Kznews.kz مالىمدەگەندەي, نۇرعيسا تىلەنديەۆ پەن داريعا تىلەندىكەلىنى 1967 جىلى الماتىداعى كينوستۋديادا تانىسقان ەكەن. سول ساتتە 42 جاستاعى اتى ايگىلى مۋزىكانت 19 جاستاعى ورىمدەي قىزدى بىردەن ۇناتىپ, سەزىمىن بىلدىرگەن. كوپشىلىككە تانىمال «كۋا بول» ءانى – كومپوزيتوردىڭ سۇيگەن جارىنا ارناعان ەڭ العاشقى تۋىندىسى.
ء«بىز كينوستۋديادا جۇمىس ىستەپ جۇرگەن كەزدە لەنينگرادتان ونەر ادامدارى قازاقستانعا كەلەتىن بولدى. سوعان ءبىز دايىندالدىق, كەلگەن سوڭ مەدەۋدىڭ باسىندا كۇتتىك. سودان كەيىن ءبارى ۇيىنە قايتىپ كەتتى. تەك مەن جانە نۇرعيسا اعا ءجۇر. ول ۋاقىتتا مەن ول كىسىنى «اعا» دەيمىن. سويتسەك نۇراعا ونى ءوزى بارىمەن اقىلداسىپ, وسىلاي جوسپارلاپتى. مەنىمەن سول كۇنى جاقىنىراق تانىسىپ, قاسىمدا بولۋ ءۇشىن سولاي جوسپار قۇرعان. ونى مەن كەيىن ەستىدىم. سول ءتۇنى اي جاپ-جارىق, جۇلدىزدار جىمىڭداپ تۇر. تۇنگى ساعات 2-3-ءتىڭ كەزى. سارىلداپ وزەن اعىپ جاتىر. سول كەزدە نۇراعا اسپانعا قاراپ اۋەن شىعاردى. ول اۋەن «كۋا بول» ءانى ەدى. «قارىنداسىم, مەن وسى ءاندى ساعان ارنايمىن» دەدى. مەن تاڭعالىپ قالدىم. سودان ءبىر جىلدان كەيىن نۇراعاڭ ەكەۋمىز ۇيلەندىك. سول تاريحتى تۇمانباي مولداعاليەۆكە سۋرەتتەپ ايتىپ بەردىك. ول كىسى باسقا بولمەگە كىرىپ كەتتى دە, 5-10 مينۋتتىڭ ىشىندە ءسوزىن جازىپ شىقتى. سودان كەيىن ءبىزدىڭ جۇبىمىز جازىلعان جوق. مەنى سۇيگەن ءبىرىنشى ادام – نۇراعاڭ. ءبىراز جاس ايىرماشىلىعى بار. وعان قاراعان جوقپىز», – دەيدى داريعا تىلەندىكەلىنى.
نۇرعيسا تىلەنديەۆتىڭ دۇركىرەپ وتكەن ۇيلەنۋ تويىندا سول كەزەڭدەگى قازاق ونەرىنىڭ ءدۇلدۇل مايتالماندارىنىڭ ءبارى بولعان ەكەن. الايدا ەرلى-زايىپتىنىڭ وتباسىلىق ومىرىندە ەرەكشە ەستەلىكتەر دە بار, سىناققا تولى ساتتەر دە جوق ەمەس. ولار ۇزاق ۋاقىت ءسابي كۇتكەن.
ء«يا, ءبىز ءسابيدى ۇزاق كۇتتىك, ءبىراز ەم دە الدىق. دانيار دەگەن بالانى اسىراپ الدىق. ول نۇراعاڭنىڭ تۋىسقان قارىنداسىنان تۋعان. ول قارىنداسى كۇيەۋىمەن اجىراسىپ كەتتى دە, ءۇش ايلىعىندا مەن سول بالانى باۋىرىما باستىم. دانيار 1976 جىلى تۋعان بالا. مەن ونى ەمىزىپ ەدىم, مەيىرلەنگەنىم سونشالىق مەنىڭ ومىراۋىمنان ءسۇت شىعىپ كەتتى. دانيار ۇلىم 9 جاسقا تولعاندا 1985 جىلى دينارا قىزىم دۇنيەگە كەلدى. 39 جاسىمدا دينارا قىزىمدى ءوزىم تۋدىم عوي. نۇراعا دينارا ومىرگە كەلگەندە قاتتى قۋاندى. دانيار بالام وتە اپپاق, ماعان ۇقسايتىن. ال 25 جاسىندا دانيار بالامنان ايىرىلىپ قالدىم, جۇرەگى توقتاپ قالدى», – دەيدى كومپوزيتوردىڭ جۇبايى.
سونداي-اق نۇرعيسا تىلەنديەۆتىڭ قازاسى بۇل وتباسى ءۇشىن وڭاي بولعان جوق. 1998 جىلى قازاقتىڭ ماڭدايىنا بىتكەن اتاقتى كۇيشى ومىردەن وزعان ەدى. داريعا اجە سول ءبىر قيىن ءساتتى دە ەسكە الدى.
«مەن نۇراعا جازىلىپ كەتەدى دەپ ويلادىم. اۋرۋحانادا بەس اي جاتتى. سول كەزدە «حالىق قاھارمانى» اتاعىن پرەزيدەنت نازارباەۆ كەلىپ كەۋدەسىنە تاقتى. سودان ءبىر جارىم اي وتكەن سوڭ نۇراعا قايتىس بولدى. ونىڭ الدىندا «داريعا, جاعداي وتە قيىن. ەسىڭدە بولسىن, ەگەر دە ءبىر جاعداي بولسا, ءبىزدىڭ قازىرگى وتىرعان پاتەرىمىز مۇراجاي بولۋى كەرەك» دەدى. سول ءسوزىن مەن باسىما مىقتاپ ساقتاپ الدىم. 2014 جىلى سول ءۇيدى مۋزەيگە تاپسىردىق. ول كەزدە الماتىنىڭ اكىمى احمەتجان ەسىموۆ ەدى. نۇراعانىڭ سىرقاتى – باۋىر اۋرۋى. جارىقتىق سول باۋىردان كەتتى عوي. تاماق ىشپەدى. ونەر ادامدارىنىڭ ءبارى نۇراعاڭنىڭ قاسىندا بولدى. وركەستردەگى بالالارى اۋرۋحانادا كەزەكشىلىككە تۇرىپ, نۇراعانىڭ اياق-قولىن ۋقالاپ, قاسىندا وتىردى. وتە قيىن جاعداي بولدى», – دەيدى تىلەنديەۆتىڭ مۋزاسى.
بۇگىندە داريعا تىلەندىكەلىنى الماتى قالاسىندا تۇرادى. ول كىسىنىڭ ەندىگى ارمانى – قىزى دينارا مەن نەمەرەسى دايانانىڭ قىزىعىن كورۋ.
