شاراينا
اقش-تىڭ ۆيتسە-پرەزيدەنتى دجو بايدەننىڭ ءۇيى جانىندا وق اتىلدى. «اسسوشەيتەد پرەسس» اقپارات اگەنتتىگىنىڭ حابارلاۋىنشا, وقيعا جەكسەنبى كۇنى بولعان.
ۆيتسە-پرەزيدەنتتىڭ كۇزەتشىلەرى اتىلعان وقتىڭ ءۇنىن جەرگىلىكتى ۋاقىت بويىنشا ساعات 08.30-دا ەستىگەن. بۇل ۋاقىتتا بايدەن زايىبىمەن بىرگە باسقا ۇيدە بولىپتى. قۇقىق قورعاۋ ورگاندارىنىڭ قىزمەتكەرلەرى ءۇي جانىنان اۆتوموبيل جۇرگىزۋشىسىن ۇستاعان. ولاردىڭ ايتۋىنشا, وق اتقان وسى ادام بولۋى مۇمكىن. ويتكەنى, ول ۇستاۋ بارىسىندا كادىمگىدەي قارسىلىق كورسەتكەن كورىنەدى. وسى وقيعا جايلى اقش پرەزيدەنتى باراك وباما مەن ۆيتسە-پرەزيدەنت دجو بايدەنگە اقپارات بەرىلگەن.
تۇرىكتىك مافيانىڭ قاتىسى بار سياقتى
«يسلام مەملەكەتى» تەررورشىل توپتارىنىڭ سودىرلارى پاريجدەگى تەررورلىق ارەكەتتەرگە قاتىسى بار دەپ كۇدىك كەلتىرىلگەن حايات بۋمەددەندى سيرياعا وتكىزۋدى قامتاماسىز ەتۋ ءۇشىن تۇرىكتىك مافياعا اقشا تولەگەن سياقتى.
بۇل جونىندە «The Mirror» باسىلىمى تۇركيا بارلاۋ قىزمەتىنىڭ دەرەكتەرىنە سىلتەمە جاساي وتىرىپ جازدى. باسىلىمنىڭ كەلتىرگەن دەرەكتەرىنە قاراعاندا, بۋمەددەن مەن مافيا وكىلدەرى ىستامبۇل اۋەجايىندا كەزدەسكەن. سودان كەيىن ولار تۇركيانىڭ ەل-ابياد قالاسىنا جەتىپ, ءارى قاراي بۋمەددەندى سيريانىڭ شەكاراسىنا وتكىزىپ جىبەرىپتى. تۇركيانىڭ بارلاۋ قىزمەتى وسى ارەكەتتى جۇزەگە اسىرعانى ءۇشىن «يسلام مەملەكەتىنىڭ» سودىرلارى تۇرىكتىك مافياعا قوماقتى اقشا تولەدى دەگەن دەرەك كەلتىرەدى. بىراق, كۇدىكتى دەپ سانالعان حايات بۋمەددەن پاريجدە جاسالعان تەررورلىق ارەكەتتەر كەزىندە, ونىڭ فرانتسيا اۋماعىنان تىسقارى جەردە بولعانى راستالىپ وتىر.
ەل پرەزيدەنتىنىڭ قايدا ەكەنى بەلگىسىز
يەمەننىڭ استاناسى – سانا قالاسىندا اسكەري بولىمشەلەر اسكەرلەرى مەن شيتتىك كوتەرىلىسشىلەر اراسىنداعى ۇرىس بولدى. بۇل جونىندە «اسسوشەيتەد پرەسس» اگەنتتىگى اقپارات تاراتتى.
قارۋلى ۇرىستى كورگەندەردىڭ ايتۋىنشا, پرەزيدەنت سارايى ورنالاسقان اۋماقتا ءىرى كاليبەرلى پۋلەمەتتەردەن وق اتىلعان جانە مينا جارىلىستارى ەستىلگەن. ارتىنشا اسپانعا قويۋ قارا ءتۇتىن كوتەرىلگەن. ەل پرەزيدەنتى ابدا راببو مانسۋر ءال-ءحاديدىڭ قايدا ەكەنى ازىرگە بەلگىسىز بولىپ وتىر. اتىس سالدارىنان سول اۋماقتاعى تۇرعىندار ۇيلەرىن تاستاپ كەتكەن. وسىدان ءۇش كۇن بۇرىن شيتتىك كوتەرىلىسشىلەر ەل پرەزيدەنتى اكىمشىلىگىنىڭ باسشىسى احمەد اۆاد بەن مۇباراكتى ۇرلاپ كەتكەن بولاتىن.
ەندى كامەرۋندىقتارعا دا اۋىز سالدى
نيگەريالىق «بوكو حارام» ەكسترەميستىك ۇيىمىنىڭ سودىرلارى جەكسەنبى كۇنى كامەرۋننىڭ سولتۇستىگىندە 80-گە جۋىق ادامدى ۇرلاپ اكەتتى. ولاردىڭ كوپشىلىگى بالالار ەكەن.
كەيبىر اقپاراتتار بويىنشا, ەكسترەميستەردىڭ شابۋىلىنان ءۇش ادام مەرت بولعان, ۇرلانعان بالالار مەن قىزداردىڭ جاس مولشەرى 10-15 جاس ارالىعىندا كورىنەدى. تۇرعىنداردىڭ ايتۋىنشا, شابۋىل كەزىندە ماباسس دەرەۆنياسىنداعى 80-نەن استام ءۇي قيراتىلعان. شۇعىل جەتكەن كامەرۋن اسكەرلەرى مەن ەكسترەميستەر اراسىنداعى اتىس ەكى ساعاتقا سوزىلىپتى. «بوكو حارام» – راديكالدى ەكسترەميستىك ۇيىم, ولار وتكەن جىلدان بەرى نيگەريا اۋماعىندا جانە وسى ەلمەن كورشىلەس مەملەكەتتەردە ويران سالىپ كەلەدى.
گروزنىيدا قارسىلىق ميتينگىسى ءوتتى
كەشە گروزنىي قالاسىندا مۇحاممەد پايعامباردىڭ سۋرەتىن بۇقارالىق اقپارات قۇرالدارىندا كەلەمەجدەپ سالۋعا قارسىلىق بىلدىرىلگەن ميتينگ ءوتتى.
قارسىلىق شەرۋى مينۋتكا الاڭىنان باستالىپ, جينالعان حالىق «چەشەنستان جۇرەگى» مەشىتىنە قاراي بەت الدى. وسى يماندىلىق ۇيىندە ۇجىمدىق ناماز وقىلدى. مەشىت جانىندا «ءبىز مۇحاممەد پايعامباردى سۇيەمىز» دەپ جازىلعان پلاكات ءىلۋلى تۇردى. ال اكتسيا چەشەنستان ءدىني قاۋىمىنىڭ باستاماشى بولۋىمەن ۇيىمداستىرىلدى. وعان 1 ميلليوننان استام ادام قاتىستى. بۇل سوڭعى ۋاقىتتا رەسەيدەگى مۇسىلمانداردىڭ ۇيىمداستىرعان العاشقى اكتسياسى ەمەس. وسىنىڭ الدىندا, ياعني 17 قاڭتاردا ينگۋشەتيادا «يسلام – تەرروريزم مەن ەكسترەميزمگە قارسى» دەگەن ميتينگ وتكەن بولاتىن.
جيھادشىلارعا قاتىستى ساياساتتى سىنادى
«ۇلتتىق مايدان» جەتەكشىسى مارين لە پەن فرانتسيانىڭ جيھادشىلارعا قاتىستى ساياساتىن سىنادى. وسىعان بايلانىستى ءوز ويىن ول «نيۋ-يورك تايمس» باسىلىمىنداعى ماقالاسىندا كەلتىرگەن.
مارين لە پەننىڭ پىكىرى بويىنشا, ازىق-ت ۇلىك ساتىلاتىن سۋپەرماركەتتە كەپىلدىككە الىنعانداردى اتقان تەرروريست امەدي كۋليبالي فرانتسيا شەكاراسىندا كەدەندىك باقىلاۋدىڭ بولماۋىنان, ول اۆتوماتتى بەلگيادان الۋى مۇمكىن. سونداي-اق, لە پەن ەو-عا مۇشە ەلدەر اراسىندا ادامدار مەن تاۋارلاردىڭ ەركىن قوزعالىسى ح.بۋمەددەننىڭ سيرياعا قاشىپ كەتۋىنە مۇمكىندىك بەرىپ وتىر دەپ ەسەپتەيدى. جانە ول زاڭدى جانە زاڭسىز جولمەن كەلىپ جاتقان ميگرانتتار فرانتسيانىڭ قۇندىلىقتارى مەن زايىرلىلىق سيپاتىنا قاۋىپ توندىرەتىنىن اتاپ ءوتىپتى.
قىسقا قايىرىپ ايتقاندا: *وتكەن جىلدىڭ جەلتوقسانىندا ەۋروپالىق سوت حاماس قوزعالىسىن تەررورشىل ۇيىمدار تىزىمىنەن شىعارۋ تۋرالى شەشىم قابىلداعان بولاتىن. ەۋروپالىق وداق سوتتىڭ بۇل شەشىمىنە قارسى شاعىم بەرەتىنىنە ىقتيمال ەكەنىن ءبىلدىردى. *زيمبابۆەنىڭ شىعىسىندا ەكى اۆتوبۋستىڭ سوقتىعىسۋى سالدارىنان 25 ادام مەرت بولىپ, 46 ادام جاراقات الدى. اپات جولدىڭ ساپاسىزدىعىنان ورىن العان سياقتى. *اۆستراليانىڭ سىرتقى ىستەر ءمينيسترى دجۋلي بيشوپ تۆيتتەر قولدانۋشىلارىنان جوعالتىپ العان سىرعاسىن تابۋعا كومەكتەسۋدى ءوتىندى. تابىلعان جاعدايدا وزىنە قالاي حابارلاسۋ كەرەكتىگىن دە جازىپتى. *اقش بيلىگى First National Bank of Crestview بانكىسىنىڭ قىزمەتىن توقتاتتى. بۇل بانك بيىلعى جىلى ەلدە جابىلعان العاشقى كرەديتتىك ۇيىم بولىپ سانالادى.
ينتەرنەت ماتەريالدارى نەگىزىندە ازىرلەندى.
