الەمدىك رەكورد ورناتۋ ەرەكشەلىك پەن تۇراقتىلىقتى تالاپ ەتەدى. ال كۋرورتتىق ايماققا قويىلاتىن تالاپ – قيىننىڭ قيىنى. مىسالى, شاڭعى تەبەتىن جول حالىقارالىق شاڭعى فەدەراتسياسىنىڭ تالابىنا سايكەس كەلۋى كەرەك. بۇل تالاپ بويىنشا گيننەستىڭ رەكوردتار كىتابىنا ەنۋ ءۇشىن 3100 مەتر بيىكتىك بەلگىلەنگەن. ال «شىمبۇلاق» تەڭىز دەڭگەيىنەن 3200 مەتر بيىكتىكتە ورنالاسقان.
95 ءتىل بىلەدى
قانشا ءتىل بىلسەڭ, سونشا الەم اشاسىڭ. ەرەكشە قابىلەتىنىڭ ارقاسىندا 95 ءتىل ۇيرەنگەن ماسكەۋ قالاسىنىڭ تۇرعىنى ۆيللي مەلنيكوۆ الەمدى تاڭعالدىرعان.
ۆەتەريناريا اكادەمياسىن بىتىرگەن دارىندى جىگىت كەزىندە اۋعانستان سوعىسىندا دارىگەر بولعان. قىزمەت بارىسىندا ءتىل ۇيرەنۋگە قاتتى قىزىعىپتى. جان-جاقتى ىزدەنىپ, الەم حالىقتارىنىڭ 95 ءتىلىن وقىپ-ۇيرەنىپ الىپتى. سونىمەن قاتار ۆيللي قولى قالت ەتكەندە ولەڭ جازىپ, سۋرەت تە سالعان.
QR كودتىڭ اۆتورى
قازىر QR كود-سىز تىرلىگىمىز بىتپەيدى. وسى ءبىر ەرەكشە ءادىستىڭ باستاۋى جاپون ازاماتىنىڭ شاراسىزدىعىنان پايدا بولعان دەسەدى.
جاپوندىق «Denso» ماشينا جاساۋ كورپوراتسياسى شتريح-كودتاردى سكانەرلەۋگە كوپ ۋاقىت جۇمساپتى. سوندا باسشىلىق قىزمەتكەرلەردەن اقپارات سانىن كوبەيتۋدى تالاپ ەتىپ, سوگىس جاريالاعان. بۇل ماسەلە ينجەنەر ماساحيرو حارانىڭ شىمبايىنا باتقان. ءارى ويلانىپ, بەرى ويلانىپ ابىگەرگە تۇسەدى. كەنەت ەسىنە ءتورتبۇرىشتى تاقتادا قارا جانە اق تاستارمەن وينالاتىن «GO» وينى تۇسەدى. وسى ويىننىڭ ەرەكشەلىگى ينجەنەردى شابىتتاندىرىپ, QR كود ويلاپ تاپقان.
