اقتوبە وبلىسىندا اسكەري قىزمەتشى سوتتالدى

اقتوبە گارنيزونىنىڭ اسكەري سوتىندا وزىنە سەنىپ تاپسىرىلعان قارۋمەن اسكەري قىزمەتىن تاستاپ قاشۋ, اۆتوكولىكتى ايداپ كەتۋ جانە قاراقشىلىق جاساۋ فاكتىلەرى بويىنشا ايىپتالعان قاتارداعى جاۋىنگەرگە قاتىستى ۇكىم جاريالاندى.

«سوتتا سوتتالۋشى, قاتارداعى جاۋىنگەر م. اسكەري قىزمەتتىڭ اۋىرتپالىعىنا توتەپ بەرە الماي, وزىنە سەنىپ تاپسىرىلعان قىزمەتتىك قارۋمەن اسكەري قىزمەت ورنىنان قاشىپ كەتكەنى انىقتالدى. ءارى قاراي ءوز ەركىمەن بولىمنەن قاشۋ كەزىندە ول جول جيەگىندەگى جابىرلەنۋشى ا-نىڭ باسقارۋىنداعى اۆتوكولىكتى كورىپ, وزىنە سەنىپ تاپسىرىلعان قارۋمەن ونى قورقىتىپ, ءوزى ايتقان باعىتتا ءجۇرۋدى تالاپ ەتكەن. ايتقان جەرىنە كەلگەننەن كەيىن, سوتتالۋشى م. جابىرلەنۋشىنىڭ سىرتقى كيىمىن يەمدەنىپ, قىلمىس ورنىنان بوي تاسالاعان», دەپ حابارلايدى اسكەري سوتتىڭ ءباسپاسوز قىزمەتى.

وقيعا ورىن العان كۇنى ساعات 13.00 شاماسىندا قاتارداعى جاۋىنگەر م-نى اسكەري پوليتسيا قىزمەتكەرلەرى ۇستادى.

سوت ۇكىمىمەن قاتارداعى جاۋىنگەر م. قر قك-ءنىڭ 442-بابىنىڭ 2-بولىگى, 192-بابىنىڭ 1-بولىگى, 200-بابىنىڭ 4-بولىگى بويىنشا كىنالى دەپ تانىلىپ, وعان 5 جىلعا باس بوستاندىعىنان ايىرۋ تۇرىندەگى جازا تاعايىندالدى.

سونىمەن قاتار سوتتالعاننان ءىس جۇرگىزۋ شىعىندارى جانە جابىرلەنۋشىلەرگە وتەماقى قورىنا ءماجبۇرلى تولەم ءوندىرىلدى.

سوت ۇكىمى زاڭدى كۇشىنە ەنگەن جوق.