ساكەنتانۋعا بار عۇمىرىن ارناعان بەلگىلى عالىم تۇرسىنبەك كاكىش ۇلى: «ساكەننىڭ ءسانى – بۇكىل قازاققا تانىلعان سەرىلىكتىڭ, سىربازدىقتىڭ, كەربەزدىكتىڭ جاقسى ۇلگىسى بولاتىن», دەگەن ەدى. عالىمنىڭ وسى ءبىر اۋىز ءسوزى ايتۋلى تۇلعانىڭ بەكزات بولمىسىن تولىق اشىپ تۇر. اقىننىڭ جاقىندارى ءوز ەستەلىكتەرىندە ساكەن وسى شاپان پەن تاقيانى ۇيدە جەكە شىعارماشىلىقپەن اينالىسقاندا كيىپ وتىرعانىن جازادى. سونداي-اق سىرشىل سۋرەتكەردىڭ ماسكەۋدە كەڭەس جازۋشىلارىنىڭ I cەزىندە دەلەگاتتاردىڭ اراسىندا وسى تاقيانى كيىپ تۇسكەن سۋرەتى دە بار. بۇل بەينە 1964 جىلى ول تۋرالى تۇسىرىلگەن دەرەكتى فيلمدە كورسەتىلەدى. وزبەك شەبەرلەرى شاپاندى جولاعى بار تازا ماتادان تىككەن. جولاقتار جاسىل, سۇر جانە قويۋ كوك تۇستەن تۇرادى. ال تاقيا ءتۇرلى-ءتۇستى جىبەك جىپتەن تىگىلگەن. قايراتكەردىڭ زايىبى گۇلباھرام ساكەن اقتالعانعا دەيىن ەرىنىڭ تۇتىنعان زاتتارىن كوزىنىڭ قاراشىعىنداي ساقتاپتى. ءبىر جاعىنان, بولاشاقتا اقىنعا مۋزەي اشىلسا, سوعان تاپسىرماق ويى دا بولعان. بىراق ادامنىڭ ويلاعانى بولا بەرە مە؟ 1973 جىلى گۇلباھرام دۇنيەدەن وزعاننان كەيىن ارداقتى ازاماتتىڭ زاتتارى الماتىداعى مۋزەيگە وتكىزىلگەن. 1988 جىلى ءبىرتۋار تۇلعانىڭ ءىزى قالعان بۇرىنعى اقمولا, قازىرگى استانادا ساكەن سەيفۋللين مۋزەيى اشىلىپ, وسى مۇراجايعا سول جادىگەرلەردىڭ ءبىرازى تاپسىرىلدى. بيىل ساكەن اتامىزعا وزبەك دوستارى سىيلاعان شاپان مەن تاقياعا 90 جىل تولادى. بۇگىندە اقىن ومىرىنەن ءبىر ۇزىك سىر شەرتىپ تۇرعان قۇندى جادىگەر اتالعان مۋزەيدىڭ تورىندە تۇر.
