فوتو: Freepik
يۋن سوك يول قازاقستان-كورەيا اراسىنداعى ستراتەگيالىق قارىم-قاتىناستى جوعارى باعالايتىنىن جەتكىزدى.
سونداي-اق ساۋدا-ەكونوميكالىق, مادەني-گۋمانيتارلىق بايلانىستاردى ودان ءارى نىعايتۋعا مۇددەلى ەكەنىن ايتىپ, وسى ساپارى اياسىندا دا دوستىق قارىم-قاتىناستى تەرەڭدەتۋگە ىقىلاستى ەكەنىن ءبىلدىردى.
كورەيا قازاقستانعا ينۆەستيتسيا قۇياتىن ەلدەر كوشىندە توپ-10-عا كىرەدى. وسى باعىتتاعى جۇمىستى ەنەرگەتيكا سالاسىندا دا نىعايتۋ جوسپارلانىپ وتىر.
قازاقستان مەن كورەيا رەسپۋبليكاسى كومىرتەگى بەيتاراپتىعىنا تولىعىمەن كوشۋ مىندەتىن قويدى. وسى ماقساتقا جەتۋ ءۇشىن ەكى ەل ەنەرگەتيكا سالاسىندا قانداي ىنتىماقتاستىقتى دامىتا الاتىنىنا كورەيا پرەزيدەنتى جاۋاپ بەردى.
«كليماتتىڭ وزگەرۋىنە دەن قويۋ – جاھاندىق مىندەت. ونى شەشۋ ءۇشىن كومىرتەگى بەيتاراپتىعىنا كورەيا 2050 جىلعا قاراي, ال قازاقستان 2060 جىلعا قاراي قول جەتكىزۋگە ۇمتىلىپ وتىر. ەۋروپالىق وداقتىڭ مالىمەتىنە سايكەس, ەلەكتر ەنەرگياسىن ءوندىرۋ سەكتورىنداعى كومىرتەگى شىعارىندىلارى ەڭ جوعارى جانە ول الەمدىك كومىرقىشقىل گازى شىعارىندىلارىنىڭ 27,5 پايىزدى قۇرايدى. دەمەك وسى سەكتورداعى كومىرتەگى شىعارىندىلارىن ازايتۋ – كومىرتەگى بەيتاراپتىعىنا قول جەتكىزۋدىڭ كىلتى», دەدى يۋن سوك يول.
كورەيا پرەزيدەنتى اتوم ەلەكتر ستانسالارى, جاڭارتىلاتىن ەنەرگيا كوزدەرى سالاسىندا دا قازاقستانعا قولداۋ كورسەتۋگە دايىن ەكەنىن مالىمدەدى.
«كورەيا اتوم ەنەرگەتيكاسى مەن جاڭارتىلاتىن ەنەرگيا كوزدەرىنە نەگىزدەلگەن كومىرتەكسىز ەنەرگيانى («Carbon-Free Energy», CFE) كەڭەيتۋگە كۇش سالىپ كەلەدى. مەنىڭ بىلۋىمشە, قازاقستان دا جىلۋ ەنەرگەتيكاسى ءوندىرىسىنىڭ جوعارى ۇلەسىنە بايلانىستى ەلەكتر ەنەرگياسىن ءوندىرۋ سەكتورىندا كومىرقىشقىل گازىنىڭ شىعارىندىلارىن قىسقارتۋعا مەيلىنشە كۇش-جىگەر جۇمساپ وتىر.
كورەيا اتوم ەلەكتر ستانسالارى, جاڭارتىلاتىن ەنەرگيا كوزدەرى سالاسىندا, سونداي-اق ەلەكتر ەنەرگياسىن ءوندىرۋ تيىمدىلىگىن ارتتىرۋ سالاسىندا الەمدەگى ەڭ ۇزدىك باسەكەگە قابىلەتتىلىككە يە. سوندىقتان دا قازاقستانمەن وسى سالالاردا ىنتىماقتاستىق الەۋەتىمىز زور», دەدى كورەيا پرەزيدەنتى.
