فوتو: پارلامەنت سەناتىنىڭ ءباسپاسوز قىزمەتى
كەزدەسۋ بارىسىندا كوللەدج بازاسىندا كرەاتيۆتى يندۋستريا ورتالىعىن قۇرۋ, جاستاردىڭ باستامالارىن قولداۋ, ءبىلىم بەرۋ ۇدەرىستەرىنە تسيفرلىق سيپات ەنگىزۋ, ونىڭ ىشىندە جاساندى ينتەللەكت قۇرالدارىن قولدانۋ ماسەلەسى تالقىلاندى.
نۇرتورە ءجۇسىپ مەملەكەت جۇرگىزىپ جاتقان رەفورمالار تۋرالى ايتا كەلىپ, ول ءبىلىم بەرۋ دەڭگەيىنىڭ ساپاسىن ارتتىرۋعا, پەداگوگتەر مەن ءبىلىم بەرۋ مەكەمەلەرى قىزمەتكەرلەرىنىڭ الەۋمەتتىك كەپىلدىگىن جاقسارتۋعا, سونداي-اق ولاردىڭ ءرولى مەن مارتەبەسىن ارتتىرۋعا باعىتتالعانىنا توقتالدى.
«پرەزيدەنت قاسىم-جومارت توقاەۆ ءوز جولداۋىندا ءبىلىم جانە عىلىم ماسەلەسىنە ەرەكشە نازار اۋدارعان بولاتىن. مەملەكەت باسشىسى ءبىلىم بەرۋ جۇيەسى ەڭبەك نارىعىنىڭ قاجەتىنە وراي, ءزارۋ ماماندار ءتىزىمىن ەسكەرە وتىرىپ وزگەرۋى ءتيىس ەكەنىن اتاپ ءوتتى. ۇلتتىق ەكونوميكانىڭ كوپتەگەن سالالارىندا, اسىرەسە تەحنيكالىق جانە جۇمىسشى ماماندىعىنا كادر جەتىسپەيدى. سوندىقتان كەرەك بولاتىن ماماندىق بويىنشا ءبىلىم بەرۋ ىسىمەن ماقساتتى تۇردە اينالىسۋ قاجەت. وقۋ ورىندارى الەۋەتتى جۇمىس بەرۋشىلەرمەن ۇزاق مەرزىمدى سەرىكتەستىك قارىم-قاتىناس ورناتۋى ءتيىس. سەناتورلار پرەزيدەنت ايتقان بارلىق مىندەتتەر مەن ماقساتتار تەز وزگەرەتىن الەم جاعدايىندا جانە وسكەلەڭ ۇرپاققا جايلى بولاشاق قالىپتاستىرۋعا قاجەت دەپ سانايدى. ارينە, بۇل ۇلكەن ەڭبەكتى قاجەت ەتەدى. الايدا, مەملەكەت باسشىسىنىڭ تاپسىرمالارىن ساپالى ءارى ۋاقتىلى ورىنداۋ بارىمىزگە ورتاق مىندەت», دەدى نۇرتورە ءجۇسىپ.
سونىمەن قاتار دەپۋتات وسكەلەڭ ۇرپاقتىڭ وقىرماندىق ساۋاتىن ارتتىرۋدىڭ ماڭىزى مەن كىتاپحانالاردىڭ كىتاپ قورلارىن قىزىقتى كىتاپتارمەن تولىقتىرۋ قاجەتتىگىن اتاپ ءوتتى. ول سونداي-اق ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى كىتاپ وقۋدىڭ ماڭىزدىلىعىنا ەرەكشە نازار اۋدارعانىن تىلگە تيەك ەتتى. نۇرتورە ءجۇسىپ وسىعان وراي ءوز كوللەكتسياسىنداعى سۇيىكتى 100 كىتابىن كوللەدجدىڭ كىتاپ قورىنا تاپسىرىپ, ولاردىڭ وقىرماندارىنا پايدالى ءارى قىزىقتى بولاتىنىنا ءۇمىت ءبىلدىردى.
قىرمىزى جۇماعاليقىزى,
ەۇۋ ستۋدەنتى
