ەلىمىزدىڭ ءبىرىنشى جانە الەمنىڭ ءتورتىنشى راكەتكاسى دەگەن اتاعى بار رىباكينا باستاپقى باسەكەلەردە بەلگيالىق گرەتە ميننەن (6:2, 6:3) مەن ەليسە مەرتەنس (6:4, 6:2), نيدەرلاند ارانچا رۋس (6:3, 6:4) جانە ۋكراينالىق ەلينا سۆيتوليناعا (6:4, 6:3) سان سوقتىرعانىمەن, شيرەك فينالدا WTA تىزىمىندە 15-ساتىعا جايعاسقان يتاليالىق جاسمين پاولينيدەن (2:6, 6:4, 4:6) ويدا-جوقتا جەڭىلىپ قالدى. نەگىزى ەلەنا بۇل ويىنشىدان ءوتۋى كەرەك ەدى. ويتكەنى قارسىلاسىنا قاراعاندا ونىڭ اتاعى زور, شەبەرلىك دەڭگەيى دە جوعارى. بىراق سول كۇنى رىباكينانىڭ ويىنى مۇلدەم جۇرمەدى. ال وزگە جەرلەستەرىمىز, وكىنىشكە قاراي, بۇل تۋرنيردە تىم سۇرەڭسىز ونەر كورسەتتى. اتاپ ايتساق, يۋليا پۋتينتسەۆا, الەكساندر بۋبليك جانە الەكساندر شەۆچەنكو ەكىنشى اينالىمنان اسا الماسا, ميحايل كۋكۋشكين تۇساۋكەسەر كەزدەسۋىندە جەڭىلىستىڭ كەرمەك ءدامىن تاتتى.
پاريجدەگى ءدۇبىرلى دودادا جەرلەستەرىمىزدىڭ دەنى سەنىم ۇدەسىنەن شىعا الماعانىمەن, ماتەريالدىق تۇرعىدان بارلىعى دا ولجاعا كەنەلدى. ماسەلەن, جەكەلەگەن سايىستىڭ شيرەك فينالىنا دەيىن جەتكەنى ءۇشىن ەلەنا رىباكينانىڭ ەسەپشوتىنا 415 000 ەۋرو ءتۇستى. ەكىنشى كەزەڭدە جەڭىلگەن جەرلەستەرىمىز 110 000 ەۋرونى ەنشىلەدى. تىپتەن العاشقى اينالىمنان اسا الماعان ميحايل كۋكۋشكيننىڭ ءوزى 73 000 ەۋرونى قالتاسىنا باستى.
بيىلعى «رولان گارروستىڭ» باستى سەنساتسياسى» دەپ ميررا اندرەەۆانى ايتۋعا بولادى. الەمدىك رەيتينگتە قالىڭ توپتىڭ اراسىندا جۇرگەن 17 جاستاعى رەسەيلىك جاس دارىن فرانتسيانىڭ استاناسىندا ايدى اسپانعا ءبىر-اق شىعارىپ, جارتىلاي فينالعا دەيىن جەتتى. تۋرنير بارىسىندا ول نەبىر ساقا سپورتشىلارعا سان سوقتىردى. دەسەك تە بۇل مەجەدە اندرەەۆانىڭ جاسمين پاولينيگە ءالى جەتپەدى. ال يتاليالىق تەننيسشى فينالدا الەمنىڭ ءبىرىنشى راكەتكاسى يگا سۆەنتەكتەن 1:6, 2:6 ەسەبىمەن ويسىراي ۇتىلدى. ءسويتىپ, 24 جاستاعى پولشانىڭ ماقتانىشى «رولان گارروستا» ءتورتىنشى مارتە باس جۇلدەنى ولجالادى.
ەرلەر اراسىنداعى تارتىستا ۇزدىك شىققان ءتورت تەننيسشى جارتىلاي فينالدا جولىقتى. بۇل مەجەدە يسپانيالىق كارلوس الكاراس يتاليالىق ياننيك سيننەردى بەس سەتتىك سايىستا ازەر ۇتتى – 2:6, 6:3, 3:6, 6:4, 6:3. گەرمانيالىق الەكساندر زۆەرەۆ نورۆەگيالىق كاسپەر رۋدتى قاپى قالدىردى – 2:6, 6:2, 6:4, 6:2. فينالدا الەمنىڭ ءۇشىنشى راكەتكاسى الكاراس پەن اتر تىزىمىندە ودان ءبىر ساتى تومەن تۇرعان زۆەرەۆ كۇش سىناستى. 4 ساعات 19 مينۋتقا سوزىلعان ايقاستا پيرەنەي تۇبەگىنەن كەلگەن ءدۇلدۇلدىڭ ايدارىنان جەل ەستى – 3:6, 6:2, 7:5, 1:6, 6:2. 21 جاستاعى كارلوس ءوزىنىڭ سپورتتىق مانسابىندا تۇڭعىش رەت پاريجدەگى دودادا دارا شىقتى. وعان دەيىن ول «ۋيمبلدون» مەن اقش-تىڭ اشىق بىرىنشىلىگىندە باس جۇلدەنى ولجالاعان. اتالعان جارىستىڭ قورىتىندىسى بويىنشا جەكەلەگەن سايىستا جەڭىمپاز اتانعان ويىنشىلارعا 2,4 ملن ەۋرو تابىس ەتىلسە, فينالدا ۇتىلعاندارى سول سومانىڭ تەڭ جارتىسىن الدى. جارتىلاي فينالدا كۇش سىناسقان ويىنشىلار 650 مىڭ ەۋرونى يەلەندى.
جالپى, پاريجدەگى تۋرنيردە كۇتپەگەن ناتيجەلەر كوپ تىركەلدى. سولاردىڭ اراسىنان «رولان گارروستىڭ» رەكوردشىسى رافاەل نادال مەن «ۇلكەن دۋلىعا» ساناتىنداعى جارىستاردىڭ ءۇش دۇركىن جەڭىمپازى, ۇلىبريتانيالىق ەندي ماررەيدىڭ تۇساۋكەسەر كەزدەسۋلەرىندە ءسۇرىنۋىن, توپ-10-دىقتىڭ قاتارىنا ەركىن ەنىپ وتىرعان قىتايلىق چجەن تسينۆەن مەن بەلارۋستىك يرينا سوبولەنكونىڭ 17 جاستاعى ميررا اندرەەۆاعا ەسە جىبەرگەنىن ايرىقشا اتاپ وتۋگە بولادى. سونداي-اق الەمنىڭ ءبىرىنشى راكەتكاسى, سەربيالىق نوۆاك دجوكوۆيچ جاراقاتىنا بايلانىستى كاسپەر رۋدقا قارسى وتۋگە ءتيىس شيرەك فينالدىق ويىنعا شىقپادى.
