«رەد بۋلل ارەناداعى» باسەكەنىڭ العاشقى 20 مينۋتى حورۆاتتاردىڭ باسىمدىعىمەن ءوتتى. وسى ءسوزىمىزدىڭ دالەلى – وسى ۋاقىت ارالىعىندا زلاتكو ءداليچتىڭ كومانداسى دوپقا يەلىك ەتۋدە 80 پايىزدىق كورسەتكىشكە قول جەتكىزدى. ارينە, ولاردى تۇسىنۋگە بولادى. حورۆاتيا قۇراماسى وسى ويىندا جەڭىلگەن جاعدايدا «ەۋرو-2024» دوداسىمەن قوش ايتىسادى. تىپتەن, تەڭ ەسەپتى ءوزى قاۋىپتى جاعدايدان قۇتقارمايدى. سول سەبەپتى دە «شاقپاق جەيدەلىلەر» ءجيى شابۋىلداپ, يتاليانى ابدەن قىسپاققا الدى. سونداي قارقىندى شابۋىلداردىڭ بىرىندە ولار گول سوعۋعا دا شاق قالدى. 5-مينۋتتا لۋكا ءسۋچيچتىڭ ايىپ الاڭىنىڭ سىرتىنان قاقىراتا تەپكەن دوبىن دجانلۋيدجي دوننارۋمما قاقپانىڭ «توعىزدىعىنان» الىپ شىقتى. ودان كەيىن دە حورۆاتيا فۋتبولشىلارى بىرازعا دەيىن قارقىنىن باسەڭدەتكەن جوق.
ءبىرىنشى كەزەڭ بەل ورتاعا تاياعان تۇستا عانا اپەننين تۇبەگىنەن كەلگەن جىگىتتەردىڭ ويىنى دۇرىستالىپ, ءبىر جۇيەگە كەلە باستادى. كوبىنە-كوپ قارىمتا شابۋىلعا جۇگىنگەن لۋچانو سپاللەتتيدىڭ شاكىرتتەرىنىڭ دە ەسەپتى وزگەرتۋگە مۇمكىندىكتەرى بولدى. 27-مينۋتتا الەسساندرو باستوني دوپتى باسپەن ۇردى. دەسەك تە دومينيك ليۆاكوۆيچتىڭ كەرەمەت سەيۆىنىڭ ارقاسىندا قاقپا امان قالدى.
ۇزىلىستەن كەيىن الاڭعا تىڭ ويىنشىلار شىقتى. يتاليالىقتار لورەنتسو پەللەگرينيدىڭ ورنىنا داۆيدە فراتتەزيدى شىعارسا, حورۆاتتار ماريو ءپاشاليچتى انتە بۋديميرمەن الماستىردى. ءدال سول فراتتەزي قاربالاس ءبىر ساتتە دوپتى قولىمەن قاعىپ جىبەردى. VAR-دىڭ «كومەگىنەن» كەيىن تورەشى 11 مەترلىك ايىپ دوبىن بەلگىلەدى. نۇكتەگە لۋكا مودريچ كەلدى. ونىڭ باعىتتاعان دوبىن دوننارۋمما كەرى قايتاردى. الايدا قاقپا الدىنداعى قاۋىپ سەيىلگەن جوق. تاعى ءبىر مەزەتتە انتە بۋدەمير نىسانانى قايتا كوزدەدى. دوننارۋمما ءوز ورنىنان تابىلدى. بىراق قاقپاشىنىڭ قايتارعان دوبىنا ءبىرىنشى بولىپ جەتكەن مودريچ ەسەپ اشتى – 1:0. ءسويتىپ, 38 جاستاعى حورۆاتيا قۇراماسى كاپيتانىنىڭ ەسىمى ەۋروپا چەمپيوناتىندا گول سوققان ەڭ كارت فۋتبولشى رەتىندە تاريحتا قالدى.
جوعارىداعى ەسەپ ويىننىڭ سوڭعى سەكۋندتارىنا دەيىن ساقتالدى. «شاقپاق جەيدەلىلەردىڭ» بۇل ماتچتا جەڭىسكە جەتەتىنىنە ەشكىمنىڭ دە كۇمانى بولمادى. نەگىزگى ۋاقىتقا تورەشى تاعى سەگىز مينۋت قوستى. سول ارالىقتا دا ولار «سكۋادرا ادزۋررانىڭ» قارقىندى شابۋىلىنا توتەپ بەردى. الايدا ەڭ سوڭعى سەگىزىنشى مينۋتتا قورعاۋشى ريككاردو كالافوريدەن تاماشا پاس العان جارتىلاي قورعاۋشى ماتتيا دزاككانيدىڭ «توعىزدىققا» باعىتتاعان دوبى كوزدەگەن جەرىنە ءدوپ ءتۇستى. ەسەپ – 1:1. وسى تەڭ ويىننىڭ ارقاسىندا يتاليا قۇراماسى ءوز توبىندا ەكىنشى ورىن الىپ, پلەي-وفف دوداسىندا كۇش سىناسۋ قۇرمەتىنە يە بولدى. ال نەبارى ەكى ۇپاي جيعان حورۆاتتار ءۇشىنشى ورىندا قالىپ قويدى.
* * *
ديۋسسەلدورفتاعى «مەركۋر شپيل-ارەنادا» البانيا مەن يسپانيا قۇرامالارى اراسىندا وتكەن كەزدەسۋدىڭ تاعدىرىن 13-مينۋتتا فەرران توررەس سوققان جالعىز عانا گول شەشتى – 0:1. سودان كەيىن پيرەنەي تۇبەگىنەن كەلگەن فۋتبولشىلار اسىقپاي-اپتىقپاي ءجۇرىپ-اق, وزدەرىنە قاجەتتى ەسەپتى ساقتاپ قالدى. ال قارىمتا قايتارىپ, جاسىل الاڭداعى جاعدايدى تۇزەۋگە البانيالىقتاردىڭ شاما-شارقى مەن شەبەرلىك دەڭگەيى جەتپەدى. بۇل توپتا «قىزىل فۋريا» جەكە-دارا كوش باستاسا, البانيا ەلىنە ەڭسەلەرى ءتۇسىپ قايتاتىن كوماندالاردىڭ قاتارىنا قوسىلدى.
