فوتو: قر ءىىم ۇلتتىق ۇلانىنىڭ ءباسپاسوز قىزمەتى
ەلوردالىق قۇرامنىڭ جاۋىنگەرلەرى قالا تىنىشتىعىن كۇزەتۋ بويىنشا قىزمەتكە ءتۇسۋ ءۇشىن سالتاناتتى ساپ تۇزەپ تۇردى. اسكەري ءبولىم كومانديرى ماراپاتتاۋ ءۇشىن اسكەري جاساقتى مىنبەر الدىنا شاقىردى. ساربازدار ۇشتىگى اسكەري جۇرىسپەن مىنبەردىڭ الدىنا كەلىپ, ساپقا تۇردى. العاشقى بولىپ «اق جول» پارتياسىنىڭ وكىلدەرى ساربازداردى ماراپاتتادى. ەكى ساربازعا ماقتاۋ قاعازىن ۇسىنسا, قاتارداعى الىشەر ماحمەتتىڭ كەۋدەسىنە مەدال تاقتى. ولاردىڭ ايتۋىنشا, الىشەردەي جاستار ەلىمىزدىڭ بولاشاعى بولىپ تابىلادى.
سودان كەيىن, استانا قالاسىنىڭ توتەنشە جاعدايلار دەپارتامەنتى باستىعىنىڭ ورىنباسارى ازاماتتىق قورعانىس پودپولكوۆنيگى ماديار مىرزاگەلدينوۆ قر توتەنشە جاعدايلار ءمينيسترىنىڭ بۇيرىعىن وقىپ, ۇلاندىق الىشەر ماحمەتكە ۆەدومستۆولىق مەدالدى تابىس ەتتى.
«ۇلتتىق ۇلان ساربازى الىشەرگە وقيعا ورنىندا ەرلىك تانىتىپ, ادام ءومىرىن قۇتقارعانى ءۇشىن العىس بىلدىرەمىز», دەدى مينيسترلىك وفيتسەرى ساپتىق الاڭداعى جەكە قۇرامعا قاراپ.
ساربازدىڭ ءوزى بولسا, بۇل ونىڭ وتان الدىنداعى مىندەتى ەكەنى, جانە قۇرامانىڭ بارلىق ساربازدارى ونىڭ ورنىندا بولسا, وسىلاي جاسايتىنىن ايتتى.
«مەن ءۇشىن بۇگىنگى ماراپاتتاردىڭ ورنى ەرەكشە. ەرلىگىمدى ەسكەرگەنى ءۇشىن ۇلتتىق ۇلان باس قولباسشىسىنا, اسكەري ءبولىم كومانديرىنە جانە قر توتەنشە جاعدايلار مينيستىرلىگى مەن پارتيا وكىلدەرىنە العىس ايتامىن. ءبىزدىڭ مىندەتىمىز - تىنىشتىقتى قورعاۋ, ەلگە كومەكتەسۋ», دەدى جاس سارباز.
قاتارداعى الىشەر ماحمەت سولتۇستىك قازاقستان وبلىسىنىڭ تۋماسى, وتكەن جىلدىڭ قاراشا ايىندا 5573 اسكەري بولىمىنە وتان الدىنداعى بورىشىن وتەۋ ءۇشىن كەلگەن.
ەسكە سالا كەتەيىك, 15 ماۋسىم كۇنى كەشكى ۋاقىتتا استانا قالاسىندا 5573 اسكەري ءبولىمىنىڭ قاتارداعى جاۋىنگەرلەرى الىشەر ماحمەت, ارسەن قازي مەن رينات دوسششانوۆ قىزمەت اتقارۋ كەزىندە اقبۇلاق وزەنىنەن ءجۇزىپ وتۋگە دوسىمەن باسەكەلەسىپ, سۋعا باتا جازداعان №63 مەكتەپ وقۋشىسىن قۇتقارعان ەدى.
