كومپانيا باسشىسى تالعات ىسقاقوۆتىڭ ايتۋىنشا, «بال تەكستيل» كىلەم جانە كىلەم بۇيىمدارىن شىعاراتىن ەلىمىزدەگى تۇڭعىش فابريكا بولسا, ورتالىق ازيادا دا ەڭ ءىرى كىلەم توقۋ كاسىپورىندارىنىڭ بىرىنە كىرەدى. ءوندىرىس ورنىنىڭ تاريحىنا توقتالساق, 2013 جىلى «يندۋستريالاندىرۋ كارتاسى» اياسىندا شىمكەنتتە ورنالاسقان «وڭتۇستىك» ارنايى ەكونوميكالىق ايماعىنان اشىلدى. ءوز كەزەگىندە ارنايى ەكونوميكالىق ايماقتىڭ قۇرىلۋى ەلىمىزدە توقىما ونەركاسىبىن دامىتۋعا ارنالعان بولاتىن. بۇگىنگى تاڭدا توقىما فابريكالارى شوعىرلانعان بۇل ايماقتا كاسىپكەرلەرگە مەملەكەت تاراپىنان بار جاعداي جاسالعان. ماسەلەن, يمپورتتىق شيكىزاتقا سالىق پەن كەدەندىك باج سالىعى بويىنشا جەڭىلدىكتەر قاراستىرىلعان. بۇدان بولەك ينجەنەرلىك-كوممۋنيكاتسيالىق ينفراقۇرىلىمدار كاسىپورىن الاڭىنا دەيىن تەگىن تارتىلادى. مىنە, وسىنداي قولداۋدىڭ ناتيجەسىندە, كىلەم بۇيىمدارىن شىعاراتىن كاسىپورىن قىسقا مەرزىمدە ءوندىرىستى العا قويىپ, كوپتەگەن شەتەلدىك ارىپتەستەرىمەن سەرىكتەستىك ورناتۋعا مۇمكىندىك الدى.
ء«وزىم جاستايىمنان كاسىپكەر بولسام دەپ ارماندايتىنمىن. جاي الىپ-ساتۋمەن ەمەس, ناقتى ءبىر ەلگە پايداسىن تيگىزەتىن زات شىعارسام دەگەن ماقساتىم بولدى. سول يدەيامنان ومىرگە وسى «بال تەكستيل» كومپانياسى كەلدى. قازىر كىلەم توقۋ فابريكاسى مامانداندىرىلعان ۇلگىدەگى وتاندىق ءوندىرىستى دامىتۋعا ۇلكەن ۇلەس قوسىپ جاتىر. نەلىكتەن كىلەم بۇيىمدارى ءوندىرىسىنىڭ بيزنەسىنە توقتالدىم دەگەن ساۋالعا جاۋاپ بەرسەم, باسىندا مەن ساۋدامەن اينالىستىم. سىرتتان كىلەم بۇيىمدارىن اكەلىپ ساتتىم. سوندا تۇتىنۋشىلاردىڭ ادەمى قالى كىلەمدەرگە سۇرانىسى جوعارى ەكەنىن بايقادىم. شىمكەنت قالاسىندا ارنايى ەكونوميكالىق ايماقتىڭ اشىلۋى كوپتەن بەرى ويىمدا جۇرگەن جوسپارلارىمدى جۇزەگە اسىرۋدىڭ كەرەمەت ءساتى بولدى. ءىرى كاسىپورىن قۇرۋ ءۇشىن دەمەۋ بولاتىن ينۆەستيتسيالىق قارجى قاجەت ەكەنى بەلگىلى. وسى ورايدا, تابىستى كەلىسسوزدەردىڭ ناتيجەسىندە, مەنىمەن سەرىكتەس بولۋعا ۋاعدالاسقان ينۆەستورلار تابىلىپ, ەكى تاراپتىڭ كۇشىمەن وسى بۇگىنگى زاۋىتتىڭ ىرگەتاسى قالاندى» دەدى كاسىپورىن باسشىسى ت.ىسقاقوۆ.
ايتا كەتۋ كەرەك, العاشقى 8 جىل ىشىندە كومپانيا 4 كەزەڭ بويىنشا دامىدى. 2018 جىلى 3-تسەح پايدالانۋعا بەرىلسە, 2021 جىلى 4-تسەحتىڭ قۇرىلىسى اياقتالدى. وسىناۋ اۋقىمدى كەڭەيۋلەر ارقىلى بوي كوتەرگەن تسەحتاردا زاماناۋي قۇرال-جابدىقتار پايدا بولىپ, ءوندىرىس كۇشىنىڭ ارتۋىنا بايلانىستى كوپتەگەن جاڭا جۇمىس ورىندارى اشىلدى.
كاسىپورىن قۇرۋ دا وڭاي ەمەس. سوندىقتان باستاپقى كەزدە ءبىراز قيىندىقتاردىڭ بولعانىن ايتادى كومپانيا باسشىسى ت.ىسقاقوۆ. ماسەلەن, ءونىمدى وتكىزۋ ماسەلەسىندە قيىندىقتار تۋدى. سەبەبى العاشىندا ءوزىمىزدىڭ ازاماتتار وتاندىق كىلەمدى كورىپ تاڭعالعانىمەن, ونىڭ ساپاسى يمپورتتىق بالامامەن سالىستىرعاندا ءبىر مىسقال دا كەم تۇسپەيتىنىنە شامالى كۇمانمەن قاراپتى. ءاۋ باستا ىشكى نارىقتى شەتەلدىڭ كىلەمدەرى جاۋلادى. ونىڭ ىشىندە تۇرىك كىلەمدەرى بولدى. جۇرت سول يمپورتتىق تاۋارلاردى بىرازعا دەيىن ارتىق كورىپ ءجۇردى دەيدى. بىراق اتقارۋشى بيلىك ءاردايىم وتاندىق ءوندىرىستىڭ ورىستەۋىنە قولداۋ كورسەتەدى. سونىڭ ناتيجەسىندە, كاسىپورىن ىسكە قوسىلعان سوڭ تەز ارادا اياققا تۇرىپ كەتتى. ءتىپتى بۇگىنگى تاڭدا شەتەلدەن كەلەتىن ينۆەستورلار مەگاپوليستىڭ وندىرىستىك الەۋەتىمەن تانىسۋ ءۇشىن ارنايى ەكونوميكالىق ايماعىنا بارىپ, كىلەم توقۋ فابريكاسىنا سوقپاي كەتپەيدى. سونىمەن بىرگە پرەزيدەنت تاپسىرماسىنا وراي جۇزەگە اسىرىلىپ جاتقان قۋاتتى وڭىرلەر ستراتەگيالىق جوسپارىن ورىنداۋ ماقساتىندا جەرگىلىكتى ءوندىرىس ورىندارىنىڭ حال-احۋالىن زەردەلەۋ ءۇشىن ۇكىمەتتىك دەڭگەيدەگى اتقارۋشى بيلىك وكىلدەرى دە «بال تەكستيل» كىلەم توقۋ فابريكاسىنا ءجيى باس سۇعادى.
اتالعان سەرىكتەستىك اينالدىرعان ون جىلدىڭ ىشىندە-اق قازاقستانداعى جوعارى ساپالى جانە قىمبات ەمەس كىلەمدەر شىعاراتىن ءىرى وندىرۋشىگە اينالدى. وسىعان قاراپ فابريكانى شىن مانىندە ەلىمىزدەگى كىلەم ونەركاسىبىنىڭ كوشباسشىسى دەۋگە بولادى. كاسىپورىن تەك ىشكى نارىقتى تاۋارىمەن قامتاماسىز ەتىپ قانا قويماي, الەمنىڭ 10 ەلىنىڭ دە نارىعىن باعىندىردى.
كومپانيا باسشىسى «بال تەكستيلدىڭ» وندىرىستىك باعدارلاماسى ەكى باعىتتا قۇرالعانىن ايتادى. ول كىلەم جانە كىلەم بۇيىمدارىن ءوندىرۋ مەن پوليپروپيلەن جىپتەرىن شىعارۋ.
ء«بىزدىڭ كومپانيا «BCF», «Heat-Set», «Frize» ساۋدا ماركاسىمەن كىلەمدەر توقيدى, سونىمەن بىرگە پوليپروپيلەن جىپتەرىن شىعارۋدى جولعا قويدىق. وندىرىسكە قاجەتتى شيكىزات وزىمىزدە بولماعاندىقتان تىكەلەي تۇركيا, بانگلادەش, ءۇندىستان, رەسەيدەن جانە تاعى دا باسقا ەلدەردەن الدىرامىز. كىلەمدەر بەلگيانىڭ «Michel Van De Wiele» دەپ اتالاتىن جوعارى تەحنولوگيالى جابدىعىندا وندىرىلەدى. وسى كۇندە «بال تەكستيل» فابريكاسى وندىرىستىك جەلىسىنە 16 «Michel Van De Wiele» توقىما ستانوگىن ورناتتىق» دەدى ت.ىسقاقوۆ.
ال پوليپروپيلەندى سينتەتيكالىق جىپتەر Oerlikon Neumag (گەرمانيا), Allma Volkmann (فرانتسيا), SUPERBA (فرانتسيا), Ornek Makina (تۇركيا) فيرمالارىنىڭ سوڭعى ۇلگىدەگى جابدىقتارىندا يىرىلەدى.
جالپى كاسىپورىن 2015 جىلدىڭ وزىندە كىلەم وندىرۋگە, سونداي-اق پوليپروپيلەن ءجىپ شىعارۋعا ارنالعان Heat Set, BCF, Freeze سەكىلدى ستانوكتاردى ىسكە قوسقان. سول ارقىلى فابريكاداعى كىلەم توقۋ ماشينالارىنىڭ قۋاتىن تولىق پايدالانۋعا مۇمكىندىك تۋدى. كومپانيا كىلەم توقۋ ىسىنە قاجەتتى ءجىپتى دە وزدەرى وندىرەتىن بولعاندىقتان شيكىزاتقا دەگەن تاۋەلدىلىكتەن ءبىرشاما ارىلدى. بۇل ءوز كەزەگىندە وندىرىلەتىن كىلەم بۇيىمدارىنىڭ اسسورتيمەنتىن كەڭەيتۋگە, ءونىمنىڭ وزىندىك قۇنىن تومەندەتۋگە جول اشتى.
سەرىكتەستىك باسشىسىنىڭ مالىمدەۋىنشە, كىلەم جانە كىلەم بۇيىمدارىنىڭ وندىرىستىك قۋاتى جىلىنا 7 ميلليون شارشى مەتردەن اسادى ەكەن. ال پوليپروپيلەن جىپتەرىنىڭ وندىرىستىك قۋاتى جىلىنا 4 مىڭ توننانى قۇرايدى.
ون جىلدان استام ۋاقىت ىشىندە «بال تەكستيل» كومپانياسى تۇتىنۋشىلار تاراپىنان ۇلكەن سەنىمگە يە بولۋىمەن قاتار وندىرىستىك سالادا دا قوماقتى تابىستارعا قول جەتكىزدى. ەندەشە, سول جەتىستىكتەردى قىسقاشا سانامالاپ شىقساق, ماسەلەن, 2013 جىلى سەرىكتەستىك ەلىمىزدىڭ ەڭ ۇساق كاسىپورىندارىنىڭ «توپ 20» قاتارىنا كىردى. 2014 جىلى وتاندىق تاۋار وندىرۋشىلەر اراسىندا وتكىزىلگەن «التىن ساپا» بايقاۋىندا «بال تەكستيل» جشس ونىمدەرى «حالىقتىڭ ۇزدىك تۇتىنۋ تاۋارى» اتالىمى بويىنشا جەڭىمپاز اتاندى. 2015 جىلى ءبىز ايماقتاعى ورتا بيزنەس سۋبەكتىلەرى اراسىندا «ۇزدىك سالىق تولەۋشى» دەگەن نوميناتسيانى جەڭىپ الدى. 2016 جىلى شۆەيتساريانىڭ جەنەۆا قالاسىندا وتكەن حالىقارالىق كونۆەنتسيادا «ۇزدىك ساپا» اتالىمى بويىنشا «التىن جۇلدىز» - ISAQ سىيلىعىنا يە بولدى. 2017 جىلدىڭ ماۋسىم ايىندا «قازاقستاننىڭ ۇزدىك تاۋارى» ايماقتىق بايقاۋىندا «ۇزدىك تۇتىنۋ تاۋارى» نوميناتسياسىمەن جۇلدەلى I ورىن يەلەندى. 2018 جىلى «التىن Cاپا» بايقاۋىندا «حالىق تۇتىناتىن ۇزدىك تاۋار» نوميناتسياسى بۇيىرىپ, ارنايى سىيلىقپەن ماراپاتتالدى.
«كەڭ اسسورتيمەنت پەن قولجەتىمدى باعالاردىڭ ناتيجەسىندە, ءبىزدىڭ كىلەمدەرىمىز تمد ەلدەرىندە عانا ەمەس ەۋروپا نارىعىندا دا ۇلكەن سۇرانىسقا يە بولىپ جاتىر. ماسەلەن, ءبىز الەمدەگى ەڭ ءىرى تۇرمىستىق تاۋارلاردى ساتاتىن ساۋدا جەلىسى IKEA-عا ءونىم جەتكىزۋشى رەتىندە قازاقستان اتىنان ەندىك. ءبىزدىڭ ونىمدەر ۇلتتىق ستاندارتتارعا, ست-KZ تالاپتارىنا, سونىمەن بىرگە حالىقارالىق ISO 9001-2009 ستاندارتتارىنا تولىعىمەن سايكەس كەلەدى. فابريكا جۇمىسشىلارىنا دا بار جاعداي قاراستىرىلعان. مۇمكىندىگىنشە الەۋمەتتىك ماسەلەلەرىن شەشۋگە تىرىسامىز. سول ءۇشىن جۇمىستان ارنايى اۆتوبۋس بولگىزدىك. ول كۇن سايىن جۇمىسشىلاردى ەڭبەك كەستەسى بويىنشا فابريكاعا اكەلىپ, قايتا ۇيلەرىنە تاسىمالدايدى. بۇدان بولەك, كاسىپورىندا الەۋمەتتىك تالوندار قاراستىرىلعان. ونىمەن قالاداعى ءىرى ساۋدا دۇكەندەرى جەلىسىنەن ۇيگە قاجەتتى ازىق-ت ۇلىك تاۋارلارىن الۋعا بولادى. سونداي-اق جاڭادان جۇمىسقا قابىلداناتىن ازاماتتارعا تاجىريبەلىك سىناق مەرزىمىندە قوسىمشا اقى تولەنەدى. ەگەر تالابى جاقسى بولىپ, ءارى قاراي بىلىكتىلىگىن ارتتىرعىسى كەلسە, شەتەلدە تەگىن ءبىلىم الۋعا مۇمكىندىك بار. ەڭ باستىسى, كاسىپورىندا جۇمىسشىلار ۇلكەن ۇجىم بولسا دا وزدەرىن ءبىر ءۇيدىڭ بالالارىنداي سەزىنەدى. ەڭبەككەرلەردىڭ ءبىر-بىرىمەن سىيلاستىعى, جۇمىسشى مەن باسشىلىقتىڭ اراسىندا قۇرمەت ءبىز ءۇشىن وتە ماڭىزدى. سوندىقتان دا بىرلىگى بەكەم, تاتۋلىعى توننىڭ ىشكى باۋىنداي ۇجىم قۇرۋ ءبىزدىڭ باستى ماقساتىمىز بولىپ قالا بەرمەك», دەدى ت.ىسقاقوۆ.
