فوتو: akorda.kz
وزبەكستان پرەزيدەنتى شاۆكات ميرزيوەۆ ءوزىنىڭ قۇتتىقتاۋىندا ەكى ەل باسشىلارىنىڭ ساياسي ەرىك-جىگەرى مەن ورتاق ءىس-ارەكەتىنىڭ ارقاسىندا حالىقتارىمىز اراسىنداعى عاسىرلار بويى جالعاسىپ كەلە جاتقان دوستىق, ىنتىماقتاستىق جانە تاتۋ كورشىلىك قاتىناستار ستراتەگيالىق سەرىكتەستىك پەن وداقتاستىق دەڭگەيىنە كوتەرىلگەنىن اتاپ وتكەن. سونداي-اق قاسىم-جومارت توقاەۆتىڭ جاۋاپتى مەملەكەتتىك قىزمەتىنە تابىس, ال قازاقستان حالقىنا باق-بەرەكە تىلەگەن.
قىرعىزستان پرەزيدەنتى سادىر جاپاروۆ ادامزاتتى مەيىرىمدىلىككە ۇندەيتىن وسىناۋ قاسيەتتى كۇندە دوستاس قازاقستان حالقىنىڭ بارلىق ارمان-نيەتى ورىندالۋىنا تىلەكتەستىك بىلدىرەدى.
ء«بىزدىڭ ەلدەرىمىز اراسىندا قالىپتاسقان تىعىز ءارى دوستىق قارىم-قاتىناس باۋىرلاس حالىقتارىمىزدىڭ يگىلىگى ءۇشىن الداعى ۋاقىتتا دا نىعايا تۇسەتىنىنە سەنىمدىمىن», دەپ جازىلعان جەدەلحاتتا.
تاجىكستان پرەزيدەنتى ەمومالي راحمون قاسىم-جومارت توقاەۆقا دەنساۋلىق, زور باقىت, اسا جاۋاپتى قىزمەتىنە تابىس, ال قازاقستان حالقىنا بەيبىتشىلىك پەن تۇراقتىلىق, باق-بەرەكە تىلەگەن.
«باۋىرلاس حالىقتارىمىزدى ورتاق مادەني-رۋحاني قۇندىلىقتاردان, سونىڭ ىشىندە بۇكىل مۇسىلمان ۇمبەتى ءۇشىن قاسيەتتى سانالاتىن قۇربان ايت مەرەكەسىنەن باستاۋ الاتىن بەرىك دوستىق قاتىناستار مەن ءوزارا تىلەۋلەستىك بىرىكتىرەدى», دەپ جازعان تاجىكستان پرەزيدەنتى.
تۇرىكمەنستان پرەزيدەنتى سەردار بەردىمۇحامەدوۆ ءوز قۇتتىقتاۋىندا تاريحي تامىرى مىڭجىلدىقتاردان باستالاتىن, ادامزاتتىڭ رۋحاني قۇندىلىقتارىن پاش ەتەتىن قاسيەتتى مەيرام بارشا مۇسىلمان ۇمبەتىنىڭ ءوزارا تۇسىنىستىگى مەن سەنىمىنىڭ نىعايۋىنا ىقپال ەتەتىنىن اتاپ وتكەن.
سونىمەن قاتار قۇربان ايت مەيرامىنا وراي وزدەرىنىڭ ىزگى تىلەكتەرىن ءباا پرەزيدەنتى شەيح مۇحاممەد بەن زايد ءال ناحايان, مىسىر پرەزيدەنتى ابدەل فاتتاح ءاس-سيسي, يوردانيا كورولى II ابداللا, ماروككو كورولى VI مۇحاممەد, كۋۆەيت ءامىرى شەيح ميشاال ءال-احماد ءال-دجابەر اس-ساباح, ومان سۇلتانى حايسام بەن تاريق, باحرەين كورولى حاماد بەن يسا ءال حاليفا, پالەستينا پرەزيدەنتى ماحمۋد ابباس, ءباا ۆيتسە-پرەزيدەنتى, پرەمەر-ءمينيسترى, دۋباي ءامىرشىسى شەيح مۇحاممەد بەن راشيد ءال ماكتۋم, ءباا ۆيتسە-پرەزيدەنتى, پرەمەر-ءمينيستردىڭ ورىنباسارى شەيح مانسۋر بەن زايد ءال ناحايان, ەكونوميكالىق ىنتىماقتاستىق ۇيىمىنىڭ باس حاتشىسى حۋسراۆ نوزيري, يسلام ىنتىماقتاستىعى ۇيىمىنىڭ باس حاتشىسى حيسسەين براحيم تاحا جانە تاعى باسقالار جولدادى.
قازاقستان پرەزيدەنتىنىڭ اتىنا قۇتتىقتاۋ حاتتارى مەن جەدەلحاتتار ءالى دە كەلىپ ءتۇسىپ جاتىر.
