قاتىسۋشىلار حالىقارالىق گۋمانيتارلىق قۇقىق جانە بىتىمگەرلىكتىڭ گەندەرلىك اسپەكتىلەرىن تالقىلادى. سونداي-اق وتىرىستا قازاقستاننىڭ ورتالىق ازيا ەلدەرى اراسىندا بەيبىتشىلىكتى نىعايتۋ ىسىنە قوسقان ۇلەسى ايرىقشا اتاپ ءوتىلدى. دوڭگەلەك ۇستەل بارىسىندا قورعانىس مينيسترلىگى بىتىمگەرلىك وپەراتسيالار ورتالىعىنىڭ باسشىسى, پولكوۆنيك باۋىرجان نىعمەتۋللين ەلىمىزدىڭ اسكەري قىزمەتشىلەردى بىتىمگەرلىك جانە تىلدىك دايىنداۋ تاجىريبەسىمەن بولىسۋگە دايىن ەكەنىن جەتكىزدى.
«قازاقستان حالىقارالىق قوعامداستىقتىڭ جاۋاپتى مۇشەسى رەتىندە بۇۇ-نىڭ بىتىمگەرلىك قىزمەتىنە قاتىسا وتىرىپ, بەيبىتشىلىك پەن تۇراقتىلىقتى ساقتاۋعا ۇلەس قوسىپ كەلەدى. 2018 جىلى قازاقستان ورتالىق ازيا ەلدەرى اراسىندا العاشقى بولىپ بىتىمگەرلىك بولىمشەلەرىن بۇۇ-نىڭ ليۆانداعى ميسسياسىنا جىبەردى. ءىس-شاراعا 500-دەن استام قازاقستان ازاماتى قاتىستى. ءبىزدىڭ اسكەري قىزمەتشىلەردىڭ نەپالدا, كوت-د'يۆۋاردا جانە ماليدە بۇۇ ميسسيالارىنا قاتىسۋ تاجىريبەسى بار.
قازىر وتاندىق بىتىمگەرلەر ليۆاندا, باتىس ساحارادا, ورتالىق افريكا رەسپۋبليكاسىندا جانە كونگو دەموكراتيالىق رەسپۋبليكاسىنداعى ميسسيالاردا قىزمەت ەتىپ جاتىر. قازاقستان ءۇشىن تاريحي قادام بۇۇ-نىڭ گولان جوتالارىنداعى ميسسياسىندا بىتىمگەرلىك كونتينگەنتتى ءوز بەتىنشە ورىستەتۋ بولىپ وتىر. بۇگىندە ونداعى ميسسيا قۇرامىندا 139 قازاقستاندىق قىزمەت وتكەرىپ, قاراما-قارسى تاراپتار اراسىنداعى اتىستى توقتاتۋ رەجىمىن ساقتاۋ جونىندەگى مىندەتتەردى ورىنداپ ءجۇر. قازاقستان اسكەري قىزمەتشىلەرىنىڭ بۇۇ بىتىمگەرلىك ميسسيالارىنا قاتىسۋ گەوگرافياسىنىڭ كەڭەيۋى ەلىمىزدىڭ اسكەري جانە گۋمانيتارلىق داعدارىستاردان زارداپ شەگەتىن ادامدارعا قولداۋ كورسەتۋگە دەگەن وڭ نيەتىن ايعاقتايدى. ءبىز ورتالىق ازيا ەلدەرىنىڭ بىتىمگەرلىك الەۋەتىن كۇشەيتۋ اياسىندا بۇۇ ميسسيالارى ءۇشىن ساراپشىلاردى دايىنداۋدا جانە بىرلەسكەن باستامالاردى ىسكە اسىرۋدا كۇش-جىگەرىمىزدى بىرىكتىرە الامىز», دەدى ب.نىعمەتۋللين.
بىرىككەن ۇلتتار ۇيىمىنىڭ نيۋ-يوركتەگى باس كەڭسەسىنىڭ بىتىمگەرلىك وپەراتسيالار دەپارتامەنتىنىڭ وكىلى گەربەرت لورەت قازاقستاننىڭ بىتىمگەرلىك وپەراتسيالارعا قاتىسۋ ءۇشىن ءوز كونتينگەنتتەرىن جىبەرەتىن ەلدەرمەن ءوزارا ءىس-قيمىل جاساۋداعى قىزمەتىن وڭ باعالادى. ءارى ءىس-شارا ورتالىق ازيا وڭىرىندە ءبىلىم مەن تاجىريبە الماسۋعا, دايىندىق تۇرعىسىنان سەرىكتەستىك قارىم-قاتىناس ورناتۋعا ىقپال ەتەتىنىنە سەنىم ءبىلدىردى.
جالپى, قورعانىس مينيسترلىگىنىڭ بىتىمگەرلىك وپەراتسيالار ورتالىعىنىڭ بازاسىندا ءارتۇرلى ەلدىڭ تىڭداۋشىلارىنىڭ قاتىسۋىمەن بىرىككەن ۇلتتار ۇيىمى سەرتيفيكاتتاعان كۋرستار ۇيىمداستىرىلىپ تۇرادى. ۋنيۆەرسيتەتتەرمەن تىعىز ىنتىماقتاستىقتا حالىقارالىق گۋمانيتارلىق قۇقىقتى زەردەلەۋ, ستۋدەنتتەرگە بىتىمگەرلىك تاقىرىبىندا ءدارىس وتەدى. بۇل اسكەري قىزمەتشىلەردىڭ جاۋىنگەرلىك تاجىريبە جيناقتاۋىنا, قارۋلى كۇشتەردىڭ جاۋىنگەرلىك دايىندىعىن جەتىلدىرۋگە جانە ولاردى ودان ءارى دامىتۋ جونىندە ۇسىنىستار ازىرلەۋگە ىقپال ەتەدى. وسى ماقساتتا قوسىمشا ءبىلىم بەرۋ مەكەمەسىنىڭ ماماندارى تىڭداۋشىلاردى وقىتۋدىڭ تاسىلدەرى مەن ادىستەرىن جەتىلدىرۋ باعىتىندا ۇنەمى جۇمىسىن وزگەرتىپ تۇرادى. تاياۋدا عانا شتاب وفيتسەرلەرى ارنايى وقۋدا بولدى. وعان قازاقستاندىق وفيتسەرلەرمەن قاتار ۇلىبريتانيا, گەرمانيا جانە قىتاي قارۋلى كۇشتەرىنىڭ اسكەري قىزمەتشىلەرى – بارلىعى 17 ادام قاتىستى. كۋرسقا افريكا مەن تاياۋ شىعىس ەلدەرىندەگى بۇۇ ميسسيالارىنىڭ قۇرامىندا بىتىمگەرلىك قىزمەت وتكەرەتىن پەرسونالدى دايارلاۋدا پراكتيكالىق تاجىريبەسى بار ورتالىقتىڭ اسكەري قىزمەتشىلەرى نۇسقاۋلىق ەتتى.
«شتاب وفيتسەرلەرى جوسپارلاۋمەن, ۇيلەستىرۋمەن اينالىسادى. سونداي-اق تاپسىرمالاردىڭ ورىندالۋىن ءجىتى قاداعالايدى. ونىڭ قۇزىرەتىنە جاۋاپكەرشىلىك ايماعىنداعى جاعدايدى ناقتى ۋاقىت رەجىمىندە باقىلاۋ, وقيعالارعا تالداۋ جۇرگىزۋ كىرەدى. ءتيىستى باعىتتار نەگىزىندە ميسسيا قولباسشىلىعىنا ەسەپتەر مەن ۇسىنىستار ازىرلەيدى. مۇنداي كۋرستاردا ءبىز ءوز تاجىريبەمىزبەن ءبولىسىپ, اسكەري قىزمەتشىلەرگە بۇۇ ميسسياسى شتابىنىڭ وفيتسەرى تاپ بولاتىن جاعدايلار مەن قيىندىقتاردى ەگجەي-تەگجەي تۇسىندىرەمىز. بولاشاق بىتىمگەرلەر اعىلشىن ءتىلى, دالالىق مەديتسينا, راديوبايلانىس, شاحتالار, قولدان جاسالعان جارىلعىش قۇرىلعىلار مەن جارىلماعان سناريادتار, كۇش قولدانۋ ەرەجەلەرى, سونداي-اق حالىقارالىق جانە گۋمانيتارلىق قۇقىق نورمالارى تۋرالى بىلىمدەرىن شىڭدايدى», دەدى كۋرس جەتەكشىسى – قورعانىس مينيسترلىگى بىتىمگەرلىك وپەراتسيالار ورتالىعى بىتىمگەرلىك دايىندىق باسقارماسىنىڭ اعا وفيتسەرى, پودپولكوۆنيك ەرمەك تولەسوۆ.
سونداي-اق بۇۇ قاۋىپسىزدىك كەڭەسىنىڭ 1325 (2000) «ايەلدەر. الەم. قاۋىپسىزدىك» قارارىن ىسكە اسىرۋ بويىنشا قازاقستان گەندەرلىك تەڭدىك, ايەلدەردى قورعاۋ جانە تەڭ قۇقىق ساياساتىن ۇستانۋشى ەلدەر قاتارىندا اتالادى. وعان قازاقستاندىق اسكەري قىزمەتشى ايەلدەردىڭ بۇۇ بىتىمگەرلىك وپەراتسيالارىنا اسكەري باقىلاۋشى جانە شتاب وفيتسەرى رەتىندە قاتىسۋى دالەل بولا الادى. بۇگىندە 8 ايەل اسكەري قىزمەتشى بۇۇ-نىڭ شەتەلدەگى ميسسيالارى قۇرامىندا قىزمەت ەتەدى.
ايتا كەتەيىك, 2018 جىلى بۇۇ سەرتيفيكاتتاۋىنان وتكەن كۋرس ءتورت جىل قاتارىنان وتكىزىلىپ كەلەدى. وسى ۋاقىت ىشىندە قورعانىس مينيسترلىگىنىڭ بىتىمگەرلىك وپەراتسيالار ورتالىعى بىرىككەن ۇلتتار ۇيىمى ميسسيالارىنىڭ شتابتارىندا جۇمىس ىستەۋ ءۇشىن ەلۋگە جۋىق سەرتيفيكاتتالعان اسكەري مامان دايارلادى.
