اسكەري كەڭەس: جىل قورىتىندىسى

الماتى قالاسىندا قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ اسكەري كەڭەسى بولىپ ءوتتى. وعان ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاەۆ قاتىستى, دەپ حابارلادى قر ۇقك شق-نىڭ ءباسپاسوز قىزمەتى. اسكەري كەڭەس بارىسىندا «سەمەي» شەكارالىق جەكە باقىلاۋ اسكەري بولىمىنە جاۋىنگەرلىك تۋ تاپسىرىلدى. اسكەري كەڭەسكە توراعالىق ەتكەن ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتى ديرەكتورىنىڭ مىندەتىن ۋاقىتشا اتقارۋشى پولكوۆنيك دارحان ءدىلمانوۆ اسكەري كەڭەس مۇشەلەرىن كۇن تارتىبىمەن تانىستىرا كەلە, بىلتىرعى جىلى قول جەتكىزىلگەن نەگىزگى تابىستارعا توقتالدى. اسكەري كەڭەس مۇشەلەرى 2014 جىلعى اسكەري-جاۋىنگەرلىك قىز­مەت­تەگى تابىستار, ماتەريالدىق-تەح­ني­كالىق قامتاماسىز ەتىلۋ با­رى­سى جانە اسكەري ءتارتىپ ماسە­لەسى­نە كەڭىنەن توقتالدى. اتاپ ايت­قان­دا, بىلتىرعى جىلى شەكاراشى­لار قىزمەتىندە كونتراباندانى انىقتاۋ, ەسىرتكىنى ۇستاۋ دەرەك­تەرى­نىڭ جيىلەگەندىگى ايتىلدى. وتكەن جىل ىشىندە 24 مىڭنان استام قۇقىق بۇزۋشىلىق انىقتالىپتى. جۇك­تەرىن كونتراباندالىق جولمەن وتكىزۋگە تىرىسقان 673 دەرەك تىركەلىپتى. ال تاركىلەنگەن جۇكتەر­دىڭ سالماعى 2 مىڭ توننانى قۇراسا, 1,5 تونناعا جۋىعى ەسىرتكى زاتتارى, ونىڭ 96,8 كيلوسى «گەروين». كاسپي تەڭىزىندە ارنايى ساۋىقتىرۋ ءىس-شارالارى وتكىزىلىپ, ونىڭ بارىسىندا 144 ءجۇزۋ قۇرال­دارى, 4 مىڭ دانا بەكىرە بالىعى, 1 مىڭ دانا بەكىرە تۇقىمداس با­لىقتار, 200 شاقىرىمعا جۋىق قار­ماقتى قۇرالدار, 280 شاقىرىم اۋ قۇرالدارى تاركىلەنگەن. اتالعان زاڭ بۇزۋشىلىقتار بويىنشا 190 قىلمىستىق ءىس قوزعالىپتى, سول بويىنشا 10 394 ازامات ايىپپۇل جازاسىنا كەسىلگەن. جالپى سالىنعان ايىپپۇلدىڭ سوماسى 168 ملن. 888 مىڭ تەڭگەنى قۇرايدى. شەكارا قىزمەتىن قارۋ-جاراق, تەحنيكا قۇرالدارى جانە باسقا دا ارناۋلى قۇرالدارمەن جابدىقتاۋ ءىسى جالعاستىرىلدى. ونىڭ ىشىندە «ان-74ت-200ا» ۇشاعى, «مي-171ش» دەپ اتالاتىن 2 بىردەي كولىكتىك اسكەري تىكۇشاق ساتىپ الىنعان. 9 اۋە كەمەسى زامان تالابىنا ساي جوندەلىپ, جاڭعىرتىلدى. وسىنىڭ ناتيجەسىندە, تۇنگى كورۋ قۇرالدارى ارقىلى تۇنگى بارلاۋ جۇمىستارىنا شىعۋعا مۇمكىندىك اشىلدى. اۆياتسيانىڭ تاسىمالداۋ قۋاتى دا ارتتى. كاسپيدەگى تەڭىز شەكاراسىن كۇزەتۋ ىسىنە «ايبار» جو­با­سى بويىنشا جاسالعان كەمە پاي­دالانۋعا بەرىلگەندىگىن ەرەكشە اتاپ وتكەن ءجون. شەكاراشىلاردىڭ اۆتوپارك قىزمەتى دە ايتارلىقتاي جاڭارتىلدى. 477 دانا اۆتوموبيل مەن ينجەنەرلىك-جول تەحنيكا­لارى ساتىپ الىندى. مەديتسي­نا­لىق قىزمەت كورسەتۋ ءىسىن جاقسار­تۋ ماقساتىندا بىلتىرعى جىلى رەنتگەنولوگيالىق جانە ستوما­تولو­گيالىق كەشەندەر الىندى. – وتكەن جىل گەوساياسي جانە الەمدىك ەكونوميكا سالاسىندا وزگەرىستەرگە تولى بولدى. جاڭادان قاۋىپ-قاتەر ايماقتارى پايدا بولدى. تەرروريستىك جانە ەكسترەميستىك ۇيىمدار تاراپىنان قاۋىپ-قاتەر كوبەيدى. اتالعان قاۋىپ-قاتەرلەرگە تويتارىس بەرۋ قاجەتتىگى مەملەكەت باسشىسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى جولداۋىندا ناقتى ايتىلعان. ەلباسىنىڭ تاپسىرماسىن ورىنداۋ ءۇشىن بارلىق كۇش-جىگەرىمىزدى بىرىكتىرۋىمىز كەرەك. شەكارا قىزمەتى ۇلتتىق قاۋىپسىزدىك كوميتەتىنىڭ قۇرامداس بولىگى بولىپ تابىلادى, سوندىقتان اتقاراتىن مىندەتتەرى دە ورتاق, ول – ەلىمىزدىڭ ۇلتتىق قاۋىپسىزدىگىن قامتاماسىز ەتۋ. وسى مىندەتتى ورىنداۋ جولىندا بارلىقتارىڭىزعا تابىس تىلەيمىن, – دەپ اتاپ ءوتتى ءوز سوزىندە ۇقك توراعاسى نۇرتاي ابىقاەۆ. كەڭەس بارىسىندا ۇزدىك شەكارا وتريادتارى, ۇزدىك زاستاۆالار جانە ۇزدىك شەكاراشىلار انىقتالىپ, ماراپاتتالدى.