ءسوز باسىندا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ مەملەكەت باسشىسى ءوز جولداۋىندا جاڭا سالىق كودەكسىن ازىرلەۋدى ەكى جىل بۇرىن تاپسىرعانىن ايتتى. پرەزيدەنت سالىق ساياساتى ءادىل, اشىق, تۇراقتى جانە بارلىعىنا بىردەي تۇسىنىكتى بولۋى كەرەك ەكەنىن بىرنەشە رەت اتاپ وتكەن بولاتىن.
«بۇگىندە قوعام جاڭا سالىق زاڭناماسىنان ۇلكەن ءۇمىت كۇتەدى. جاڭا زاڭ جوباسى قازىرگى سالىق ساياساتىنا قاتىستى بارلىق ماسەلەنى شەشىپ, پرەزيدەنت جاريالاعان جاڭا ەكونوميكالىق ساياساتتىڭ نەگىزىن قالاۋعا ءتيىس. سالىق جەڭىلدىكتەرى تەك فيسكالدىق ماقساتتاردى كوزدەمەۋى جانە جەكەلەگەن سالالارعا لوببيزم جاساماۋى كەرەك. ولار بولاشاققا باعىتتالىپ, ەل ەكونوميكاسىنىڭ ۇزاقمەرزىمدى دامۋىمەن ءوزارا بايلانىستى بولۋعا ءتيىس», دەدى ول.
ە.قوشانوۆ قازىرگى سالىق كودەكسىندە ورتا بيزنەستى دامىتۋعا ءتيىستى جاعداي جاسالماي وتىرعانىن جەتكىزدى. كەرىسىنشە, ونداعى تالاپتار سالىق زاڭناماسىن بۇزىپ, ءتىپتى ونى اينالىپ وتۋگە يتەرمەلەيدى.
«ورتا بيزنەس ساپالى ەكونوميكانى دامىتۋدىڭ ناعىز قوزعاۋشى كۇشى بولۋى كەرەك. بۇل – حالىقارالىق تاجىريبە. ءبارىمىز بىلەتىندەي, ورتا تاپ قانشالىقتى كۇشتى بولسا, ەكونوميكا سونشالىقتى تۇراقتى جانە مىقتى بولادى. سوندىقتان ءبىز ورتا بيزنەستىڭ دامۋى ءۇشىن رەتتەۋشى جانە سالىقتىق جاعداي جاساۋىمىز كەرەك», دەپ اتاپ ءوتتى پارتيا توراعاسى.
ە.قوشانوۆ سالىق جۇيەسىنىڭ اشىقتىعىن قامتاماسىز ەتۋدىڭ باستى قۇرالى رەتىندە تسيفرلاندىرۋ ماسەلەسىنە ەرەكشە نازار اۋداردى. سالىقتىق اكىمشىلەندىرۋدىڭ سەرۆيستىك مودەلىنە كوشۋدى قامتاماسىز ەتۋ ءۇشىن تسيفرلاندىرۋ جۇمىسى تولىققاندى جۇرگىزىلۋگە ءتيىس.
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ دەپۋتاتتارعا جاڭا سالىق ساياساتىنىڭ نەگىزگى باعىتتارى تۋرالى ايتىپ بەردى.
مەملەكەت باسشىسى سالىقتار سانىن كەم دەگەندە 20%-عا قىسقارتۋ مىندەتىن قويدى. وسىعان بايلانىستى بىرىڭعاي جەر سالىعىن سالىقتىڭ جەكە ءتۇرى رەتىندە جويۋ, سونداي-اق الىمداردىڭ 6 ءتۇرىن جانە مەملەكەتتىك باجداردىڭ 5 ءتۇرىن قىسقارتۋ ۇسىنىلادى. بۇعان قوسا, ازاماتتاردىڭ زەينەتاقى تولەمدەرىن جەكە تابىس سالىعىنان بوساتۋ, سونداي-اق ء«سان-سالتاناتقا», ونىڭ ىشىندە جيىنتىق قۇنى 450 ملن تەڭگەدەن اساتىن جىلجىمايتىن م ۇلىك وبەكتىلەرىنە سالىناتىن سالىق مولشەرىن ارتتىرۋ جوسپارلانۋدا.
ءوز كەزەگىندە قارجى ءمينيسترى ءمادي تاكيەۆ سالىق ەسەپتىلىگىن قىسقارتۋ بويىنشا ۇسىنىلعان شارالارعا توقتالدى. بيزنەس سۋبەكتىلەرى دەكلاراتسيالار مەن سالىق ەسەپتەرىن ۋاقتىلى وتكىزبەگەنى ءۇشىن جاۋاپقا تارتىلمايدى. ەگەر سالىق مىندەتتەمەلەرى 1 ملن تەڭگەدەن كەم بولسا, م ۇلىك پەن جەرگە سالىناتىن, سونداي-اق زاڭدى تۇلعالاردىڭ كولىك قۇرالدارىنا سالىناتىن سالىق بويىنشا ەسەپ بەرۋدى الىپ تاستاۋ ۇسىنىلادى.
ءماجىلىستىڭ قارجى جانە بيۋدجەت كوميتەتىنىڭ توراعاسى, «Amanat» پارتياسى فراكتسياسىنىڭ مۇشەسى تاتيانا ساۆەلەۆا جاڭا سالىق كودەكسىنىڭ جوباسىن پارلامەنتكە ەنگىزۋ 2023 جىلعى جەلتوقساننان وسى جىلدىڭ تامىز ايىنا اۋىستىرىلعانىن ەسكە سالدى.
«مەرزىمى نەعۇرلىم كەيىنگە شەگەرىلگەن سايىن سالىق تولەۋشىلەردىڭ, ساراپشىلار قاۋىمداستىعىنىڭ, ينۆەستورلاردىڭ تۇسىنىسپەۋشىلىگى مەن كۇمانى سوعۇرلىم ارتا تۇسەدى. 2030 جىلعا دەيىنگى سالىق ساياساتىنىڭ تۇجىرىمداماسى ءالى قابىلدانعان جوق. تيىسىنشە, سالىقتىق ىنتالاندىرۋ تەتىگىن قاي تۇستا قوسۋ, قاي تۇستا قاتاڭداتۋ كەرەك ەكەنى, بۇل قادامدار بيۋدجەت كىرىسىنە قالاي اسەر ەتەتىنى تۋرالى ناقتى كوزقاراس جوق», دەدى ول.
ۇكىمەت وكىلدەرى دەپۋتاتتاردىڭ جاڭا سالىق كودەكسىنە جانە قازىرگى سالىق ساياساتىنداعى ماسەلەلەردى شەشۋگە قاتىستى سۇراقتارىنا جاۋاپ بەردى.
جيىندى قورىتىندىلاي كەلە, ءماجىلىس سپيكەرى ەرلان قوشانوۆ ۇكىمەتكە جاڭا سالىق كودەكسى بويىنشا جۇمىستى جەدەلدەتۋ قاجەت ەكەنىن جانە قۇجات مەرزىمىندە ماجىلىسكە ەنگىزىلۋگە ءتيىس ەكەنىن اتاپ ءوتتى. بۇل جۇمىسقا دەپۋتاتتار, ساراپشىلار جانە ازاماتتىق قوعام وكىلدەرى قوسىلۋعا ءتيىس. بۇل جۇمىس بيۋدجەت كودەكسىنىڭ جوباسىمەن قاتار قاراستىرىلۋى كەرەك. وسى ماسەلە بويىنشا ءماجىلىس جانىنداعى قوعامدىق پالاتانىڭ جەكە وتىرىسى وتەدى.
