«تازا قازاقستان» اكتسياسى باستالعالى بەرى وبلىس اۋماعىن, قالالار مەن ەلدى مەكەندەردى تازارتۋ, بۇعان قوسىمشا قوعامدىق ورىنداردى قالپىنا كەلتىرۋ جۇمىستارىنا 3 136 ۇيىم مەن ارنايى 1 807 تەحنيكا قاتىسقان. تۇرعىنداردىڭ قاتىسۋىمەن 52,5 مىڭ اۋلا تازالانىپ, 34,1 مىڭ توننا تۇرمىستىق قالدىق پەن قوقىس شىعارىلعان. ء«مولدىر بۇلاق» اپتالىعى اياسىندا اياگوز, بەسقاراعاي, ءۇرجار جانە جاڭادان قۇرىلعان جاڭاسەمەي اۋداندارىندا وزەن-كولدەردى, سۋبۇرقاقتار مەن كانالداردى قوقىستان تازارتۋ جۇمىستارى جۇزەگە استى. ونىڭ ىشىندە 602 سۋ قويماسى, 66 مىڭ تەكشە مەتر وزەن-كول سۋى, 27 مىڭ مەتر سۋارۋ ارىقتارى, 30 سۋبۇرقاق تۇرلەنىپ, ءوڭىر كەلبەتىنە جاڭاشا كەسكىن ۇستەگەن ەكەن.
جارما اۋدانىندا اتالعان اپتالىق اياسىندا «وزەن-سۋ – ولكە اجارى» ءىس-شاراسىنىڭ ناتيجەسىندە اۋدان جۇرتشىلىعى 30-دان ارتىق وزەننىڭ ارناسى مەن جاعالاۋىن كۇل-قوقىستان ارىلتىپ, ءىرى وزەندەردىڭ ءبىرى شار وزەنىنىڭ جيەگىن قۇلپىرتۋعا كۇش سالعان. بەلسەنە ارالاسقان باستاماشىلار مەن ەرىكتىلەر توبى وزەن جاعاسىنا دەمالۋعا باراتىن اۋدان تۇرعىندارى مەن قوناقتارىنا تابيعاتتى ايالاۋ ماقساتىندا ۇگىت-ناسيحات جۇمىستارىنا جۇمىلدىرىلعان. ال بەسقاراعاي اۋدانىنىڭ بىرلىگى بەكەم جاستارى كوگالداندىرۋ جۇمىستارى نەگىزىندە بەگونيا, تسينيا, گاتسانيا جانە بارقىت سياقتى 7 800 ءتۇپ كوپجىلدىق گۇل وتىرعىزىپ, اۋدان اجارىن ايشىقتاۋعا اتسالىستى. اياگوز اۋدانىندا قالانى اباتتاندىرۋ جانە كوگالداندىرۋدى كوزدەگەن ەرىكتىلەر جاساعى 300 ءتۇپ تەرەك, 100 ءتۇپ قايىڭ مەن 200 ءتۇپ شىرشا وتىرعىزىپ, ويعا العان جۇمىستارىن جالعاستىرعان. جالپى, وبلىس اۋماعىندا 135,5 مىڭ كوشەت ەگىلگەن. اباي وبلىسى اكىمى ءباسپاسوز قىزمەتىنىڭ مالىمەتىنشە, الداعى ۋاقىتتا
6 100 گەكتار جەرگە 28 ملن 700 مىڭ كوشەت وتىرعىزىلماق.
سەمەيدە «تازا قازاقستان» جوباسىن جۇزەگە اسىرۋ اياسىندا «قىزىل كىتاپ» بەتتەرىن پاراقتاۋ» ەكواكتسياسى ءوتتى. وندا تۇرعىندارعا قورعالاتىن تابيعي اۋماقتار مەن قورىقتار تانىستىرىلىپ, قورشاعان ورتانى قورعاۋ باعىتىنداعى وڭ باستامالار تۋرالى دارىستەر ۇيىمداستىرىلدى.
جالپىۇلتتىق ەكولوگيالىق اكتسيا تۋريزم سالاسىنىڭ دامۋىنا دا ءبىرشاما جول اشىپ كەلە جاتقانىن ايتۋىمىز كەرەك. وبلىس بويىنشا تۇرعىندار مەن مەيماندار كوپ باراتىن 239 ساياباق پەن وبلىستاعى جەرگىلىكتى ماڭىزى بار 175 ەسكەرتكىشتىڭ اۋماعىن تازارتۋ جوسپارلى تۇردە ىسكە اسىرىلىپ كەلەدى.
بۇگىنگى كۇنى اكتسيا مەكتەپتەر مەن بالاباقشالاردى قوسا العاندا 938 الەۋمەتتىك نىساندى, سونداي-اق 2 120 وندىرىستىك جانە كاسىپكەرلىك نىساندى قامتىعان. بۇل ءىس-شارا جىل بويى جالعاسىن تاۋىپ, وبلىس حالقىنىڭ بەلسەندىلىگى ارقاسىندا ايماقتىڭ اجارىن كىرگىزۋ, كوشەلەردى كوركەيتۋ, الاڭداردى اباتتاندىرۋ ءىسىنىڭ ىلگەرىلەيتىنىنە سەنىم كامىل.
اباي وبلىسى
