ءىس-شارانىڭ ماقساتى — ايەلدەردىڭ ديپلوماتياعا قوسقان ەلەۋلى ۇلەسىن كورسەتۋ, ولاردىڭ تاجىريبەلەرىنە توقتالۋ جانە وسى سالاداعى گەندەرلىك تەڭدىكتى ودان ءارى ىلگەرىلەتۋ ستراتەگيالارىن تالقىلاۋ.
تالقىلاۋعا بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري, ۇلىبريتانيانىڭ قازاقستانداعى ەلشىسى كەتي ليچ, بۇۇ-نىڭ ايەلدەرگە قاتىستى ديسكريميناتسيانى جويۋ جونىندەگى كوميتەتتىڭ (CEDAW) مۇشەسى مادينا جاربوسىنوۆا, وڭتۇستىك افريكا رەسپۋبليكاسىنىڭ قازاقستانداعى ەلشىسى كەيتۋمەتسي سەيپەلو تاندەكا مەتيۋز, قر ءسىم كوپجاقتى ىنتىماقتاستىق دەپارتامەنتىنىڭ ديرەكتورى ديدار تەمەنوۆ جانە باسقا دا ەلىمىزدەگى ديپلوماتيالىق كورپۋستىڭ وكىلدەرى, ستۋدەنتتەر مەن اكادەميالىق ورتا وكىلدەرى قاتىستى.
1920 جىلداردىڭ باسىنان باستاپ ايەلدەردىڭ تاڭداۋىن شەكتەيتىن زاڭدىق كەدەرگىلەر جويىلا باستادى. دەگەنمەن الەۋمەتتىك نورمالار مەن تەرىس پىكىرلەر الدەقايدا ۇزاق ۋاقىتقا سوزىلدى جانە 1945 جىلى بۇۇ جارعىسىنا قول قويعان 850 دەلەگاتتىڭ تورتەۋى عانا ايەلدەر بولدى. سودان بەرى ەكىجاقتى ديپلوماتيادا جانە بۇۇ-دا ايەلدەر وكىلدىگىنىڭ ءوسۋى بايقالدى, بىراق پروگرەسس باياۋ بولدى.
1992 جانە 2019 جىلدار ارالىعىندا ايەلدەر الەم بويىنشا كەلىسسوزدەرگە قاتىسۋشىلاردىڭ 13%, دەلدالداردىڭ 6% جانە بەيبىتشىلىك ۇدەرىستەرىنە قول قويۋشىلاردىڭ 6% عانا قۇرادى. گەندەرلىك تەڭدىك جانە بارلىق ايەلدەر مەن قىزداردىڭ قۇقىقتارى مەن مۇمكىندىكتەرىن كەڭەيتۋ دە بارلىق تۇراقتى دامۋ ماقساتتارىنا جەتۋگە ماڭىزدى ۇلەس قوسادى.
«ديپلوماتيادا گەندەرلىك تەڭدىكتى قامتاماسىز ەتۋ ادىلدىك ماسەلەسى عانا ەمەس, ءبىز ايەلدەردى ديپلوماتيادا العا جىلجىتقاندا, ءبىز ديپلوماتيانى العا جىلجىتامىز. ايەلدەردىڭ وركەندەۋى ءۇشىن جاعداي جاساي وتىرىپ, ءبىز جاھاندىق ساحنادا تيىمدىرەك جانە تۇراقتى ديپلوماتيالىق ارالاسۋعا جول اشامىز», دەدى بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري.
ايتا كەتەرلىگى, قازاقستان بۇۇ-عا 1992 جىلى مۇشە بولعاننان بەرى ەل مۇشەلىگىنىڭ باسىم ۋاقىتىندا – 32 جىلدىڭ 17 جىلىن – ايەل ەلشىمەن تانىستىردى. قازىرگى تاڭدا قازاقستاندا تىركەلگەن ايەل ەلشىلەر سانى 67 ەلشىلىك اراسىندا 11 ادامدى قۇرايدى, ال قازاقستاننىڭ شەتەلدەگى وكىلدىكتەرى اراسىندا ءۇش ايەل ەلشى بار. بۇل ساندار جوعارى بولماسا دا, قازاقستان ۇكىمەتىنىڭ ايەلدەر مۇمكىندىكتەرىن كەڭەيتۋگە اسا كوڭىل ءبولۋىن ەسكەرە وتىرىپ, اتالعان كورسەتكىش وڭ ءۇردىس كورسەتە بەرەتىنى ءسوزسىز.
ەسكە سالا كەتەيىك, حالىقارالىق ديپلوماتياداعى ايەلدەر كۇنى 2022 جىلى بۇۇ باس اسسامبلەياسىنىڭ 76-سەسسياسىندا رەسمي تۇردە بەلگىلەنگەن ەدى. اتالعان رەزوليۋتسيانى 191 مەملەكەت قولداپ داۋىس بەردى, ولاردىڭ قاتارىندا قازاقستان دا بار. بيىل بۇل كۇن رەسمي تۇردە ەكىنشى رەت اتاپ وتىلمەك.
قىرمىزى جۇماعاليقىزى,
ەۇۋ ستۋدەنتى
