فوتو: «جاستار رۋحى»-نىڭ ءباسپاسوز قىزمەتى
بۇگىن road-ەستافەتانىڭ ەكىنشى كۇنىندە استانادان شىققان الدىڭعى توپ پەن قاراعاندى بەلسەندىلەرى «سپاسسك» مەموريالدىق كەشەنىنىڭ اۋماعىن قوقىستان جانە ۆانداليزم ىزدەرىنەن تازارتتى. ولار اقسۋ-ايۋلى مەن شەت اۋدانىنىڭ اۋماعىن ءجۇرىپ ءوتىپ, بالقاشقا قاراي بەت العان.
«جاستار رۋحى» جاستار قاناتىنىڭ توراعاسى اقەركە يسكاندەروۆا road-ەستافەتا اياسىندا جان-جاقتى جۇمىس جۇرگىزىلەتىنىن ايتا كەتتى.
«بۇگىن road-ەستافەتانىڭ ەكىنشى كۇنىندە قوقىسپەن بىرگە ۆانداليزممەن كۇرەسىپ جاتىرمىز. قاراعاندى-بالقاش باعىتىندا كەزدەسكەن ەسكەرتكىشتەردى دە رەتكە كەلتىرۋدەمىز. وزدەرىڭىز بىلەسىزدەر, ۆاندالدىق ارەكەتتەردىڭ جيىلەپ كەتۋىنە بايلانىستى قىلمىستىق كودەكسكە ارنايى باپ ەنگىزىلىپ, قۇقىق بۇزۋشىلىقتاردى جازالاۋ شارالارى كۇشەيتىلدى. بۇل ۆاندالدارمەن كۇرەستە قولدانىلاتىن جاقسى تاسىلگە اينالدى. بىلتىر قازان ايىندا باستاۋ العان ۆانداليزممەن كۇرەس رەسپۋبليكالىق اكتسياسى road-ەستافەتادا دا كورىنىس تاۋىپ وتىر. اۋا رايىنىڭ قولايسىزدىعىنا قاراماستان بەلسەندىلەردىڭ كوڭىل-كۇيى جاقسى. كەشە استانا-قاراعاندى تاسجولىندا 1 كۇننىڭ وزىندە 13 توننا قوقىس جينادىق. اۆتوكولىكپەن جول بويىندا كەتىپ بارا جاتقاندا قوقىستار كوزگە كورىنبەيدى. ال شىن مانىندە قورشاعان ورتامىزدا قوقىس وتە كوپ. سوندىقتان جاستار اتىنان بارلىعىڭىزدى تازالىققا, سانالى ەكولوگيالىق ورتا قۇرۋعا شاقىرامىن», دەدى ول.
جاستارعا پارلامەنت ءماجىلىسىنىڭ دەپۋتاتى جارقىنبەك امانتاي ۇلى قوسىلىپ, ۆانداليزمگە ۇشىراعان ەسكەرتكىشتەردى ولارمەن بىرگە رەتكە كەلتىردى.
«اكتسيانىڭ پايداسى زور. مىسالى كۇنى كەشە 3 قاپ قوقىس جينادىم. بۇگىن جاستاردىڭ قاتارىنا قوسىلدىم. ۆاندالداردان كەيىنگى قالعان ءىزدى جويىپ, تاسجول اۋماعى مەن وعان قاراستى ايماقتاردى قوقىستاردان تازارتىپ جاتىرمىز. سونداي-اق اقسۋ-ايۋلى حالقىمەن دە كەزدەسىپ ۇلگەردىك», دەدى جارقىنبەك امانتاي ۇلى.
دەپۋتات اقسۋ-ايۋلىدا ازاماتتاردى قابىلداپ, حالىقتىڭ وزەكتى ماسەلەلەرىنە قۇلاق استى.
سونداي-اق بەلسەندىلەر قاراعاندى-بالقاش تاسجولى مەن ونىڭ اۋماعىن قوقىستان تازارتىپ, سۇرىپتاپ جاتىر. جينالعان قوقىس قاپتارعا سۇرىپتالىپ, «قازاۆتوجول» ماشينالارىنا تيەلىپ, قوقىس پوليگوندارىنا شىعارىلادى. قاتتى قالدىقتار «قازاقستاننىڭ قايتالاما شيكىزات وڭدەۋشىلەر قاۋىمداستىعى» باسقارماسىنىڭ قولداۋىمەن قايتا وڭدەۋگە جىبەرىلەدى.
«وتە جاقسى باستامانىڭ كۋاگەرى بولىپ وتىرمىز. ەكولوگيامىز ءۇشىن قوقىستى سۇرىپتاۋ وتە ماڭىزدى. وزدەرىڭىز بىلەتىندەي, دامىعان ەلدەر تۇرمىستىق قالدىقتاردى قايتادان وڭدەپ, بارىنشا كادەگە جاراتادى. بۇل ءۇردىس بىزگە دە اسا قاجەت. سۇرىپتاۋ – قوقىس كولەمىن ازايتۋعا, تابيعي رەسۋرستاردى ۇنەمدەۋگە جانە ەلدەگى ەكولوگيالىق جاعدايدى جاقسارتۋعا مۇمكىندىك بەرەدى. سوندىقتان جاستار قاناتىنىڭ بۇل باستاماسىنا ءبىز قۋانا قولداۋ بىلدىرەمىز», دەيدى قاۋىمداستىق توراعاسى باتىربەك اۋباكىروۆ.
ەسكە سالا كەتەيىك, بىلتىر 20 قازاندا «جاستار رۋحى» جاستار قاناتى قازاقستاننىڭ تاريحي, مادەني جانە تابيعي مۇراسىن ۆانداليزمنەن ساقتاۋعا باعىتتالعان رەسپۋبليكالىق اۋقىمدى اكتسيانى باستادى. 2500-دەن استام «جاستار رۋحى» بەلسەندىسى مەن ۆولونتەرى 500-دەن اسا تاريحي, مادەني ەسكەرتكىشتەردى تازارتتى. اكتسيا بارىسىندا «تاڭبالى تاس» پەتروگليفتەرىن, «اقباۋىر» شاتقالىن, ش. قۇدايبەردى ۇلىنىڭ, س. سەيفۋلليننىڭ, بوگەنباي باتىر, كەنەسارى حان ەسكەرتكىشتەرىن, «تەكتۇرماس» كەسەنەسىن, «ىبىقتى ساي» شاتقالىن, قوجا احمەت ياسساۋي كەسەنەسى ماڭىنداعى قورعانىن, «شاقپاق اتا», «سۇلتان ءۇپى», «قارامان اتا» جەراستى مەشىتتەرىن قوقىستار مەن جازۋلاردان تازارتتى.
اكتسيا بۇگىنگە دەيىن رەسپۋبليكانىڭ بارلىق ايماقتارىندا جالعاسىپ جاتىر.
قىرمىزى جۇماعاليقىزى,
ەۇۋ ستۋدەنتى
