KazChess/قازاقستان شاحمات فەدەراتسياسى, تۋريزم جانە سپورت مينيسترلىگى, ازيا شاحمات فەدەراتسياسى, الماتى قالاسى اكىمدىگىنىڭ ۇيىمداستىرۋىمەن ءوتىپ جاتقان چەمپيوناتتىڭ باس سەرىكتەسى – «Freedom Holding Corp.» كومپانياسى.
10-20 ماۋسىم ارالىعىندا حالىقارالىق دەڭگەيدەگى شاحمات تۋرنيرلەرى اراسىنداعى رەكوردتىق كورسەتكىشكە يە بولعان چەمپيوناتتا الەمنىڭ 34 ەلىنەن كەلگەن 7-18 جاس ارالىعىنداعى 650-گە جۋىق جاس شاحماتشى كلاسسيكا, راپيد جانە بليتس بويىنشا باق سىناساتىن بولادى.
«وسىنداي بەدەلدى ءتۋرنيردى وتكىزۋ بىزگە دەگەن جوعارى سەنىمدى كورسەتەدى ءارى ازيا شاحمات فەدەراتسياسىنداعى ۇستانىمىمىزدى نىعايتۋعا مۇمكىندىك بەرەدى. چەمپيونات ەل شاحماتىن, جاڭا ەسىمدەردى تانىتۋعا, جاس شاحماتشىلارىمىز ءۇشىن بايىپتى باسەكەلەستىك تاجىريبە جيناۋعا تاماشا مۇمكىندىك تۋعىزادى دەپ سەنەمىز. ءبىزدىڭ كوماندا ءتۋرنيردى ساپالى ۇيىمداستىرىپ قانا قويماي, قوناقتارعا قازاقستاننىڭ مادەنيەتى مەن ءداستۇرىن, سونداي-اق الماتىنىڭ كوركەم تابيعاتىمەن تانىسۋعا مۇمكىندىك بەرەتىن قىزىقتى شارالارمەن تولىقتىرۋعا بارىنشا تىرىستى», دەپ اتاپ ءوتتى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ.
KazChess ءبىرىنشى ۆيتسە-پرەزيدەنتى, ازيا شاحمات فەدەراتسياسىنىڭ ۆيتسە-پرەزيدەنتى, گروسسمەيستەر دارمەن سادۋاقاسوۆتىڭ ايتۋىنشا, 26-جاسوسپىرىمدەر اراسىنداعى ازيا چەمپيوناتى يراننان جاڭا زەلاندياعا دەيىنگى كەڭىستىكتى قامتىپ, شاحمات الەمىندەگى ۇردىستەردى جاريا ەتەتىن ماڭىزدى وقيعاعا اينالىپ وتىر. بۇگىندە تاجىريبە كورسەتكەندەي, ازيا چەمپيوناتتارى بولاشاق شاحمات جۇلدىزدارىن الەمگە تانىمال ەتەتىن كاسىبي الاڭعا اينالىپ ۇلگەردى. بۇل چەمپيونات 200-گە جۋىق جاس شاحماتشى ءۇشىن قىركۇيەك ايىندا بۋداپەشتە وتەتىن دۇنيەجۇزىلىك شاحمات وليمپياداسىنا اشىلعان ۇلكەن قاقپا ىسپەتتى.
چەمپيوناتقا قاتىسۋشىلاردىڭ اراسىندا حالىقارالىق شەبەرلەر – جاقىندا ءۇشىنشى گروسسمەيستەرلىك نورمانى ورىنداعان قازاقستاننان الديار انسات جانە ءۇندىستاننان سۋرەش حارش U18 ساناتىندا باق سىنايتىن بولسا, حالىقارالىق دارەجەدەگى شەبەرلەر – قازاقستاننان امينا قايىربەكوۆا, وزبەكستاننان مافتۋنا بوبومۋرودوۆا قاتىسىپ, U18 ءبىر ساناتىندا ويىنعا قاتىساتىن بولادى. بيىل الەم چەمپيونى اتاعى ءۇشىن سايىساتىندار قاتارىندا 2018 جىلى تايلاندتا وتكەن 12 جاسقا دەيىنگى ازيا چەمپيوناتىندا بەس التىن مەدال يەلەنگەن ءۇندى گروسسمەيستەرى گۋكەش دوممارادجۋ, سونىمەن قاتار شاحماتتان ايەلدەر اراسىنداعى حالىقارالىق شەبەر, 2022 جىلعى الەم چەمپيوناتىنىڭ 16 جاسقا دەيىنگى كۇمىس جۇلدەگەرى نگۋەن حونگ نيۋنگ بار. چەمپيوناتقا ەرلەر اراسىندا 24 جانە ايەلدەر اراسىندا 11 فيدە شەبەرى قاتىسىپ جاتىر.
قازاقستان شاحمات فەدەراتسياسىنىڭ اتقارۋشى ديرەكتورى گۇلميرا داۋلەتوۆا ازيا چەمپيوناتىنا قاتىسىپ جاتقان رەسپۋبليكانىڭ تالانتتى جاس شاحماتشىلارىنا ساتتىلىك تىلەي وتىرىپ, ولاردىڭ حالىقارالىق چەمپيوناتتاعى جەتىستىكتەرىنە توقتالدى. ء«بىزدىڭ جاس شاحماتشىلارىمىز بىلتىر بىرىككەن اراب امىرلىكتەرىندە وتكەن چەمپيوناتتا جالپى كوماندالىق ەسەپتە 3-ورىندى يەلەندى. ولار قىتاي, ءۇندىستان, رەسەي سياقتى شاحمات سپورتى جاقسى دامىعان ەلدەردىڭ شاحماتشىلارىمەن تەڭ دارەجەدە ويىن كورسەتىپ, ەلىمىزدىڭ بەدەلىن حالىقارالىق دودالاردا بيىكتەردەن كورسەتىپ ءجۇر. رەسپۋبليكالىق شاحمات فەدەراتسياسى تاراپىنان 45 شاحماتشىعا گرانت ءبولىنىپ, ولار كاسىبي جاتتىقتىرۋشىلار دايىندىعىنان ءوتتى. بۇگىندە رەسپۋبليكادا شاحمات كاسىبي دەڭگەيدە عانا ەمەس, قوعامدىق سپورت تۇرىندە دامىپ كەلەدى. بۇل باعىتتا رەسپۋبليكالىق شاحمات فەدەراتسياسى بىلتىر ەل وڭىرلەرىندە 20 فيليال اشىپ, «شاحمات كەرۋەنى» جوباسىن جۇزەگە اسىرعان بولاتىن. ال بيىل وسى شارالار جالعاسىن تاۋىپ, شاحماتتان «Senat Open» ءتۋرنيرى ءوتىپ جاتىر. الداعى ۋاقىتتا دا ەلىمىزدە شاحمات تۋرنيرلەرى جالعاسىن تابا بەرەتىن بولادى», دەپ اتاپ ءوتتى فەدەراتسيا وكىلى.
26-جاسوسپىرىمدەر اراسىنداعى ازيا چەمپيوناتى تازا ەكولوگيا جانە تۇراقتى دامۋ ۇرانىمەن ءوتىپ جاتىر. تۋرنير قاتىسۋشىلارى قولدانىلعان بارلىق پلاستيك تۇرلەرىن ارنايى ۆەلوشرەدەردە قايتا وڭدەۋدەن وتكىزىپ, جەڭىمپازدارعا سىيعا تارتىلعان كۋبوكتەردىڭ قايتا وڭدەلگەن ونىمدەردەن جاسالعانىنا كوپشىلىكتىڭ نازارىن اۋداراتىن بولادى. بۇل وسكەلەڭ ۇرپاقتى قورشاعان ورتانىڭ دامۋىنا ۇلەس قوسۋعا, تابيعاتتى ايالاۋعا ۇندەيدى.
الەمنىڭ شاحمات جانكۇيەرلەرىنىڭ نازارى اۋىپ وتىرعان چەمپيوناتتى «Kazsport» ارناسىنىڭ سايتىنان, سونداي-اق بالۋان شولاق اتىنداعى سپورت كەشەنىنە كەلىپ تاماشالاۋعا بولادى.
الماتى
