فوتو: gov.kz
«قالاعا بەرگىسىز اۋىل» تۇجىرىمداماسىن ءىس جۇزىندە ىسكە اسىرۋىمەن ايگىلى «رودينا» اگروفيرماسى – بىرەگەي ەكوجۇيەسى قالىپتاسقان كاسىپورىن. مۇندا ءسۇت ونىمدەرىن ءوندىرۋدىڭ تولىق تسيكلى جولعا قويىلعان, بۇل كۇنىنە 80-90 توننا ءونىم بەرەدى. جاڭا تابيعي ءسۇت جىل بويى قولجەتىمدى. ەكى مىڭعا جۋىق ادام تۇراتىن اۋىلدا قالاداعى ينفراقۇرىلىمنىڭ بارلىعى بار: جايلى ۇيلەر, كەڭ كوشەلەر, دەمالىس ساياباعى, قوس باعا بەلگىلەرى بار سۋپەرماركەت (اۋىلداعى قىزمەتكەرلەر مەن كەلۋشىلەر ءۇشىن), سۇلۋلىق سالونى, مەيرامحانا, شاعىن ءدامحانا, فيتنەس, جەل گەنەراتورلارى, ت.ب. بالاباقشاداعى بالالار مەن مەكتەپ وقۋشىلارى تەگىن تاماقتانادى. ءسۇت زاۋىتىنىڭ جۇمىسشىلارىنىڭ ورتاشا جالاقىسى 330 مىڭ تەڭگەنى قۇرايدى. كاسىپورىن ءونىمنىڭ نەگىزگى بولىگىن ەلوردا نارىعىنا جەتكىزەدى.
قازىرگى تاڭدا اگروفيرمادا اۋدانى 2,9 مىڭ شارشى مەتر بولاتىن سيىر ساۋاتىن جاڭا الاڭ سالىنىپ جاتىر. بۇل ءسۇت ءوندىرىسىن ەكى ەسەگە ارتتىرۋعا مۇمكىندىك بەرەدى.
سونداي-اق «رودينا» اۋىلىندا سەرىك جۇمانعارينگە وبلىستاعى كوكتەمگى ەگىس جۇمىستارىنىڭ بارىسى جانە شەگىرتكەگە قارسى جەردى وڭدەۋ شارالارى تۋرالى باياندالدى. ۆيتسە-پرەمەر اقمولا وبلىسىنىڭ ءىرى اۋىل شارۋاشىلىعى وندىرۋشىلەرىمەن دە كەزدەستى.
كەزدەسۋدە ەكى فەرمەر ءوز قاجەتتىلىكتەرى ءۇشىن ينەرتتى ماتەريالداردى ساتىپ الۋدىڭ قيىندىعى ماسەلەسىن كوتەردى, ول ءۇشىن ارنايى رۇقسات الۋ قاجەت. ولاردى ساتىپ الۋ ءتارتىبىن جەڭىلدەتۋ مۇمكىن بە دەگەن سۇراق قىزىقتىردى.
سەرىك جۇمانعارين بۇل ماسەلەنى كەلەسى اپتادا ونەركاسىپ جانە قۇرىلىس مينيسترلىگى وكىلدەرىنىڭ قاتىسۋىمەن وتەتىن كەڭەستە قاراۋدى تاپسىردى.
باسقا فەرمەرلەر ءتيىمدى جانە ۇتىمدى پايدالانۋ قاعيداتىن ساقتاي وتىرىپ, اۋىلشارۋاشىلىق جەرلەرىنىڭ ماكسيمالدى كولەمىن ۇلعايتۋ باعىتىندا قايتا قاراۋدى سۇرادى.سونداي-اق ءىرى اۋىل شارۋاشىلىعى وندىرۋشىلەرى مەن شارۋا قوجالىقتارى اراسىنداعى جەر سالىعى مولشەرىندەگى ۇلكەن ايىرماشىلىق پروبلەماسى ايتىلدى. بۇل رەتتە ولار تىڭايتقىشتارعا, تەحنيكاعا جانە ت. ب. سۋبسيديالاردى بىردەي الادى. فەرمەرلەر سونىمەن قاتار حالىقارالىق تاجىريبە نەگىزىندە سۋبسيديالار الۋ ءۇشىن ستاندارتتاردى ازىرلەۋ قاجەتتىگىن اتاپ ءوتتى.
