بۇل تۋرالى مەگاپوليستىڭ اقپاراتتىق-كوممۋنيكاتسيالىق قىزمەتىندە وتكەن بريفينگتە ەكونوميكالىق تەرگەپ-تەكسەرۋ دەپارتامەنتىنىڭ وكىلى ك.يسمايلوۆ مالىمدەدى.
سونىمەن قاتار مامان ۇكىمەت قاۋلىسىمەن «كولەڭكەلى ەكونوميكاعا قارسى ءىس-قيمىل جونىندەگى ءىس-شارالاردىڭ 2023–2025 جىلدارعا ارنالعان كەشەندى جوسپارى» بەكىتىلىپ, سونىڭ نەگىزىندە بيىل قالا اكىمدىگىنىڭ وكىمىمەن كولەڭكەلى ەكونوميكا ۇلەسىن تومەندەتۋ جونىندەگى جۇمىس توبى, ياعني كوميسسيانىڭ قۇرىلعانىن جەتكىزدى. كوميسسيا جۇمىسىنىڭ ماقساتى – شىمكەنت قالاسىنداعى كولەڭكەلى ەكونوميكامەن كۇرەس, ونىڭ دەڭگەيىن تومەندەتۋ جانە پرەۆەنتيۆتى شارالار قابىلداۋ. سونداي-اق مامان دەپارتامەنت قىلمىستاردى اشۋدا سانعا ەمەس, ساپاعا جۇمىس ىستەي باستاعانىن, مۇنداعى كوزدەلگەن باستى ماقسات قوعامنىڭ قۇقىق قورعاۋ ورگاندارىنا دەگەن سەنىمىن ارتتىرۋ مەن كاسىپكەرلىك سۋبەكتىلەرىنىڭ قىزمەتىنە زاڭسىز ارالاسپاۋ ەكەنىن اتاپ ءوتتى.
دەرەكتەرگە كوز جۇگىرتسەك, 2024 جىلدىڭ 5 ايىندا شىمكەنت قالالىق ەكونوميكالىق تەرگەپ-تەكسەرۋ دەپارتامەنتى 57 قىلمىستىق قۇقىق بۇزۋشىلىق ءىس تىركەپ, ونىڭ ىشىندە وندىرىستەگى 35 قىلمىستىق ءىستى تەرگەۋدى تولىق اياقتادى, بۇگىندە 90 پايىزى سوتقا جولدانعان.
جوعارىدا ايتىلىپ وتكەندەي, كولەڭكەلى ەكونوميكاداعى زاڭ بۇزۋشىلىق دەڭگەيىن تومەندەتۋ باعىتىندا قالادا بىرقاتار ءىس-شارا اتقارىلدى. ناتيجەسىندە, دەپارتامەنت الكوگول ونىمدەرىنىڭ زاڭسىز اينالىمىن ازايتىپ, جاقسى كورسەتكىشتەرگە قول جەتكىزدى. ماسەلەن, 2024 جىلدىڭ 5 ايىندا اتالعان ءىس بويىنشا قالا اۋماعىندا جاسىرىن 5 تسەح انىقتالىپ, قىلمىستىق كودەكستىڭ 233-بابىمەن 5 قىلمىستىق ءىس تىركەلدى. بۇگىنگى تاڭدا 1 ءىس وندىرىستە بولسا, قالعان تورتەۋىنە الداعى ۋاقىتتا سوت ۇكىم شىعارادى.
قىلمىستىق ىستەر بويىنشا 22 مىڭنان اسا دايىن الكوگول ونىمدەرى انىقتالدى. تارقاتىپ ايتساق, قۇرامىندا ءسپيرتى بار 2 مىڭ ليتردەن جوعارى سۇيىقتىق, 9 900 ليتر سپيرت, 885 ليتر شاراپ, 140 قوراپ قاقپاق, 4 بۋما ەسەپكە الۋ ماركاسى, 20 بۋما جاپسىرما, 2 ستانوك, 4 تازالاعىش فيلتر مەن ەكى مىڭنان اسا بوس بوتەلكە تاركىلەندى.
سونىمەن بىرگە بيىل اقپاندا دەپارتامەنت قىزمەتكەرلەرى جۇرگىزگەن كەشەندى ارنايى جەدەل-ىزدەستىرۋ ءىس-شارالارى بارىسىندا جالعان ەسەپكە الۋ, باقىلاۋ ماركالارىن پايدالانۋ ارقىلى الكوگول ونىمدەرى مەن ەتيل ءسپيرتىن ساۋدالاپ, ساتۋمەن اينالىسقان ازاماتتار ۇستالدى. بۇل قىلمىستىق ىستەر بويىنشا ءتىنتۋ جۇرگىزىلىپ, ماڭىزدى ايعاقتىق زاتتار تابىلدى. ياعني 9 900 ليتر ەتيل ءسپيرتى, دايىن اراق ونىمدەرىن جاساۋعا قاجەتتى زاتتار – قاقپاق, بوس بوتەلكە, ەسەپكە الۋ-باقىلاۋ ماركالارى انىقتالدى. بۇدان بولەك, كۇدىكتىلەردەن ۇلكەن سومادا اقشا الىنىپ, ول قوماقتى قاراجاتتى پايدالانۋعا سوتپەن تىيىم سالىندى.
سونداي-اق كۇدىكتى تۇلعالاردىڭ قىلمىستىق جولمەن تابىلعان اقشا قاراجاتتارىن ءارى قاراي «Kaspi Bank» دەپوزيت شوتىنا سالىپ, دەپوزيت بويىنشا ۇستەمە پايىزدار الىپ وتىرعانى بەلگىلى بولعان. ونىمەن قويماي زاڭسىز اقشاعا قىمبات ءارى جاپ-جاڭا «Toyota Land Cruiser 300», «Zeekr 001», «KIA K8», «Hyundai Grandeur», «Volvo» سەكىلدى شەتەلدىك اۆتوكولىكتەردى ساتىپ العاندارى دالەلدەنگەن. دەپارتامەنت وكىلدەرىنىڭ مالىمدەۋىنشە, كۇدىكتىلەر قىلمىسىن جاسىرۋ ءۇشىن ساتىپ العان اۆتوكولىكتەردى جاقىن تۋىستارىنىڭ اتىنا تىركەپ قويعان ەكەن.
شىمكەنت
