تازالىق نەگىزى – ءتارتىپ

«Amanat» پارتياسى جالپاق جۇرتقا ورتاق جاقسى ىسكە مۇرىندىق بولىپ, «تازا قازاقستان» road-ەستافەتاسىن باستاعان بولاتىن. وسى اپتادا پارتيانىڭ جۇزدەگەن بەلسەندىلەرى, «جاستار رۋحى» جاستار قاناتىنىڭ ەرىكتىلەرى, جالپى جۇرتشىلىق استانا-الماتى تاسجولىنىڭ قوس قاپتالىن تازالاپ, ايناداي ەتىپ جارقىراتىپ قويدى. ىلكىمدى ءىس-شاراعا «Amanat» پارتياسىنىڭ اتقارۋشى حاتشىسى داۋلەت كارىبەك, ەكولوگيا جانە تابيعي رەسۋرستار ءمينيسترى ەرلان نىسانباەۆ, قازاقستاننىڭ قايتالاما شيكىزاتتى قايتا وڭدەۋشىلەر قاۋىمداستىعىنىڭ باسقارما توراعاسى باتىربەك اۋباكىروۆ جانە ءماجىلىس دەپۋتاتتارى قاتىستى. ءبىر ايتا كەتەرلىگى, ەستافەتا «جاسىل دامۋ», «قازاۆتوجول» ۇق» اكتسيونەرلىك قوعامدارىنىڭ قولداۋىمەن وتكىزىلدى. اكتسيا بارىسىندا كۇرە جولدىڭ قوس قاپتالى, جانامالاي ورنالاسقان اۆتو­تۇراقتار مەن كەمپينگتەردىڭ ماڭايى كۇل-قوقىستان تازالاندى. جۇمىس بارىسىندا اۋەدەن بارلاۋ دا جۇرگىزىلدى. بارلاۋ بارىسىندا كوزدەن تاسا قالعان زاڭسىز قوقىس ورىندارى دا انىقتالدى. جينالعان قوقىس قاپتارعا سالىنىپ, كولىككە ارتىلىپ, زاڭدى پوليگوندارعا جەتكىزىلدى.

–تۋعان جەردىڭ توپىراعى, ونىڭ تازالىعى, ساۋلەتى مەن سالتاناتى ەڭ الدىمەن ەل ءۇشىن كەرەك. مەملەكەت باسشىسى قاسىم-جومارت توقاەۆ بۇل ماسەلەنى جالپىۇلتتىق دەڭگەيگە كوتەرىپ وتىر, – دەدى «Amanat» پارتياسىنىڭ اتقارۋشى حاتشىسى داۋلەت كارىبەك, – تازالىق پەن ءتارتىپ ءومىر ءسۇرۋ قاعيداسىنا اينالۋى كەرەك. بۇل جۇمىس بارشا قوعامدى بىرىكتىرەدى. زامانداستارىمىزدىڭ بو­يىندا ەكولوگيالىق مادەنيەت پەن سانانى قالىپتاستىرادى.

ايتسا ايتقانداي, ەل مەن جەردىڭ جاناشىرلارى تازالىق جۇمىستارىن جۇرگىزىپ قانا قويماي, جول بويىنداعى ەلدى مەكەندەردىڭ تۇرعىندارىمەن جۇزدەسۋ بارىسىندا وسى ءىستىڭ ءمانى مەن ماڭىزىن ايتىپ, ادامداردىڭ قاي كەزدە دە تابيعاتقا جاناشىرلىقپەن قاراۋى كەرەك ەكەندىگىن ەسكە سالۋدى دا ۇمىتقان جوق. وكپەك جولاۋشىلار كۇرە جولدىڭ قوس قاپتالىنداعى قايناعان جۇمىستى كورىپ, تازالىقتى وزدەرى دە ساقتاۋ كەرەك ەكەندىگىن تۇيسىنەتىن بولادى.

كوپشىلىك قاۋىمداسا كىرىسسە الىنباس اسۋ بار ما؟ جاقسى ىسكە جۇمىلعان جەتى كۇننىڭ ىشىندە پارتيانىڭ بەلسەندىلەرى مەن «جاستار رۋحى» جاستار قاناتىنىڭ ەرىكتىلەرى اقمولا, قاراعاندا, جامبىل جانە الماتى وبلىستارى ارقىلى وتەتىن, ۇزىندىعى 1200 شاقىرىمنان اساتىن تاس جولدىڭ قوس قاپتالىن مۇنتازداي ەتىپ تازالاپ شىقپاق. ءبىر ايتا كەتەرلىگى, ىلكىمدى ءىس-شاراعا «1 كوماندا – 1 وبلىس» قاعيداتى بويىنشا قۇرىلعان كوماندالار قاتىسادى. ونىڭ قۇرامىنا ءماجىلىس جانە ءارتۇرلى دەڭگەيدەگى ءماسليحات دەپۋتاتتارى كىرەدى. ىرگەلەس ەلدى مەكەندەردىڭ جالىندى جاستارىمەن جۇزدەسىپ, ازاماتتارمەن قوعامدىق قابىلداۋ دا ۇيىمداستىرىلماق. ەستافەتانىڭ جابىلۋ سالتاناتى قوناەۆ قالاسىندا وتكىزىلمەك.

وسى ارادا «Amanat» پارتياسى پرەزيدەنتتىڭ «تازا قازاقستان» جالپى­ۇلتتىق باستاماسى اياسىندا ءار اپتا سايىن وتكىزىلەتىن «تازا بەيسەنبى» ەكولوگيالىق اكتسياسىن باستاعان بولاتىن. اۋقىمدى جۇمىسقا كىرىسەردىڭ الدىندا ەلىمىزدەگى جول بويىنداعى اۋماقتاردان, ونەركاسىپتىك ايماقتاردان, باسقا دا كوپتەگەن جەردەن تازارتىلۋعا ءتيىستى 475 جەر تەلىمى انىقتالدى. ءسوز اراسىندا كوكتەمگى قىزىل سۋدىڭ بەتى قايتقاننان كەيىن پارتيانىڭ ءتورت مىڭعا جۋىق بەلسەندىسى مەن «جاستار رۋحى» جاستار قاناتىنىڭ ەرىكتىلەرى تاسقىننىڭ تاقسىرەتىن تارتقان تۇرعىنداردىڭ باسپاناسىن رەتكە كەلتىرۋگە قولۇشىن بەرگەندىگىن ايتا كەتۋىمىز كەرەك. ەلىمىزدىڭ بارلىق وڭىرىندەگى ساياباقتاردى, اۋلالاردى تازارتىپ, تاريحي-مادەني ەسكەرت­كىش­تەر­دىڭ ماڭايى رەتكە كەلتىرىلدى.

جالپى, ەلدى ەلەڭدەتكەن ەكولوگيالىق ماسەلە­لەردى شەشۋ پارتيانىڭ ساي­لاۋالدى باعدارلاماسىندا قامتىلعان ما­ڭىزدى باسىمدىقتىڭ ءبىرى. ۋادە ۇدەسىنەن شىعۋدى مۇرات تۇتقان پارتيا مۇشەلەرىنىڭ قاجىرلى قايراتىنىڭ ارقاسىندا 302,7 ميلليون ءتۇپ اعاش ەگىلدى. بىرەر جىلدان سوڭ وسى ءبىر جان سۇيسىنتەر جاقسى ءىستىڭ ناتيجەسى رەتىندە يت تۇمسىعى وتپەيتىن قالىڭ ورمان قاۋلاي ءوسىپ, جارقىراي جايناپ تۇرسا, تازالىق پەن ءتارتىپتى كوكسەگەن ەل ىقىلاسىنىڭ جەمىسى دەپ سۇيسىنۋگە بولادى. قىرىققا جۋىق ءىرى ونەركاسىپ ورىندارىندا اۋا تازالىعىن باقىلايتىن اۆتوماتتاندىرىلعان جۇيە ورناتىلدى. بۇل دا ەلدى ەلەڭدەتىپ وتىر­عان ماڭىزدى ماسەلەنىڭ ءبىرى. 2027 جىلعا قاراي پارتيانىڭ سايلاۋالدى باعدارلاماسى اياسىندا تۇرمىستىق قاتتى قالدىقتاردى قايتا وڭدەۋ مەن كادەگە جاراتۋ ۇلەسى 36 پايىزعا جەتپەك. جايىق وزەنىنىڭ جاعاسىندا ەكوجۇيە قالپىنا كەلتىرىلىپ, بالقاش كولىنە تۇراقتى سۋ اعىنى قامتاماسىز ەتىلمەك. قازىر جۇمىس ىستەپ تۇرعان 169 سۋقويماسىن قايتادان جاڭعىرتىپ, جاڭادان 14 سۋقويماسىن سالۋ مەجەلەنىپ جاتىر.

يگى باستامانىڭ ارقاسىندا كوركەم تابيعاتتىڭ اي جۇزىندەگى كىرەۋكە الىنىپ, اق جاۋىننان كەيىنگى اتىراپتاي جايناي تۇسپەك. وسىنىڭ ءبارى ەل مەن جەردىڭ قامىن ويلاعان جاناشىرلىقتىڭ جاندى كورىنىسى.

اقمولا وبلىسى,

ارشالى اۋدانى