۋىعى مەملەكەتتىك ورگاندارعا جولدانعان. 600-ءى كەرى قايتارىلعان. شاعىمداردىڭ ءبىرازى بولشەك ساۋداعا (36,5 پايىز), ەلەكتروندى ساۋداعا (15,2 پايىز), تۇرمىستىق قىزمەتتەرگە (12,7 پايىز),تۇرعىن ءۇي-كوممۋنالدىق شارۋاشىلىعىنا (9,1 پايىز) جانە بايلانىس قىزمەتتەرىنە (4,1 پايىز) قاتىستى بولعان. قابىلدانعان شارالاردىڭ ارقاسىندا شاعىم تۇسىرگەن تۇتىنۋشىلاردىڭ قۇقىعى قورعالىپ, جالپى سوماسى 1 ملرد تەڭگەدەن استام قاراجات قايتارىلعان.
بيىلعى جۇمىس توپتارىنىڭ وتىرىستارىندا تۇتىنۋشىلاردىڭ قۇقىعىن قورعاۋدى كۇشەيتۋ, اقپاراتتىق جۇيە مەن ەلەكتروندى ساۋداعا قاتىستى زاڭ جوبالارىنىڭ ەرەجەلەرىن كەڭەيتۋ, جەكە حابارلاندىرۋلاردىڭ ينتەرنەت-الاڭىندا قوعامدىق قاتىناستاردى رەتتەۋدىڭ نورماتيۆتىك-قۇقىقتىق اكتىلەرىن ەنگىزۋگە بىرقاتار دەپۋتاتتىق باستاما قابىلداندى. تۇتىنۋشىلار قۇقىعىن قورعاۋ كوميتەتىنىڭ توراعاسى اسقار تىنىسبەك ۇلىنىڭ ايتۋىنشا, زاڭ جوباسىنداعى جاڭاشىلدىقتار اياسىندا تۇتىنۋشىعا ءوز قۇقىعىن قورعاۋ جولدارىن تاڭداۋ ۇسىنىلادى. قولدانىستاعى تۇتىنۋشى قۇقىعىن قورعاۋ تۋرالى زاڭعا سايكەس, تۇتىنۋشى سوتتا قۇقىعىن قورعاۋ ءۇشىن دايەكتى مىندەتتى كەزەڭدەردەن ءوتۋى كەرەك. ناتيجەسىندە, تۇتىنۋشى كۇردەلى, كوپ دەڭگەيلى بيۋروكراتياعا تاپ بولادى. وسىعان بايلانىستى زاڭ جوباسىندا تۇتىنۋشىعا ءوز قۇقىعىن قورعاۋ تاسىلىندە سوتقا تىكەلەي تالاپ قويۋ نەمەسە مەملەكەتتىك ورگانعا جۇگىنۋ مۇمكىندىگى ۇسىنىلماق. سونداي-اق وسى سالادا ومبۋدسمەن ەنگىزۋ ماسەلەسى قاراستىرىلعان.
قولدانىستاعى زاڭ اياسىندا وفلاين ساتۋشىعا قويىلاتىن تالاپتار ونلاين رەجىمدە دە قولدانىلادى. بىلتىر وسى سەگمەنتتەگى تۇتىنۋشىلار شاعىمىنىڭ سانى الدىڭعى جىلمەن سالىستىرعاندا 3 ەسە, ياعني 2,6 مىڭنان 7,7 مىڭعا دەيىن وسكەن. جالپى, تۇتىنۋشىلار قۇقىعىن قورعاۋدىڭ جۇيەسى وتكەن جىلى تۇتىنۋشىنىڭ قۇقىعىن قامتاماسىز ەتۋ الگوريتمىنە نەگىزدەلىپ قايتا قۇرىلدى. تۇتاستاي العاندا, زاڭ جوباسى تۇتىنۋشىنىڭ قۇقىعىن جان-جاقتى جانە ءتيىمدى قورعاۋدى قامتاماسىز ەتۋگە, قوعامدا حالىقتىڭ ءومىر ءسۇرۋ ساپاسىن ارتتىرىپ, ۇكىمەتتىك ەمەس ينستيتۋتتار ءرولىن كۇشەيتۋگە باعىتتالىپ وتىر.
تۇتىنۋشىلار شاعىمىن تالداۋ ناتيجەلەرى جىل سايىن ۇكىمەت جانىنان قۇرىلعان تۇتىنۋشىلاردىڭ قۇقىقتارىن قورعاۋ جونىندەگى ۆەدومستۆوارالىق كەڭەستىڭ قاراۋىنا شىعارىلادى. وندا مەملەكەتتىك ورگاندار جۇمىسىنىڭ قورىتىندىلارىن تالقىلاۋ, ورىن العان ولقىلىقتاردى انىقتاۋ جانە ءتيىستى شەشىمدەر قابىلداۋ جوسپارلانعان.
