سونىڭ ءبىرى – گۇلباحار مامبەتكارىموۆا. شىندىعىن ايتقاندا, ونىڭ كىندىك قانى اتىراۋدا ەمەس, بەسقالادا تامعان. ال مۇنايلى شاھارعا 2014 جىلى كوشىپ كەلگەن. سودان بەرى №7 قالالىق ەمحانادا جۇمىس ىستەيدى.
«اتا-ەنەم اتاجۇرتىنا ورالۋدى ويلاستىرىپ, جاڭا قونىس رەتىندە اتىراۋدى تاڭدادى. ءبىز دە بىرگە كوشىپ كەلدىك. ءوزىم 2002 جىلى تاشكەنت پەدياتريا ينستيتۋتىنىڭ نوكىستەگى فيليالىن بىتىرگەن ەدىم. بۇل شاھارعا كەلگەن سوڭ جۇمىس ىزدەپ, وسى ەمحانا باسشىسىنا جولىقتىم. سول كەزدەگى ديرەكتور عازيز ەسقالي اعامىز باستاعان ۇجىم تۋىسقانىنداي باۋىرعا تارتتى», دەيدى گ.مامبەتكارىموۆا.
ول بالا كۇنىنەن دارىگەر بولۋدى ماقسات ەتىپتى. ويتكەنى ونىڭ اكە-شەشەسى دە, اعا-اپكەلەرى, جەڭگەسى مەن جەزدەسى دە وسى سالانى تاڭداعان. ولاردىڭ جولىن بالالارى جالعاستىرىپ كەلەدى. وسىنداي ۇلكەن اۋلەتتىڭ وكىلدەرى باس قوسقاندا, اڭگىمە تيەگى مەديتسيناعا, ادامنىڭ دەنساۋلىعى, دياگنوستيكا مەن ەمدەۋ تاسىلدەرىنە ويىسادى. ءبىر سوزبەن ايتقاندا, وتباسىلىق شاعىن كونفەرەنتسيا دەۋگە بولادى.
«بولاشاقتا مەديتسينا سالاسىن تاڭدايتىن بولعاندىقتان, مەكتەپتە بيولوگيا, حيميا پاندەرىنە كوڭىل اۋداردىم. دارىگەر بولعانىما وكىنبەيمىن. ويتكەنى بالا كەزدەن اكە-شەشەمىزدىڭ تۇرعىنداردىڭ دەنساۋلىعى ءۇشىن ايانباي ەڭبەك ەتكەنىن كورىپ ءوستىم. دارىگەرلىك ءبىزدىڭ وتباسىلىق كاسىبىمىزگە اينالدى», دەيدى گ.مامبەتكارىموۆا.
ەمحانادان گۇلباحار ابدىكارىمقىزىنا ءبىر ەمەس, ەكى ۋچاسكە بولىنگەن. ونىڭ ءبىرى مەكەنجاي بويىنشا اۋماقتىق بولسا, ەكىنشىسى قوسىمشا رەتىندە بەرىلگەن. وعان س.وتەباەۆ اتىنداعى اتىراۋ مۇناي جانە گاز ۋنيۆەرسيتەتى ستۋدەنتتەرىنىڭ دەنساۋلىعىن تەكسەرۋ دە جۇكتەلگەن. بىراق جۇمىستىڭ كوپتىگىنەن باس تارتقان ەمەس. ويتكەنى وزىمەن بىرگە جۇمىس ىستەيتىن مەدبيكەلەر گۇلنۇر عالىموۆا, ءاسيا قابدولوۆا جانە ءساليما نىعمەتپەن بىرگە بارىنە ۇلگەرەدى. ءبارى دە ءبىر-ءبىرىن جاقسى تۇسىنەدى. تۇرعىنداردىڭ تەلەفون قوڭىراۋىنا كەزەكپەن جاۋاپ بەرەدى. اق جەلەڭدىلەردىڭ قىزمەتىنە تۇرعىندار ۇدايى ريزاشىلىعىن ءبىلدىرىپ وتىرادى.
«مەن اتىراۋ قالاسىنىڭ «اقدەپو» دەپ اتالاتىن بولىگىندە تۇرامىن. جاس ۇلعايعان سوڭ دارىگەرگە ءجيى قارالۋعا تۋرا كەلەدى. دارىگەر مەن مەدبيكەلەردىڭ كەڭەسىن ۇدايى الامىن. ولار ءبىزدى جىلىشىرايمەن قابىلدايدى. سىپايى سويلەسەدى. داۋىس كوتەرىپ, قاباق شىتقانىن كورمەدىك. دياگنوزدى ءدال قويىپ, تەز ەمدەۋگە تىراسادى. ءۇش جىل بۇرىن كوروناۆيرۋس ينفەكتسياسىمەن اۋىردىم. اۋرۋحانالاردا ورىن بولماعاندىقتان, ۇيدە ەمدەلدىم. سول كەزدە گۇلباحار مامبەتكارىموۆا كۇن سايىن كەلىپ, اۋرۋدىڭ ديناميكاسىن باقىلاپ وتىردى. ونىڭ ەم-شاراسىنان كەيىن سىرقاتىمنان تەز ايىقتىم. قازىر وتباسىمىزبەن وسى دارىگەرگە قارالامىز», دەيدى 65 جاستاعى جۇلدىز اپاي.
جاقىندا گۇلباحار مامبەتكارىموۆا جالپى تاجىريبەلىك دارىگەرلەر اراسىندا وتكەن رەسپۋبليكالىق بايقاۋعا قاتىستى. ونىڭ وسى سالاداعى وزىندىك تاجىريبەسى, ەمدەۋ ءتاسىلى زەردەلەنىپ, «ۇزدىك وتباسىلىق دارىگەر» اتاندى.
«مەنىڭ ماقساتىم – سىرقاتىنا شيپا ىزدەپ كەلگەن پاتسيەنتتەرگە ءتيىمدى ەمدەۋ ءتاسىلىن ۇسىنۋ. بۇل بارشا دارىگەرلەردىڭ تەمىرقازىقتاي بۇلجىماس قاعيداسىنا اينالۋى كەرەك. ال جەتىستىككە جەتۋىمە قولداۋ كورسەتكەن ەمحانا مەن سالا باسشىلارىنا, بارشا ارىپتەسىمە, ءوزىمنىڭ سەنىمدى سەرىگىمە اينالعان مەدبيكەلەردىڭ جۇمىسىنا ريزاشىلىعىم شەكسىز», دەيدى گ.مامبەتكارىموۆا.
اتىراۋ وبلىسى
