ولاي بولاتىن دا ءجونى بار. قۋانىش ابدوللا ۇلىنىڭ العاشقى ولەڭ جيناعى ۋنيۆەرسيتەتتە ءجۇرىپ جارىققا شىعادى. «جان-ارىم» اتاۋىمەن. پروفەسسور نۇرلان دۋلاتبەكوۆتىڭ تىكەلەي قولداۋىمەن. ءسويتىپ, قاراعاندىداعى ادەبي ورتاعا وسىلاي قادام باسادى.
اراگىدىك «ورتالىق قازاقستان», «بالقانتاۋ» گازەتتەرىنە قوعامداعى وزەكتى تاقىرىپتارعا وتكىر توقتالىپ, ءوزىنىڭ وي-تولعاۋلارىن جازىپ تۇردى. جانى جازۋدى جاقسى كورگەندىكتەن, جۋرناليست بولعىسى كەلگەن ارمانى باسقاشا ورىندالادى. 2014 جىلى وبلىستىق پوليتسيا دەپارتامەنتىنىڭ ءباسپاسوز قىزمەتىنە جۇمىسقا قابىلدانادى. سوندا ءجۇرىپ پوليتسيا قىزمەتكەرلەرىنىڭ قىزىعى مەن شىجىعىن, قۇقىق قورعاۋ ورگانىنداعى جىلت ەتكەن جاڭالىقتاردى وڭىردەگى گازەت بەتتەرىندە كورسەتە ءبىلدى. وبلىستىق «Saryarqa» تەلەارناسىنداعى «زاڭ جانە زامان» باعدارلاماسى ارقىلى دا حالىققا ورگانداعى ءومىردىڭ قىر-سىرىن جەتكىزىپ ءجۇردى.
ءباسپاسوز سالاسىنداعى جۇمىستاردى ۇرشىقشا ءيىرىپ, ۇتىمدى ۇيىمداستىرا بىلگەن قىزمەتكەر 2019 جىلى دەپارتامەنتتىڭ يدەولوگيا مەن يميدجىنە جاۋاپتى تاربيە جانە كادر جۇمىسى باسقارماسىنا اۋىسادى. بۇل باسقارماداعى شارۋا دا قۋانىش ابدوللا ۇلىنا اسا تاڭسىق ەمەس. وسىندا ءجۇرىپ ەرەكشە تاپسىرمالار جونىندەگى اعا ينسپەكتور لاۋازىمىنا دەيىن جوعارىلايدى, قازىر مايور شەنىندە.
مۇندا قانداي قىزمەت اتقارادى؟ دەپارتامەنت قىزمەتكەرلەرىنىڭ, ياعني ءار پوليتسەيدىڭ پاتريوتتىق رۋحىن كوتەرۋ ماقساتىندا ءتۇرلى مادەني ءىس-شارالار ۇيىمداستىرادى. ماسەلەن, ەرلىك كورسەتكەن قىزمەتكەرلەردىڭ باتىلدىقتارىن ناسيحاتتاپ, ۇلگى ەتەدى. ىشكى ىستەر ورگانىنىڭ ارداگەرلەرىمەن «ەرلىك ساباقتارىن» وتكىزەدى. ياعني جاس پوليتسەيلەرگە ولاردىڭ داڭقتى جولدارىن ۇلگى ەتەدى. ۇنەمى تەاتر, كينوتەاتر سەكىلدى باسقا دا مادەني ۇيىمدارمەن بىرلەسە جۇمىس ىستەيدى. رۋح كوتەرەتىن قويىلىمعا, كينوعا بارۋىن ۇيىمداستىرادى. بىلايشا ايتقاندا, ءار پوليتسەيدىڭ يميدجىنە جاۋاپتى.
«اقىن ءۇشىن پوليتسەي بولۋ اجەپتەۋىر اۋىر. ايتپەسە, قاراپايىم پوليتسيا قىزمەتكەرى بولساڭ بار كۇش-جىگەرىڭدى ايانباي جۇمىسقا ارنايسىڭ. اقىن رەتىندە ءوز شىعارماشىلىعىڭا ەركىندىك بەرۋ مۇمكىندىگى ءسال اۋىرلاۋ. دەسە دە باسشىلىق ۇنەمى قولداۋ كورسەتىپ, شىعارماشىلىعىما ەركىندىك بەرىپ تۇرادى. ناتيجەسىندە, پوليتسياعا دەگەن حالىقتىڭ وڭ كوزقاراسىن قالىپتاستىرۋعا بىرنەشە ولەڭ, پاتريوتتىق باعىتتاعى اندەرگە سوزدەر جازىلدى. بەينەروليكتەر مەن دەرەكتى فيلمدەر ءتۇسىرىلدى. ول, ارينە, جالعىز مەنىڭ ەڭبەگىم ەمەس. دەپارتامەنتتەگى «ەڭبەك جانە ەرلىك داڭقى» مۋزەيىنىڭ ديرەكتورى ايجامال بەكىشقىزى مەن ءباسپاسوز قىزمەتى سالاسىنداعى ارىپتەس دوستارىمنىڭ ارقاسىندا», دەيدى قۋانىش.
وسىدان ون جىل بۇرىن اقىن داۋرەن بەرىكقاجى ۇلىنىڭ قولداۋىمەن «قارا جاشىك» اتتى كىتابى جارىققا شىعىپ, ونى ادەبي ورتا جىلى قابىلدادى. ال وقىرماننان وڭ باعا الادى. سىرشىل ولەڭدەرى يسپان, تۇرىك, فرانتسۋز, ازەربايجان تىلدەرىنە اۋدارىلىپ, قازاق اقىندارىنىڭ ۇجىمدىق انتولوگياسىنا ەنگەن. يسپان حالقىنىڭ عانا ەمەس, الەم اقىنى اتانعان حوستە حورحە پادرون «الەمدەگى 30 ەلدىڭ اقىندارىنىڭ ىشىندە پوليتسيا قىزمەتىندە جۇرگەن اقىندى ءبىرىنشى رەت كەزدەستىردىم», دەگەن پىكىر ءبىلدىرىپ, پوەزياسىنا باس بارماقپەن باعا بەرىپتى.
ودان بولەك, قۋانىش ابدوللا ۇلى بىرنەشە انگە ءسوز جازعان. «جاساي بەر, قازاقستان», «اناشىم», «ارۋ قالقا قىز» سەكىلدى اندەرى ەلدىڭ اۋزىندا كەڭ تاراعان.
مۇنىمەن قوسا اقىن پوليتسەي ءتورت ۇل, ءۇش قىزدىڭ اكەسى. دەمەك جۇبايى جادىرا سەرىكبەكقىزىنىڭ ازاماتىنىڭ جاعاسىنا كىر, كوڭىلىنە كىربىڭ تۇسىرمەي, قولداۋى دا ۇلكەن شارۋا. جادىرا جانىنا جاقىن كاسىپپەن, ياعني تىگىنمەن اينالىسادى. تاپسىرىسپەن پەردە تىگىپ, وتباسىنىڭ تابىسىن ەسەلەپ وتىر. اقىن قۋانىش «بالالارىم – كوز قۋانىشىم, كوڭىل نۇرىم. جۇمىستان شىعا سولارعا اسىعامىن. جالپى العاندا ولەڭدە دە, ومىردە دە ارمانى ورىندالعان جانمىن», دەيدى. ولاي بولسا, ءبىز دە قۋانىش ءۇشىن قۋانىشتىمىز.
قاراعاندى وبلىسى
