جۇرەگى وڭ جاعىنداعى جىگىت

قالاي بىلمەي جۇرگەنبىز؟.. «كازتالوۆ اۋىلىندا ادام تابي­عاتىندا سيرەك كەزدەسەتىن جۇرەگى وڭ جاقتا ورنالاسقان ازامات بار», دەگەن اڭگىمەنى ەستىگەندە سەنبەدىم. ال ول كىم دەيسىز عوي؟... اۋداندىق كىتاپحانا عيماراتىندا كۇزەتشى بولىپ ىستەيتىن تالاپ نىعمەتوۆتىڭ 36 جاسقا تولىپ كەتكەن امانگەلدى دەگەن ۇلى. اعانىڭ ۇيىنە باردىم. زايىبى روزا اپاي قارسى الدى. كەلگەن شارۋامدى ايتقاننان كەيىن: «ءيا, ءبارى دۇرىس, بالامىزدىڭ جۇرەگى وڭ جاقتا. باسقا بالالارىمداي ەرجەتتى. قازىرگى كۇندە وتباسىلى. ورال قالاسىندا تۇرادى. دەنساۋلىعىندا ەش ايىرماشىلىق جوق», – دەدى. اپايدان كەيىن تالاپ اعا اڭگىمەگە ارالاستى. «مىنانداي قىزىق ايتايىن, – دەدى. – امان­گەلدىنىڭ 10 جاستاعى كەزى. بالام قورانىڭ جانىندا ويناپ جۇرگەن. سول كەزدە اۋىلداعى تەنتەك بۇقا ىرگەسىنە سۋ كەتىپ تۇرعان قورانىڭ جانىنا سۇيكەندى. قۇلاعالى تۇرعان قورانىڭ جاقتاۋى بۇقانىڭ كۇشىنە شىداسىن با؟ قابىرعا بالانىڭ ۇستىنە قۇلادى. ونى توپىراقتىڭ استىنان شىعارعان سوڭ, دارىگەرگە الىپ باردىق. جاڭادان كەلگەن جاس حيرۋرگ وراز ساريەۆ بالانىڭ جۇرەگىن تىڭدادى. جۇرەك سوقپاعاننان كەيىن, ول شوشىپ كەتتى. ءمان-جايدى جانە بالانىڭ ەسەپتە تۇرعانىن بىلگەننەن كەيىن ەم قابىلدادى. وسى قىزىق جايت ەسىمىزدە قالدى». قازىرگى كۇندە امانگەلدى قۇ­رىلىس جۇمىسىندا ىستەپ ءجۇر ەكەن. بىراق, ايتۋىنشا دەنەسىنە كۇش تۇسەتىن كورىنەدى. ويتكەنى, جۇرەگى وڭ جاقتاعىلار سولاقاي بولۋى كەرەك ەكەن. سوندا دەنەگە كۇش تۇسپەيدى دەگەن ۇستانىم بار. بۇدان كەيىن كازتالوۆ ورتا­لىق­تاندىرىلعان اۋرۋحانا دي­رەكتورىنىڭ ورىنباسارى بوتاگوز عۇماروۆانى اڭگىمەگە تارتتىق. – امانگەلدى نىعمەتوۆ ءدارى­گەرلىك ەسەپتە تۇرادى. جىل سايىن بايقاۋدان وتكىزەمىز. دەنساۋلىعى قالىپتى. مۇنداي جاعدايلار ادامدارعا تۇقىم قۋالاۋشىلىق ارقىلى بەرىلەدى. اۋدانىمىزدا جۇرەگى وڭ جاقتا ورنالاسقان ءبىر عانا ادام وسى ازامات بولىپ تابىلادى. ادام بالاسىنىڭ قۋان­عاندا, قايعىرعاندا جۇرەگى اتشا تۋلايدى. سول كەزدە ءبارى دە سول جاعىن ۇستايتىنى انىق. امانگەلدىگە دەنساۋلىعىڭ مىقتى بولسىن دەيمىز. گۇلفيا كوشباەۆا, جۋرناليست. باتىس قازاقستان وبلىسى, كازتالوۆ اۋدانى.