روبوت-ساۋساق ادام ساۋساعىنا ۇقسايدى ءارى قوزعالادى. عالىمدار دەنەنىڭ تاۋەلسىز بولىكتەرى ميدىڭ قوزعالىستارىنا قالاي جاۋاپ بەرەتىنىن انىقتاعىسى كەلگەن. كەمبريدج عالىمدارى بەس كۇن ىشىندە تەستىلەۋگە ءارتۇرلى دەموگرافيالىق توپتاردان 3 پەن 96 جاس ارالىعىنداعى 596 ادام قاتىستىرعان. تەك تورتەۋى عانا قۇرىلعىنى پايدالانا المادى, سەبەبى قولىنا سايكەس كەلمەدى. ال قالعاندارى وڭاي يكەمدەلىپ كەتتى. زەرتتەۋ كورسەتكەندەي, ادام جاساندى ساۋساقتى كيسە, زاتتاردى وڭاي الادى, جۇمىستى تەز ىستەيدى. سەبەبى مي جاساندى اياق-قولداردى دەنەنىڭ قاراپايىم بولىكتەرى رەتىندە قابىلدايدى. بولاشاقتا بۇل دۇنيە ساتىلىمعا شىقسا, تاڭعالماڭىز.
كەرمەگە كەرەمەت تارتىلادى
گيننەستىڭ رەكوردتار كىتابىنا ەنگەن تاعى ءبىر وتانداسىمىز تۋرالى ءسوز قوزعاماقپىز. ول – شاحتينسك قالاسىنىڭ تۇرعىنى رۋسلان فاتاحوۆ. كەرمەگە تارتىلۋدان بەس جاڭا رەكورد ورناتىپ, الەمدى تاڭعالدىرعان.
رۋسلان العاشىندا گرەك-ريم كۇرەسىن جاقسى كورگەن. 16 جاسىندا ستريتليفتينگپەن اينالىسىپ باستاعان. سودان گيننەستىڭ رەكوردتار كىتابىنا «قوسىمشا سالماقپەن تارتىلۋ» اتالىمىنا ءوتىنىم بەرگەن. وسى اتالىمداعى بارلىق جەتى رەكوردتى جاڭارتامىن دەپ ماقسات قويعان. قاجىرلى جىگىت قالاۋىنا جەتكەن. «سپورت – مەنىڭ ءومىر سالتىم. جەڭىسكە جەتكەندى, ءبىرىنشى بولعاندى جاقسى كورەمىن. ستريتليفتينگ – ءوز-وزىڭمەن كۇرەسۋ. باسىندا ارتىق سالماقپەن كوتەرىلە المادىم, بىراق اۋىر جاتتىعۋلار ءوز ناتيجەسىن بەردى. ءتىپتى دەنە سالماعىما +32 كيلو كەرمەدە تارتىلۋدا الەم چەمپيونى اتاندىم. چەمپيونات كيەۆتە ءوتتى», دەدى رۋسلان.
سەرۋەندەپ ءجۇرىپ, تيراننوزاۆر تاپقان
دالا كەزىپ ءجۇرىپ, قۇندى زات تاۋىپ الاتىندار تۋرالى ءجيى ەستيمىز. ال مىنا وتباسى سەرۋەندەپ ءجۇرىپ, تيراننوزاۆردىڭ سۇيەكتەرىن تاۋىپ العان.
بۇل وقيعا بىلاي بولعان دەسەدى. 45 جاستاعى سەم فيشەر ەكى ۇلى مەن جيەنىن 2022 جىلدىڭ شىلدەسىندە سولتۇستىك داكوتاداعى بادلەندس ۇلتتىق ساياباعىنا شاعىن سەرۋەنگە اپارعان. سەرۋەندەپ ءجۇرىپ, 12 جاسار دجەسسي, توعىز جاسار ليام جانە 11 جاسار كەيدەن ءبىر قىزىققا تاپ بولادى. ءبىر اعاراڭداعان ۇلكەن دۇنيەنىڭ ۇشىن كورىپ, قازا باستايدى. سويتسە, ول تيراننوزاۆردىڭ سۇيەكتەرى بولىپ شىققان. ۇلدار قۇندى نارسە تاپقانىن تۇسىنگەننەن كەيىن بىردەن اكەسىنە حابارلايدى. سولاي عاسىرلاردى ەڭسەرگەن سۇيەكتەر مۇراجايعا تاپسىرىلىپ, كورەرمەن كوزايىمىنا اينالعان.
