ءبىلىم ساپاسىن جوعارى ناتيجەگە جەتكىزۋدە وبلىستىڭ ءار اۋدانىنداعى ءبىلىم وشاقتارى, سونىڭ ىشىندە ءا.مالكەەۆ اتىنداعى وبلىستىق ء«بىلىم-يننوۆاتسيا» ليتسەيىن, ىلە, قاراساي, ەڭبەكشىقازاق اۋداندارى, «ارىستان» ليتسەيى مەن «دانا» جەكەمەنشىك مەكتەپتەرىنىڭ ۇلەسى زور ەكەندىگى ەرەكشە اتالدى.
– «مەكتەپ قابىرعاسىنداعى جەتىستىكتەر – مەملەكەت باسشىسى قاسىم-جومارت كەمەل ۇلى توقاەۆتىڭ ءبىلىم سالاسىنا دەگەن ەرەكشە كوزقاراسى مەن قولداۋىنىڭ جەمىسى. سونىڭ ارقاسىندا وبلىسىمىزدا ءبىلىم سالاسى جۇيەلى دامىپ كەلەدى. وتكەن وقۋ جىلىندا ءبىلىم ساپاسى 67,2 پايىزدى قۇرادى. بيىل مەكتەپ بىتىرگەن 14 مىڭ تۇلەكتىڭ 1 206-سى «ۇزدىك اتتەستات», 946 بالا «التىن بەلگى» توسبەلگىسى يەگەرى اتاندى», – دەدى فورۋمدا دارىندى وقۋشىلاردى قۇتتىقتاعان ءوڭىر باسشىسى مارات سۇلتانعازيەۆ.
ساپالى ءبىلىم الۋمەن قاتار, ەرەكشە دارىنىمەن تانىلعان ءوڭىردىڭ ءبىر توپ وقۋشىلارىنىڭ ەسىمى ەرەكشە اتالدى. اتاپ ايتساق, ەڭبەكشىقازاق اۋدانىنداعى №1 راحات ورتا مەكتەبىنىڭ وقۋشىسى, اۋىلدىق سپارتاكيادادا رەسپۋبليكا بويىنشا جالعىز «ابسوليۋتتىك جەڭىمپاز» اتانعان نۇريسلام ابدۋحاميت, ء«بىلىم-يننوۆاتسيا» ليتسەيىنىڭ وقۋشىسى مۋسليم حالەل, تالعار اۋدانى گاگارين اتىنداعى №8 مەكتەپ-ليتسەيىنىڭ وقۋشىسى انگەلينا الەكسانوۆا, «ارىستان» ليتسەيىنىڭ وقۋشىسى ميراس ابدىكەش, قوناەۆ قالاسى ورتا مەكتەپ-گيمنازياسىنىڭ وقۋشىسى ايزەرە قويشىمان, ىلە اۋدانى 38-گيمنازيا وقۋشىلارى ايشا بەكمۇحامەت پەن ميلانا فۋرسوۆا سىندى وزاتتار. ولاردىڭ تالانتى مەن جەتىستىكتەرى ءىس-شاراعا جينالعانداردىڭ ماقتانىشى مەن تاڭدانىسىن تۋدىردى.
سالتاناتتى جيىندا جەڭىمپازدارعا الماتى وبلىسىنىڭ اكىمى العىس حات تابىس ەتتى.
«مەن قوناەۆ قالاسىنىڭ ورتا مەكتەپ-گيمنازياسىنىڭ وقۋشىسىمىن. دارىندى بالالار تىزىمىندە بولۋ – مەن ءۇشىن ۇلكەن مارتەبە. ۇستازدارىمنىڭ كورسەتكەن قولداۋلارى مەن بەرگەن بىلىمدەر ارقىلى مەن بولاشاقتا كوپتەگەن جەتىستىككە قول جەتكىزە الاتىنىما سەنىمدىمىن», – دەيدى ءجۇزى بال-بۇل جانعان اعىلشىن ءتىلى سەكتسياسى بويىنشا رەسپۋبليكالىق وليمپيادا جەڭىمپازى ايزەرە قويشىمان.
ساپالى ءبىلىم مەن بويىنداعى دارىنىن, قابىلەت-قارىمىن ۇشتاستىرا بىلگەن بالالاردىڭ بۇل كۇنگى قۋانىشتارىندا شەك بولمادى. وزدەرىنە كورسەتىلگەن قۇرمەت – زور جاۋاپكەرشىلىك جۇكتەيتىنىن سەزىنىپ, الدا تالاي جەتىستىككە جەتىپ, بيىكتەردى باعىندىراتىندارىنا سەنىمدى كۇيدە تارقاستى.
الماتى وبلىسى
