اقتوبەلىك داۋلەت ىزماعامبەت ۇلى سەگىز مۋزىكالىق اسپاپتا ەركىن وينايدى. دومبىرا, بايان, گيتارا, باراباندى ايتپاعاندا, ساكسوفون, فلەيتا سياقتى بىرقاتار ۇرمەلى اسپاپتى جانى سۇيەدى. ول گيننەستىڭ رەكوردتار كىتابىنا ەڭ كۇردەلى اسپاپ رەتىندە ەنگەن گوبويدى مەڭگەرگەن. ەجەلگى مىسىردا پايدا بولعان اسپاپتى XVII عاسىردا فرانتسيالىق شەبەرلەر قايتا جاڭعىرتقان دەسەدى. ۇندىستاندىق جىلان ارباۋشىلار ءالى كۇنگە دەيىن ءتۇرلى قويىلىمدارىندا قولدانىپ كەلەدى.
فوتوگراف كوگەرشىن
كوگەرشىندەردى اەروفوتوتۇسىرىلىم ءۇشىن قاشان ءارى قايدا پايدالاندى؟
باياعىدا حات-حابار جەتكىزۋدە كوگەرشىندەردى پايدالانعانىن بىلەمىز. بۇل سۇيكىمدى قۇستار اەروفوتوتۇسىرىلىمگە دە قولدانىلعان ەكەن. العاشقى كامەرا قۇرىلعىسىنىڭ پاتەنتىن 1908 جىلى يۋلي نويبروننەر العان. سۋرەتتەردىڭ قولايلى ساپاسىنا قاراماستان, ءبىرىنشى دۇنيەجۇزىلىك سوعىستا كوگەرشىندەردىڭ كومەگىمەن اۋە ءتۇسىرىلىمى ەشقاشان پايدالانىلماعان. ەكىنشى دۇنيەجۇزىلىك سوعىستا ءار ءتۇرلى مالىمەت بويىنشا, فوتوگراف كوگەرشىندەردى نەمىستەر, فرانتسۋزدار مەن امەريكالىقتار وسىرگەن.
كۇلكى – بيلەت
تەاترعا كىرۋگە اقشا ەمەس, كۇلكى كەرەك. بىزگە قيسىنعا كەلمەيتىندەي كورىنگەنمەن, بۇعان بارسەلونا حالقى – كۋا. سەبەبى ولاردا سپەكتاكلگە اقى تولەۋ كورەرمەندەردىڭ ك ۇلىمسىرەۋ سانىمەن جۇزەگە اسادى.
بارسەلوناداعى «Teatreneu» كومەديالىق تەاترى 2014 جىلى جاڭا تولەم جۇيەسىن ىسكە قوستى. كورەرمەندەر زالىنداعى ورىندىقتاردىڭ ارتقى جاعىندا ميميكانى تانۋ باعدارلاماسى ورناتىلعان پلانشەتتەر بەكىتىلدى. ءاربىر تىركەلگەن ك ۇلىمسىرەۋ 3 ەۋرو بولدى, ال شوۋدىڭ ماكسيمالدى قۇنى 24 ەۋروعا بەلگىلەندى. جۇيە كورەرمەندەرگە دە, كىرىسى وسكەن تەاتر اكىمشىلىگىنە دە ۇنادى.
