وسى ورايدا «Amanat» پارتياسى «تازا بەيسەنبى» رەسپۋبليكالىق ەكولوگيالىق اكتسياسىن باستادى. ەلدى مەكەندەر مەن كورىكتى جەرلەردى قوقىستان تازالاۋ جۇمىستارى ءوڭىرىمىزدىڭ بارلىق اۋدانى مەن قالاسىندا ۇيىمشىلدىقپەن ءوتتى.
«تازا بەيسەنبى» جوباسىنىڭ ماقساتى – اينالانى تازا ۇستاپ, قورشاعان ورتانى, تابيعاتتى ايالاۋعا, وسكەلەڭ ۇرپاقتىڭ تۋعان جەرىنە قۇرمەتپەن قاراۋعا شاقىرۋعا باعىتتالعان. بەيسەنبىلىك ءىس-شاراعا تەك ۇلان اۋدانىنىڭ تاۆريا اۋلىندا عانا 150-دەن اسا ادام قاتىسىپ وتىر», دەيدى «Amanat» پارتياسىنىڭ شىعىس قازاقستان وبلىستىق فيليالىنىڭ توراعاسى سايرانگۇل ءجۇمادىلوۆا.
تاۆريا اۋىلدىق وكرۋگىندە وتكەن «تازا بەيسەنبى» اكتسياسى كەزىندە 1000-نان اسا قاپ قوقىس جينالدى. شاراعا پارتيا جانىنداعى «جاستار رۋحى» جاستار قاناتىنىڭ ەرىكتىلەرى, دەپۋتاتتار, باستاۋىش پارتيالىق ۇيىمداردىڭ مۇشەلەرى جانە وبلىستىق, اۋداندىق پارتيا فيليالدارىنىڭ قىزمەتكەرلەرى مەن اۋىل تۇرعىندارى قاتىستى.
«اۋلىمىزدىڭ ماڭايىن تازالاۋ ءۇشىن بۇگىن «تازا بەيسەنبى» اكتسياسىنا ءوز ۇلەسىمدى قوسىپ, مەن دە قاتىستىم. تازالىقتى ءار ادام وزىنەن باستاۋى قاجەت دەپ سانايمىن. سوندىقتان بۇگىن ءىس-شارا وتەدى دەگەندە, وعان بەيجاي قاراي المادىم. ءبىزدىڭ ەلىمىزدىڭ كەز كەلگەن جەرىنىڭ تابيعاتى اسەم. سول اسەم تابيعاتتى قورعاۋ – ءبىزدىڭ ازاماتتىق بورىشىمىز. وسىنداي يگى ءىس-شارالار مەن ەكولوگيالىق اكتسيالار اپتا سايىن ۇيىمداستىرىلسا, حالىق تاراپىنان قولداۋعا يە بولادى دەپ ەسەپتەيمىن», دەيدى تاۆريا اۋىلدىق وكرۋگىنىڭ تۇرعىنى وقان جارقىن.
ايتىپ وتكەندەي, مۇنداي ءىس-شارا بۇل كۇنى ايماقتىڭ ءار وڭىرىندە ۇيىمداستىرىلدى.
شىعىس قازاقستان وبلىسى,
ۇلان اۋدانى
