رەسمي مالىمەت بويىنشا, قازاقستاندا تۇتىنۋ نەسيەسىن 8,4 ميلليون ادام پايدالانادى. ونىڭ ىشىندە 1,5 ميلليون ادام نەسيەسىن ۋاقىتىندا تولەي المايدى. وتكەن اپتادا پارلامەنت نەسيەلەۋدەگى تاۋەكەلدەردى ازايتۋ تۋرالى زاڭ قابىلدادى.
قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگى (قندرا) باسشىسىنىڭ ورىنباسارى ولجاس قيزاتوۆ جۋرناليستەرمەن كەزدەسكەن كەزدە بۇل زاڭ مەرزىمى ءوتىپ كەتكەن نەسيەسى بار ازاماتتاردىڭ ماسەلەسىن قالاي رەتتەيتىنىن ايتىپ بەردى.
«قازىرگى تاڭدا 1,5 ميلليون ادامنىڭ بانكتەردەن, ميكروقارجى ۇيىمدارىنان جانە كوللەكتورلىق اگەنتتىكتەردەن 90 كۇننەن استام تولەنبەگەن قارىزى بار. ەندى نەسيە بەرۋشىلەرمەن جۇمىس ىستەۋ كەرەك. 1,5 ميلليون حالىقتىڭ اراسىندا زەينەتكەرلەر, كوپ بالالى انالار, مۇمكىندىگى شەكتەۋلى جاندار بار. ءبىز قارىزى بار وسال ادامداردى انىقتايمىز جانە نەسيە بەرۋشىلەرمەن نەسيەنى كەشىرۋ تۋرالى سويلەسەمىز. ءبىز ولارعا نەسيەنى كەشىرۋ مىندەتىن قويا المايمىز», دەدى ول.
ونىڭ ايتۋىنشا, ميكروقارجى ۇيىمدارى بولسىن, بارلىعى بىردەي قارىزدى كەشىرە بەرمەيدى. ويتكەنى ولاردىڭ كاپيتالى ازايۋى مۇمكىن. كەيبىرەۋلەرگە قارىزىن ءبولىپ تولەۋگە مۇمكىندىك بەرۋ, ال باسقالارعا بەلگىلى ءبىر سومانى كەشىرۋ ءتارىزدى نۇسقالار قاراستىرىلىپ جاتىر.
قيزاتوۆ ەندى وتانداستارىمىزدىڭ نەسيەسى كەشىرىلەدى دەپ ناقتى ايتۋ مۇمكىن ەمەستىگىن, مۇنى كرەديتورلاردىڭ وزدەرى شەشەدى دەپ باسا ايتتى. ونىڭ ايتۋىنشا, پروبلەمالىق نەسيەلەر بويىنشا ءتيىستى جۇمىستار جىل سوڭىنا دەيىن اياقتالادى.
سونىمەن قاتار, قندرا تۇتىنۋشىلىق نەسيەلەردىڭ ماكسيمالدى سوماسىن شەكتەۋدى جانە مەرزىمى وتكەن نەسيەلەرى بار بورىشكەرلەرگە تىيىم سالۋدى جوسپارلاپ وتىرعان ايتتى.
«بولاشاقتا قارجىلىق قيىندىقتارعا تاپ بولاتىن جاڭا قارىز الۋشىلار بولماۋى ءۇشىن ءبىز زاڭمەن تىيىم سالعىمىز كەلەدى: ەگەر ونىڭ باسقا بانكتەن نەمەسە ميكروقارجى ۇيىمىنان مەرزىمى وتكەن نەسيەسى بولسا, وندا پروبلەمالىق نەسيەنى جاپقانعا دەيىن جاڭا نەسيە الۋعا تىيىم سالۋ كەرەك.
سونداي-اق تۇتىنۋشىلىق نەسيەنىڭ ماكسيمالدى مولشەرىن شەكتەگىمىز كەلەدى. ولاردىڭ كوبىنە 100 ميلليون تەڭگەدەن اساتىن, كەيدە 1 ميلليارد تەڭگەگە جەتەتىن سوماعا شىعارىلاتىنىن كورىپ ءجۇرمىز. بۇل بيزنەس ءۇشىن الىنعان نەسيە بولسا كەرەك. قازاقستان حالقىنىڭ نەسيەلىك قارىزىن كوبەيتپەۋ ءۇشىن ءبىز تۇتىنۋشىلىق نەسيەنىڭ جوعارعى شەگىن شەكتەگىمىز كەلەدى», دەدى قيزاتوۆ.
بۇل رەتتە قندرا توراعاسىنىڭ ورىنباسارى اتالعان ليميت ءالى بەلگىلەنبەگەنىن ءتۇسىندىردى. بۇل ماسەلە بانك قاۋىمداستىعىمەن بىرلەسىپ زەرتتەلىپ جاتىر.
