زايسان كولى مەن قارا ەرتىس وزەنىنىڭ ەكوجۇيەسى ءۇشىن ماڭىزى زور شاراعا شىعىسقا جۇمىس ساپارىمەن كەلگەن ەكولوگيا ءمينيسترى ەرلان نىسانباەۆ تا قاتىستى. بالىقتاندىرۋ جۇمىسىن وبلىسىمىزداعى بەكىرە بالىعىنىڭ ۋىلدىرىعىن جانە ەتىن وندىرۋمەن اينالىساتىن ىرگەلى كاسىپورىنداردىڭ ءبىرى, بىرەگەيى «Ost Fish» جشس قولعا العان.
اتالعان كاسىپورىننىڭ باس ديرەكتورى ەرلان ساعيدولدين قارا ەرتىس وزەنىنە بالىق جىبەرۋ شاراسىنا اتسالىسقان ازاماتتارعا بەكىرە تۇقىمداستى ءوسىرۋدىڭ ەرەكشەلىكتەرى, ولاردى قورعاۋ, جەرگىلىكتى ەكوجۇيەنى ساقتاۋ جونىندە تارقاتىپ ايتىپ بەردى.
– ءبىزدىڭ كاسىپورىن بەكىرەنىڭ ءۇش ءتۇرىن وسىرەدى. ونىڭ ىشىندە ءسىبىر بەكىرەسى دە بار. بيىل كوكتەمدە شارۋاشىلىعىمىزدا تەحنولوگيانى جاڭارتۋ جۇمىستارى جۇرگىزىلگەن. سونىڭ ناتيجەسىندە جىلىنا 500 مىڭعا جۋىق شاباق الۋعا بولاتىنداي ينفراقۇرىلىم قۇرىلدى. ەندى شاباقتارىمىزدى اباي, پاۆلودار جانە شىعىس قازاقستان وبلىستارىنىڭ سۋ ايدىندارىنا جىبەرۋدى جوسپارلاپ وتىرمىز, – دەدى كاسىپورىن باسشىسى ە.ساعيدولدين.
ونىڭ ايتۋىنشا, بۇگىن مارقاكول مەن زايسان اۋداندارىن ءبولىپ جاتقان قارا ەرتىس وزەنىنە ءسىبىر بەكىرەسىنىڭ ءبىر جاسار 500 داراعى جىبەرىلدى. بالىقتاردىڭ ارقايسىسىنىڭ سالماعى 1,5 كەلىگە دەيىن تارتادى. دەمەك ولارعا بۇل سۋلاردى مەكەن ەتەتىن جىرتقىش بالىقتاردان كەلەر قاۋىپ جوق.
كوپپەن بىرگە ءسىبىر بەكىرەسىنىڭ تاريحي مەكەنىنە ورالۋىنا كۋا بولعان ەكولوگيا ءمينيسترى ەرلان نىسانباەۆ: «بۇل – وتە قۇپتارلىق باستاما. سەبەبى ءسىبىر بەكىرەسى زايسان مەن ەرتىستى ەجەلدەن مەكەندەگەن. الايدا وتكەن عاسىردىڭ 50-60-جىلدارىنداعى سۋ ەلەكتر ستانسالارىنىڭ سالىنۋى ادەتتە ءسىبىر مەن التاي اراسىندا ورلەپ-قۇلداپ جۇرەتىن بالىقتاردىڭ جوعارى ورىستەۋىنە توسقاۋىل بولعان. ەندى, مىنە, بۇل پروبلەما دا شەشىمىن تاپقان سەكىلدى.
ءسىبىر بەكىرەسىن زايسان باسسەينىنە, قارا ەرتىسكە جەرسىندىرۋدى كوزدەپ, بۇل باعىتتا باتىل ارەكەت ەتكەن ازاماتتارعا ەڭبەكتەرىنە تەك ساتتىلىك تىلەيمىن. مينيسترلىك تاراپىنان بۇل باستاماعا ءۇن قوسىپ, قولداۋ بىلدىرۋگە دايىنبىز. بۇل باعىتتاعى جۇمىستار الداعى ۋاقىتتا جالعاسىن تابادى», دەدى.
سونىمەن قاتار سالا باسشىسى قازىر بالىق وسىرەمىن دەگەن شارۋاشىلىقتارعا مەملەكەت تاراپىنان جان-جاقتى قولداۋ بولاتىنىن ايتىپ سەندىردى.
شىعىس قازاقستان وبلىسى
