«شاڭىراق» ەتنوقالاشىعى №7, 16, 18, 22, 25, 33 مەكتەپتەرىنىڭ التى كيىز ۇيلەرىنەن تۇراتىن كەشەن.
ەتنوجوبا «دوستىق ءۇيى» كمم, «اتامۇرا» ۇمو, قالالىق ولكەتانۋ مۇراجايى, جاستار باستامالارىن دامىتۋ ورتالىعى جانە «ەكىباستۇز» قبق قولداۋىمەن ىسكە اسىرىلىپ وتىر.
كيىز ۇيلەردەن تۇراتىن ەتنوقالاشىقتى ۇيىمداستىرۋ قازىرگى تاڭدا وزەكتى. بۇل جوبا وقۋشىلاردىڭ مادەني, رۋحاني دامۋىنا ىقپال ەتەدى. بولاشاق ۇرپاق ۇلتىمىزىڭ سالت-ءداستۇرى, مادەنيەتىمەن جاز ايىندا تانىسىپ, دەمالىستارىن قىزىقتى وتكىزەدى.
«ەتنوقالاشىق اياسىندا قازاقتىڭ قولونەرى, مۋزىكا, بي جانە اسپازدىق بويىنشا شەبەرلىك ساباقتار مەن ءبىلىم بەرۋ ساباقتارى وتكىزىلەدى. بالالار ينتەراكتيۆتى ايماقتار, كورمەلەر مەن شەبەرلىك ساباقتار ارقىلى قازاق حالقىنىڭ داستۇرلەرى مەن قولونەرىمەن تانىسۋعا بىرەگەي مۇمكىندىك الادى, بالالار ءداستۇرلى قازاق ويىندارىن ويناپ, سايىستارعا قاتىسادى, تازا اۋادا التىباقان تەۋىپ, ۇلتتىق تاعامداردان ءدام تاتىپ, ۋاقىتتارىن ءتيىمدى وتكىزەدى», دەدى ەكىباستۇز قالاسى ءبىلىم ءبولىمىنىڭ باسشىسى لاۋرا ديسيۋپوۆا.
«جوبانىڭ نەگىزگى ماقساتى قازاق مادەنيەتى تۋرالى ءبىلىمدى ارتتىرۋ, شىعارماشىلىق داعدىلاردى دامىتۋ, بەلسەندى دەمالىس وتكىزۋ. ەتنوقالاشىققا قاتىسۋ بالالارعا قازاق حالقىنىڭ داستۇرلەرى, قولونەرى, مۋزىكاسى مەن اسپازدىعى تۋرالى تەرەڭ ءبىلىم الۋعا, ءتۇرلى شەبەرلىك ساباقتار ارقىلى شىعارماشىلىق قابىلەتتەرىن دامىتادى», دەپ اتاپ ءوتتى «قاينار» كەشەنىنىڭ باسشىسى ۆالەنتينا كلەپيتسا.
بىرەگەي جوبا قالانىڭ ءبىلىم بەرۋ مەكەمەلەرىنىڭ 4-6 سىنىپ وقۋشىلارى اراسىندا 600 بالانى قامتيدى. جوبانى ىسكە اسىرۋعا مەكتەپ ديرەكتورلارىنىڭ تاربيە ءىسى جونىندەگى ورىنباسارلارى, اعا تالىمگەرلەر, «قاينار» كەشەنىنىڭ قوسىمشا ءبىلىم بەرۋ پەداگوگتەرى مەن ادىسكەرلەرى قاتىستى.
