سول سەبەپتى باعزى زاماندا مەرگەندەر جامبى اتۋ ءۇشىن ءجۇرىسى تايپالعان سۋ جورعا مىنەتىن بولعان. ويتكەنى جورعانىڭ ءجۇرىسى جايلى, جىلدامدىق ىرعاعى بىرتەكتى. مۇنداي جىلقىنى قازاق «جامبى اتى» دەپ اسپەتتەگەن. جامبىنىڭ اتى – شاۋىپ نەمەسە جورعالاپ كەلە جاتىپ, نىسانا – جامبىعا جاقىنداعاندا قوزعالىسىن اسا جايلى تىنىش ىرعاققا اۋىستىرا بىلەتىن قابىلەتتى بولۋعا ءتيىس.
كونە دەرەكتەردە مەرگەن استىنداعى اتىنىڭ ءتورت تۇياعى جەردەن ءبىر ساتكە قاتار كوتەرىلەتىن كەزىن تۇيسىگى ارقىلى اڭدايتىن بولعان. ءدال وسى كەزدە جەبە بوساتقان جاعدايدا ونىڭ نىساناعا ءدوپ تيۋ مۇمكىندىگى زور.
حالقىمىزدىڭ تاريحي جىرلار ساناتىنا جاتاتىن «بوگەنباي باتىردىڭ ءبىرىنشى جورىعى» اتتى جىردا (مولداجان جاداي ۇلىنىڭ نۇسقاسى. – بابالار ءسوزى: ءجۇز تومدىق. – استانا: «فوليانت», 2004. 58-توم.147-ب) باتىردىڭ جامبى اتۋ ءۇشىن مىنەتىن اتىن «جامبى كەر» اتاعانى ايتىلادى:
«ەكەۋى قالا بەردى امانداسىپ,
بەت الىپ تارتتى جالعىز كۇنشىعىسقا.
حوش ايتىپ ءجۇرىپ كەتتى بوكەڭ باتىر,
استىندا جامبى كەر ات, قولدا شاتىر».
