ليتسەي وقۋشىلارىنىڭ الدىندا ءسوز سويلەگەن مايور ماقسۇت جۇماەۆ الەمنىڭ ەڭ بيىك شىڭىن باعىندىرعان ساتتەگى اسەرىمەن ءبولىستى.
ء«بىز بيىكتىگى 8848 مەتر ەۆەرەست شىڭىن باعىندىرىپ كەلگەنىمىزگە ەكى-ءۇش اپتا عانا بولدى. قازاقتىڭ ەكى قىزى - انار بۇراشەۆا مەن ءجاميليا باشيروۆانىڭ تاۋەلسىز قازاقستان تاريحىندا العاش رەت ەۆەرەستتى باعىندىرۋى ايتۋلى وقيعا», دەدى ول.
دجومولۋنگما بيىگىن ءۇش دۇركىن باعىندىرعان ماقسۇت جۇماباەۆ ليتسەي وقۋشىلارىمەن الداعى كۇزدە قايتا قاۋىشىپ, شىڭدى باعىندىرۋ جايلى تۇسىرىلگەن دەرەكتى ءفيلمدى كورسەتەتىنى تۋرالى ايتتى. ماقسۇت جۇماەۆ بۇل جولعى بيىكتىكتى باعىندىرعان ءساتىن قازاقستاننىڭ ءبىرتۋار باتىرلارى – ارميا گەنەرالى, حالىق قاھارمانى ساعادات نۇرماعامبەتوۆتىڭ, حالىق قاھارمانى راقىمجان قوشقارباەۆتىڭ جانە كەڭەس وداعىنىڭ باتىرى ءاليا مولداعۇلوۆانىڭ ءجۇز جىلدىق مەرەيتويىنا ارناعانىن مالىمدەدى.
«ليتسەيدە جاسالعان جاعدايلارعا قاراپ, بالالاردىڭ دامۋى مەن ءوسۋى ءۇشىن وراسان زور مۇمكىندىكتەر جاسالعانىن ايتۋعا بولادى, ال ولاردىڭ قاتاڭ كونكۋرستىق ىرىكتەۋدەن سۇرىنبەي وتكەندىگى ولاردىڭ قاجىرلى ەڭبەگىنىڭ كورسەتكىشى. ولاردىڭ الدا زور, ءورشىل ماقسات قويا ءبىلىپ, سول ماقساتقا جەتۋلەرىنە تىلەكتەسپىن», دەدى ەۆەرەستتى العاش باعىندىرعان قازاق قىزى انار بۇراشەۆا.
«ەڭ الدىمەن, كەزدەسۋ كوڭىلىمنەن شىققانىن ايتا كەتەيىن. اۋەلدە, ءبارىن باسقاشا ەلەستەتكەن ەدىم», دەپ اۆتوكروسستان قازاقستاننىڭ جەتى دۇركىن چەمپيونى الەكساندر ارتەمەۆ كەزدەسۋدەن العان اسەرىمەن ءبولىستى.
«مۇندا بالالار تەك سپورتتىق جانە اسكەري پاندەردى وقيدى دەپ ويلادىم, بىراق ليتسەي وقۋشىلارى سۋرەت سالىپ, مۋزىكالىق اسپاپتاردا وينايتىنىن, روبوتوتەحنيكامەن دە اينالىساتىنىن كوردىم. مۇعالىمدەردىڭ دە قۇرامىن قاراپ شىقتىم جانە تەك اسكەري مامانداردى عانا ەمەس, جالپى بىلىكتى مامانداردى دايىنداپ شىعاراتىنا سەنىمدىمىن. مەنىڭ ويىمشا, شىعارماشىلىق ورتا, ءتىپتى وقۋشىلاردىڭ مۇمكىندىگىنشە جان-جاقتى دامۋىنا, بويىنداعى تالانتتارىن اشۋىنا وتە قولايلى ورتا جاسالعان دەپ ايتار ەدىم», دەدى الەكساندر ارتەمەۆ
«ارىستان» ليتسەيىنىڭ تاربيەلەنۋشىلەرىنە سپورتشىلار وزدەرىنىڭ كاسىبي جەتىستىكتەرى تۋرالى ايتىپ بەردى. بالالار ءوز كەزەگىندە سپورتشىلاردىڭ قاي جاستان باستاپ كاسىبي سپورتپەن اينالىسا باستاعانى جايلى, كاسىپقوي سپورتشىلاردى نە شابىتتاندىراتىنى جانە نە الاڭداتاتىنى, قانداي ماقساتتار قويىپ, سول ماقساتقا قالاي جەتۋدى جوسپارلايتىنى جايلى ءتۇرلى ساۋال قويدى. كەيىننەن سپورتشىلار وزات وقۋشىلاردىڭ اشىق رەيتينگىمەن تانىسىپ, سىنىپتارداعى زاماناۋي ينتەراكتيۆتى پانەلدەردىڭ ءىس جۇزىندە قالاي جۇمىس ىستەيتىنىن باعالاي الدى.
«بالالاردىڭ كوزدەرىندە وت بار, ولاردىڭ بويىنان ينتەللەكت, قىزىعۋشىلىق, بىلىمگە دەگەن قۇشتارلىقتى كوردىم. ارينە, اسكەري ءتارتىپتىڭ ازداپ اسەرى بار, كەيبىرىنىڭ سۇراقتارى جاتتاندى, بىرنەشە رەت دايىندالعان سياقتى كورىنگەنىمەن, دەسە دە بالالار مەنى تاڭ قالدىرا الدى. قازىر ولار جەكە پىكىرىن, ومىرگە دەگەن كوزقاراستارىن قالىپتاستىراتىن وتە قىزىقتى كەزەڭدە. بالالاردىڭ ساتتىلىك پەن جەتىستىككە جەتىپ, ماقساتتى دۇرىس قويىپ, باسىمدىقتاردى ايقىنداي بىلۋگە ۇيرەنۋىنە تىلەكتەسپىن», دەدى الەكساندر ارتەمەۆ.
ليتسەي قوناقتارى ءبىلىم ورداسىن ارالاپ, تير, باسسەين, كوركەم شىعارمالار كورمەسىن تاماشالاپ, وقىتۋ ءۇردىسىنىڭ قالاي ۇيىمداستىرىلعانىن باعالاپ, ليتسەي وقۋشىلارىنىڭ جەتىستىكتەرىمەن, سونىڭ قاتارىندا سپورتتىڭ ءۇش تۇرىنەن الەم چەمپيونى اتاعىن جەڭىپ العان ليتسەيدىڭ ون ءبىرىنشى سىنىپ وقۋشىسىنىڭ جەتىستىگىمەن تانىستى.
«ارىستان» ليتسەيىندە «بىرەگەي تۇلعالارمەن كەزدەسۋ» فورماتىنداعى ء ىس-شارالار اي سايىن وتكىزىلەدى. ليتسەي وقۋشىلارىنا اسكەريلەر, سپورتشىلار, ونەر قايراتكەرلەرىمەن كەزدەسۋ ۇيىمداستىرىلىپ وتىرادى. مۇنداي كەزدەسۋلەر بولاشاق وفيتسەرلەردىڭ وي-ءورىسىن كەڭەيتۋگە, ولاردىڭ بويىندا جەكە قابىلەتتەرىن دامىتۋعا جانە ءورشىل ماقساتتار قويا بىلۋىنە سەپتىگىن تيگىزىپ, ولاردىڭ ءتۇرلى سالالاردا جوعارى ناتيجەلەرگە جەتۋىنە شابىتتاندىرارى ءسوزسىز.
