كوللاجدى جاساعان – زاۋرەش سماعۇل, «ەQ»
كەيىنگى بەس جىلدا حالىقتىڭ قولما-قول اقشاسىز ترانزاكتسياسىنىڭ كولەمى 24 ەسە, 73 ترلن تەڭگەگە دەيىن وسكەن. ال ولاردىڭ نەگىزگى ۇلەسى ينتەرنەت جانە ءموبيلدى بانكينگ ارقىلى جۇزەگە اسىرىلادى ەكەن. بۇل ادامداردىڭ ۋاقىتىن ۇنەمدەگەنىمەن, وكىنىشكە قاراي, ءارتۇرلى الاياقتىق ارەكەتتەردىڭ دە پايدا بولۋىنا الىپ كەلدى. ەنگىزىلگەلى وتىرعان جاڭا جوبا الدىمەن وسى اقپاراتتىق قاۋىپسىزدىكتى قامتاماسىز ەتەدى دەپ كۇتىلىپ وتىر.
«Open Banking» – ءبىر قوسىمشا ارقىلى بىرنەشە بانكتەگى قاراجاتتى باسقارۋ مۇمكىندىگى. نە بولماسا ءبىر عانا بانكتىڭ كليەنتى بولىپ, دەرەكتەردىڭ سول بانكتە ساقتالۋى. باسقا بانكتەر كليەنت كەلىسىمىن بەرگەندە عانا «اشىق بانكينگ» جۇيەسى ارقىلى بانكتەن شوت پەن دەرەكتەردى كورە الادى. كەز كەلگەن ۋاقىتتا بۇل كەلىسىمنىڭ كۇشىن جويۋعا, بانك دەرەكتەرىن ءوشىرىپ, ءارى قاراي قولدانباۋعا دا مۇمكىندىك بار.
كليەنت دەرەكتەرى API ارقىلى شيفرلانعان كۇيدە بەرىلەدى. كليەنتتىڭ كەلىسىمى ۇلتتىق بانكتىڭ ۇلتتىق تولەم كورپوراتسياسى سايتىندا كليەنتتى بەينەتەكسەرۋ جانە ونىڭ نومىرىنە SMS-كود جىبەرۋ ارقىلى راستالادى. وسىلايشا, كليەنت بانك پەن كومپانيالارعا بەرگەن بارلىق كەلىسىمدى ءبىر جەردە كورىپ, باسقارادى. ءبىر بانكتىڭ قوسىمشاسىن قولدانا وتىرىپ, باسقا بانك شوتىنداعى قالدىقتى كورە الادى. قاراجاتتارىن شوتتان شوتقا اۋدارۋعا, بانكتىك ءۇزىندى كوشىرمەلەرگە, شوتتارداعى انىقتامالارعا قول جەتكىزىپ, ۆاليۋتا باعامىن سالىستىرادى, تولەم جاسايدى جانە قول قويادى, كىرىستەر مەن شىعىستاردى تالدايدى. بۇل قىزمەت كورسەتۋدىڭ ىڭعايلىلىعىن ارتتىرىپ, سونىمەن قاتار كليەنتتىڭ ۋاقىتى مەن اقشاسىن ۇنەمدەيدى.
ساراپشىلاردىڭ پىكىرىنشە, قاۋىپسىزدىكتى جۇيەنىڭ رەتتەۋشىسى بولىپ سانالاتىن ۇلتتىق بانك قاداعالاۋعا ءتيىس. سونىمەن قاتار ساراپشىلار «اشىق بانكينگ» قارجى ۇيىمدارى اراسىندا باسەكەلەستىكتى قالىپتاستىراتىنىن ايتادى.
«اشىق بانكينگ» – قارجى نارىعىنداعى دامۋدىڭ كەزەكتى ساتىسى. قازىر تسيفرلىق تەڭگە جانە «اشىق بانكينگ» دەيتىن ەكى جاڭا كەزەڭگە كەلىپ تۇرمىز. بۇل وتاندىق قارجى سەكتورىن دامىتۋعا جاڭا سەرپىن بەرەدى دەپ ويلايمىن. ءبىر QR-كود كەز كەلگەن قارجى ۇيىمىنىڭ اۋدارىمدارىن رەتتەيدى. تۇتىنۋشىلار ءۇشىن قولجەتىمدى. ولاردىڭ قۇقىعىن قورعاۋ ماقساتىندا جاسالعان جانە ورتا دەڭگەيلى بانكتەرگە تاپتىرماس جوبا بولماق. سونىمەن قاتار ءىرى بانكتەردىڭ كليەنتتەر بازاسىنا شىعۋعا مۇمكىندىك الادى. ارينە, ءوزىنىڭ QR جۇيەسىن جاساعان ءىرى بانكتەر ءۇشىن بيزنەس جاعىنان كليەنتتەرىن جوعالتىپ الامىز دەگەن قاۋىپ تۋىنداۋى مۇمكىن. بىراق ءبىردى-ەكىلى ءىرى بانكتىڭ بيزنەس مۇددەسىن ەمەس, حالىقتىڭ جاعدايى مەن نارىقتىڭ دامۋى تۇرعىسىن ويلاۋ قاجەت. ءوز باسىم وسى جۇيەنىڭ ەنگىزىلگەنىن قولدايمىن», دەيدى بەلگىلى ساراپشى ايبار ولجاەۆ.
