جەزقازعان – قىزىلوردا: جول قۇرىلىسى جاندانادى

سول جىلدىڭ كۇزىندە «ەۋروپا قايتا قۇرۋ جانە دامۋ بانكى» قىزىل­وردا وبلىسىنىڭ اۋماعىنداعى ۇزىن­دىعى 219 شاقىرىم بولاتىن اۆتوجولدى رەكونسترۋكتسيادان وتكىزۋگە قاجەتتى قاراجاتتى بولۋگە كەلىسىمىن بەرگەنى جونىندە اقپارات تارادى. جالپى سمەتالىق قۇنى 106,6 ملرد تەڭگەنى قۇرايتىن جوبانىڭ قۇرىلىس-مونتاج جۇمىستارى 2022 جىلى باس­تالدى. مۇنى كورگەن حالىقتىڭ ريزا­شىلىعىندا شەك بولمادى. بىراق...

جۇمىستىڭ قىزىلوردا جاعىندا قىز-قىز قايناپ جاتقانىن كورىپ جۇرگەن جەزقازعاندىقتاردى ء«بىزدىڭ جاقتاعى جوندەۋ جۇمىستارى قاشان باستالادى ەكەن؟» دەگەن سۇراق مازالاي باستادى. الاڭداۋشىلىقتى «تەندەر وتپەي قالىپتى, جوعارى جاقتا بۇل جولدىڭ جوندەلۋىنە قارسى كۇشتەر بار كورىنەدى» دەگەن الىپقاشپا ءسوز­ ودان ءارى ۇدەتە ءتۇستى. ەل اراسى­نا تاراعان «قىزىلوردا جاعىن «ەۋروپا دامۋ بانكى» قارجىلاندىرىپ جاتىر, ال ۇلىتاۋ جاعىن «ازيا دامۋ بانكى» قارجىلاندىرۋدان باس تارتىپتى» دەگەن سۋىق ءسوز ەلدى ءارى-ءسارى كۇيگە ءتۇسىردى. ءسويتىپ جۇرگەندە, 2023 جىلدىڭ جاز مەزگىلىندە اتالعان بانك وكىلدەرى جەزقازعانعا كەلىپ, قۇنى 90 ملرد تەڭگە تۇراتىن تەندەرگە, باعا ءوسىمىن ەسكەرگەندىكتەن, ەشقانداي مەردىگەردىڭ قاتىسپاعانى سەبەپتى, قايتا تەندەر وتكىزۋ كەرەكتىگىن مالىمدەپ كەتتى. سول جىلى كۇزدە ۇلىتاۋ وبلىسىنا كەلگەن يندۋستريا جانە ينفراقۇرىلىمدىق دامۋ ءمينيسترى م.قاراباەۆ 2023 جىلدىڭ قازان ايىندا تەندەر ءوتىپ, جولدى جوندەۋگە دايارلىق جۇمىستارى قاراشا-جەلتوقسان ايلارىندا باستالاتىنىن جەتكىزدى. ۇلىتاۋلىقتار بۇل جاۋاپقا «تەندەر ەمەس, جول سالىنىپ بىتكەندەي» قۋانىپ قالدى. وكىنىشكە قاراي, كوپ كەشىكپەي تەندەردىڭ وتپەگەنى تۋرالى حابار كەلىپ جەتتى.

قاراپايىم حالىق كەيىنگى كەزدە «قىزىلوردا جاعىنداعى جۇمىس ەكى وبلىستىڭ شەكاراسىنا دەيىن جەتتى. ال ءبىزدىڭ جاق نەگە ءۇنسىز؟» دەگەن سۇراقتى بۇرىنعىدان دا ءجيى كوتەرە باستادى. ۇنجىرعاسى ءتۇسىپ كەتكەن ەلدىڭ كوكتەن ىزدەگەنى وتكەن اپتادا جەردەن تابىلدى. استانا جاقتان «جولدىڭ «جىرى» ءبىتتى, ەندى جوندەۋ باستالادى» دەگەن جاقسى جاڭالىق جەتتى. ۇلىتاۋ وبلىسى اكىمدىگىندەگى القالى جيىندا «قازاۆتوجول» ۇك» اق باسقارما توراعاسى دارحان يماناشەۆ جەزقازعان – قىزىلوردا اۆتوجولىنىڭ ۇلىتاۋ وبلىسى اۋماعىنا قاراستى بولىگىنە قاتىستى تەندەردىڭ ءساتتى وتكەنىن جاريالادى.

«شىنىندا دا, بۇرىن جاريا­لانعان تەندەرلەرگە مەردىگەرلەر قاتىس­پادى, ويتكەنى ۇسىنىلعان باعا ەش­كىمنىڭ كوڭىلىنەن شىقپادى. بۇل جولى ءبىزدىڭ تاراپىمىزدان قۇرى­لىس قاجەتتىلىگىنە 156 ملرد تەڭگە ۇسىنىل­دى. سەگىز لوت بويىنشا جاريا­لانعان تەندەرگە 11 كومپانيا قاتىستى, ولاردىڭ ەكەۋى – ءوزىمىزدىڭ كومپانيا­. ناتيجەسىندە, جالپى سوماسى 108 ملرد تەڭگە ۇسىنعان قىتايلىق 4 كوم­پانيا «جەڭىمپاز» دەپ تانىلدى. ولاردىڭ تورتەۋى دە جول قۇرىلىسىندا زور تاجىريبە جيناقتاعان كومپانيالار», دەدى دارحان سەرىك ۇلى.

د.يماناشەۆتىڭ ايتۋىنشا, وتان­دىق كومپانيالار قۇرىلىس جۇمىسىنا قوسالقى مەردىگەر رەتىندە تارتىلادى. سونداي-اق قۇرىلىسقا تولىقتاي وتاندىق ماتەريال پايدالانىلادى.

«ماسەلەنى تىكەلەي نازارىندا ۇستاپ, قايتا-قايتا ناقتىلاپ وتىرعان ەل پرەزيدەنتىنە ۇلىتاۋلىقتار اتىنان شىنايى العىسىمدى جەتكىزگىم كەلەدى. جول پايدالانۋعا بەرىلگەن كەزدەگى پايدالى جاعىن ايتپاعاننىڭ وزىندە, قۇرىلىس جۇمىستارىن جۇرگىزۋدىڭ ءوزى وبلىسىمىزدىڭ ەكونوميكالىق دامۋى­نا ءوزىنىڭ زور يگى اسەرىن تيگىزەدى», دەدى وبلىس اكىمى بەرىك ابدىعالي ۇلى.

ويتكەنى قۇرىلىسقا قاتىستى مەردىگەردىڭ ءبارى ۇلىتاۋ وبلىسىندا تىركەلەتىن بولادى, ياعني وبلىس بيۋدجەتىنە قوسىمشا قاراجات تۇسەدى. جەرگىلىكتى ماماندار, قاراپايىم جۇمىسكەرلەر تارتىلادى. جولعا قاجەتتى قيىرشىق تاس جەزقازعاننىڭ ىرگەسىنەن تاسىلادى. قانشاما تەحنيكا جۇمىلدىرىلادى, سولاردى جانار-جاعارمايمەن قامتاماسىز ەتۋ  قاجەت. ءارتۇرلى قىزمەت كورسەتۋ كوم­پا­نيا­لارىنىڭ قاجەتتىلىگى تۋىن­داي­تىن­دىقتان كاسىپكەرلىك تە دامي تۇسەدى.

سونىمەن, ءبىر ءتۇيىن تارقاتىلدى. جوسپار بويىنشا قۇرىلىس جۇمىس­تارى 2026 جىلى اياقتالۋعا ءتيىس.

ۇلىتاۋ وبلىسى