ءبىر ءسات سۋرەتكە زەر سالىڭىز. فوتودا نۇرتاس اتامىزدىڭ قازاق كسر مينيسترلەر كەڭەسىنىڭ توراعاسى كەزى. قاسىندا اتاقتى عالىم, اكادەميك قانىش ساتباەۆ. بەلگىلى جۋرناليست, وڭداسىنوۆتانۋشى گۇلسىم ورازالىقىزىنىڭ ايتۋىنشا, مۇندا ەكى الىپتىڭ الماتىداعى قازاقستان عىلىم اكادەمياسى عيماراتىن سالاتىن ورىندى ارحيتەكتور, قۇرىلىسشىلارمەن تالقىلاپ تۇرعان ءساتى بەينەلەنگەن.
نۇرتاس وڭداسىنوۆ – ەل ۇكىمەتىن وتە قيىن جىلدارى باسقاردى. سول قيىندىققا قاراماستان كوپتەگەن جاڭاشىل ىسكە باستاماشى بولدى. قايراتكەردىڭ تىكەلەي قولداۋىمەن قازاقستان عىلىم اكادەمياسى قۇرىلدى. سوعىس بولىپ جاتقان اۋىر كەزەڭدە عىلىم اكادەمياسىنىڭ جاڭا عيماراتىن سالۋعا قارجى ءبولدى. ارداقتى ازامات اكادەميا عيماراتىنىڭ ىرگەتاسى قالانعاندا ىرىمداپ, «قازاق عىلىمى كۇمىستەي تازا بولسىن» دەپ كۇمىس تيىن شاشىپتى دەسەدى.
بيىل ۇلتتىق عىلىم اكادەمياسىنىڭ العاشقى پرەزيدەنتى ق.ساتباەۆتىڭ تۋعانىنا دا 125 جىل تولدى. سوعان وراي 12 ساۋىردە ەلورداداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە حالىقارالىق عىلىمي كونفەرەنتسيا ءوتتى. سوندا پارلامەنت سەناتىنىڭ دەپۋتاتى, حالىقارالىق ق.ساتباەۆ قورى قامقورشىلىق كەڭەسىنىڭ توراعاسى التىنبەك نۇح ۇلى كورنەكتى عالىمدى جەزقازعاننان عىلىمعا اكەلگەن, سول جىلدارداعى ۇكىمەت باسشىسى نۇرتاس وڭداسىنوۆ دەپ, ول كىسىنىڭ ەڭبەگىنە جوعارى باعا بەردى. شىنىندا, ءبىرتۋار تۇلعا ق.ساتباەۆتىڭ گازەتكە شىققان ماقالاسىن وقىپ, عالىمنىڭ تەرەڭ ويى مەن ءسوزىن ۇناتىپ, ونى ماسكەۋگە شاقىرادى. كەزدەسىپ سويلەسكەننەن كەيىن كسرو عىلىم اكادەمياسىنىڭ پرەزيدەنتى ۆ.ل.كوماروۆقا الىپ بارىپ: «قازاقتىڭ عىلىم اكادەمياسىنىڭ بولاشاق پرەزيدەنتى بولۋعا لايىق جىگىت», دەپ تانىستىرعان ەكەن. بۇل – ەل ەرتەڭىن ويلاعان قايراتكەردىڭ ەلەۋلى قاسيەتى.
