فوتو: قازاق گازەتتەرى
CAMCA فورۋمى ون جىلدان بەرى ءداستۇرلى نەگىزدە ۇيىمداستىرىلىپ كەلەدى. بىلتىر فورۋم الماتىدا وتكەن. بيىل بىشكەكتە ۇيىمداستىرىلدى.
سامسا – وسى ۇيىمعا مۇشە ەلدەردى ءوزارا جاقىنداستىرۋ, بايلانىستىرۋ, ورتاق قۇندىلىقتار مەن مادەنيەت قالىپتاستىرۋ باعىتىنداعى ماڭىزدى شارا. وسى شاراعا قوسىلعان ۇلەس رەتىندە حالىقارالىق «قازاق ءتىلى» قوعامى ورتالىق ازيانىڭ ورتاق ينتەللەكتۋالدىق جانە رۋحاني مۇراسى تۋرالى «ۇمىتىلعان ۇلىلىق. ورتالىق ازيانىڭ شاپقىنشىلىعىنان ءامىر تەمىرگە دەيىنگى التىن عاسىرى» (Lost Enlightenment: Central Asia's Golden Age from the Arab Conquest to Tamerlane) دەپ اتالاتىن تۋىندىسىن قازاق تىلىنە اۋدارىپ, كوپشىلىككە تانىستىردى. تانىستىرىلىم Silkroad Innovation Hub ۇيىمداستىرۋىمەن ءوتتى.
شاراعا Silkroad Innovation Hub نەگىزىن قالاۋشى اسەت ابدۋاليەۆ, قىرعىز رەسپۋبليكاسى پرەزيدەنتىنىڭ كەڭەسشىسى ارسلان قويشيەۆ, Freedom Holding Corp. ديرەكتورلار كەڭەسىنىڭ مۇشەسى قايرات كەلىمبەتوۆ, ورتالىق ازيا جانە كاۆكاز ينستيتۋتى توراعاسى ستيۆەن فرەدەريك ستارر, حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى قاتىستى.
«ۇمىتىلعان ۇلىلىق. ورتالىق ازيانىڭ شاپقىنشىلىعىنان ءامىر تەمىرگە دەيىنگى التىن عاسىرى – ورتالىق ازيانىڭ مەشەۋلىگى مەن مارگينالدىعى تۋرالى اڭىزداردى جوققا شىعارىپ, وسى ايماقتىڭ ادامزات عىلىمى مەن بىلىمىنە قوسقان ۇلكەن ۇلەسىن تاماشا مىسالدار مەن دالەلدەر ارقىلى باياندايتىن ىرگەلى ەڭبەك. قازاقستان, قىرعىزستان, وزبەكستان, تاجىكستان, تۇركمەنستان, ءىشىنارا اۋعانستان, پاكىستان مەن قىتاي ەلدەرىندە اشىلعان عىلىمي جاڭالىقتار, مادەني جەتىستىكتەر, باسقىنشىلىق سوعىستار تاريحىمەن جان-جاقتى تانىستىرادى. ءىح-ءحىىى عاسىرداعى اعارتۋشىلىق ءداۋىرىنىڭ وشاعى بولعان ورتالىق ازيانىڭ ەنتسيكلوپەديست-عالىمدارىنىڭ ءومىرى تۋرالى اسا قۇندى دەرەكتەر ۇسىنادى», دەپ مالىمدەدى حالىقارالىق «قازاق ءتىلى» قوعامىنىڭ ءباسپاسوز ورتالىعى.
كىتاپتى Kitap.kz پورتالىنان وقۋعا ءارى اۋديونۇسقاسىن تىڭداۋعا بولادى.
قىرمىزى جۇماعاليقىزى,
ەۇۋ ستۋدەنتى
