فوتو:«قازاقستاننىڭ دامۋ بانكى» اق قوعاممەن بايلانىس قىزمەتى
مەموراندۋمدارعا قدب باسقارما توراعاسى مارات ەلىباەۆ, كورەيانىڭ ەكسپورتتىق-يمپورتتىق بانكىنىڭ باسشىسى حي-سۋن يۋن جانە كورەيانىڭ K-Sure كورەيا ساۋدا-ساقتاندىرۋ كورپوراتسياسىنىڭ باسشىسى يونجين چان قول قويدى.
«بۇل قۇجاتتار ستراتەگيالىق ماڭىزدى جوبالاردى دامىتۋعا جانە ەكى ەل اراسىنداعى ەكونوميكالىق بايلانىستاردى نىعايتۋعا ىقپال ەتە وتىرىپ, قازاقستان مەن وڭتۇستىك كورەيا اراسىنداعى ىسكەرلىك ىنتىماقتاستىق ءۇشىن جاڭا مۇمكىندىكتەر اشادى. قازاقستاننىڭ دامۋ بانكى بۇل مۇمكىندىكتەردى يننوۆاتسيالىق باستامالاردى ىسكە اسىرۋ جانە قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن پايدالانۋعا ۇمتىلادى. ءبىز كورەيانىڭ ەكسپورتتىق-يمپورتتىق بانكىمەن جانە K-Sure-مەن ارىپتەستىگىمىز تۇراقتى ەكونوميكالىق وسۋگە جانە ەكونوميكانىڭ باسىم سەكتورلارىنىڭ ءوزارا ءتيىمدى دامۋىنا ىقپال ەتە وتىرىپ, ەكى ەل ءۇشىن دە ەلەۋلى پايدا اكەلەتىنىنە سەنىمدىمىز», دەپ اتاپ ءوتتى قدب باسشىسى مارات ەلىباەۆ.
كورەيانىڭ ەكسپورتتىق-يمپورتتىق بانكىمەن قول قويىلعان قۇجات ەنەرگەتيكا, مۇناي حيمياسى, وڭدەۋ ونەركاسىبى, ينفراقۇرىلىم جانە كولىك, ەكولوگيا جانە قورشاعان ورتا, بالامالى ەنەرگەتيكا, مەتاللۋرگيا جانە تاۋ-كەن ونەركاسىبى مەن ەكونوميكانىڭ باسقا دا سەكتورلارىنداعى ستراتەگيالىق ماڭىزدى جوبالاردى قارجىلاندىرۋعا باعىتتالاتىن 50 ملن اقش دوللارىنا دەيىنگى سوماعا بانكارالىق كرەديت جەلىسىن اشۋدى كوزدەيدى.
K-Sure-مەن ءوزارا تۇسىنىستىك تۋرالى مەموراندۋم ءوندىرىستى دامىتۋدىڭ نەگىزگى سالالارىندا قازاقستان مەن وڭتۇستىك كورەيانىڭ قارجى ينستيتۋتتارى اراسىنداعى مامىلەلەردى ساقتاندىرۋ بويىنشا ىنتىماقتاستىقتى نىعايتۋعا باعىتتالادى.
بۇدان باسقا, قۇجات اعىمداعى جانە الەۋەتتى جوبالار مەن ىسكەرلىك مۇمكىندىكتەر تۋرالى اقپاراتپەن الماسۋدى, قازاقستاندىق جانە كورەيالىق كومپانيالاردىڭ ىنتىماقتاستىعى جونىندەگى باستامالاردى قولداۋدى, ولاردىڭ اراسىنداعى بايلانىستاردى دامىتۋدى, ەكسپورت جانە يمپورت ءۇشىن ساقتاندىرۋ قۇرالدارىن ۇسىنۋدى, سونداي-اق تاجىريبە الماسۋدى كوزدەيدى.
قىرمىزى جۇماعاليقىزى,
ەۇۋ ستۋدەنتى
