فوتو: ا.بايجۇمانوۆ
كەزدەسۋلەر كەزىندە مەملەكەت باسشىسى بەرگەن تاپسىرمالاردىڭ شاھاردا ورىندالۋ بارىسى, زاڭ شىعارۋ قىزمەتىندەگى مىندەتتەر جانە سەنات پەن ءماسليحاتتاردىڭ بىرلەسكەن جۇمىسىنىڭ جاڭا فورماتى تالقىلاندى. سونداي-اق سەناتورلار «Astana Motors» زاۋىتىنىڭ جاڭا بلوگىنىڭ قۇرىلىسىمەن تانىسىپ, ءوندىرىس ورنىنىڭ ەڭبەك ۇجىمىمەن نىساننىڭ دامۋ پەرسپەكتيۆالارىن تالقىلادى.
پالاتا سپيكەرى اتاپ وتكەندەي, مەملەكەت باسشىسى ۇكىمەتتىڭ كەڭەيتىلگەن وتىرىسىندا جانە ۇلتتىق قۇرىلتايدا بەلگىلەپ بەرگەن مىندەتتەردى ساپالى ىسكە اسىرۋ بارلىق دەڭگەيدەگى دەپۋتاتتاردىڭ كەشەندى ءارى جۇيەلى ءوزارا ءىس-قيمىلىن تالاپ ەتەدى. سوندىقتان ءماسليحات دەپۋتاتتارىمەن كەزدەسۋدە جەرگىلىكتى وكىلدى ورگانداردى زاڭ شىعارۋ جۇمىسىنا جۇمىلدىرۋ ماسەلەسىنە باسا ءمان بەرىلدى. مۇنداي قادام جاڭا ەكونوميكالىق مودەلگە كوشۋ اياسىندا الەۋمەتتىك-ەكونوميكالىق سالانى دامىتۋعا, اگروونەركاسىپتىك كەشەندى ىلگەرىلەتۋگە, سۋ رەسۋرستارىن ۇتىمدى پايدالانۋعا جانە ينفراقۇرىلىمدى جەتىلدىرۋگە تىڭ سەرپىن بەرۋگە ءتيىس.
«مەملەكەت باسشىسىنىڭ ەكونوميكانى ىرىقتاندىرۋ جونىندەگى شارالار تۋرالى جارلىعى ەكونوميكانى ءارتاراپتاندىرۋ جانە وتاندىق بيزنەس-احۋالدى جاقسارتۋ ءۇشىن ەلدەگى ەكونوميكالىق رەفورمالاردى جەدەلدەتۋدى كوزدەيدى. ەكونوميكالىق ءوسۋدى ىنتالاندىرۋ جولىندا ينفراقۇرىلىمدى دامىتۋ ايرىقشا ماڭىزعا يە. بيىل ەلىمىزدە جىلۋ جەلىلەرىن جاڭعىرتۋ, اۆتوجولداردى رەكونسترۋكتسيالاۋ جانە سالۋ باعىتىندا اۋقىمدى جۇمىس جۇرگىزىلىپ جاتىر. الەۋمەتتىك از قامتىلعان ساناتتاعى ازاماتتار ءۇشىن جاڭا تۇرعىن ءۇي باعدارلاماسى ىسكە قوسىلدى. وسىنداي كەزەڭدە ەكونوميكادا قۇرىلىمدىق وزگەرىستەردى دايەكتى تۇردە جۇرگىزۋ قاجەت. بۇل رەتتە ونىڭ تيىمدىلىگىن ارتتىرۋ, وتاندىق وندىرۋشىلەردى قولداۋ, ەكونوميكاعا مەملەكەتتىڭ تىكەلەي قاتىسۋىن قىسقارتۋ سياقتى مىندەتتەردىڭ ماڭىزى زور. وسى باعىتتا ءبارىمىز بىرلەسىپ, ناتيجەلى جۇمىسىمىزدى ءارى قاراي جالعاستىرۋىمىز كەرەك», دەدى پالاتا توراعاسى.
سونداي-اق ماۋلەن اشىمباەۆ الماتى قازاقستاننىڭ ءىرى قارجى جانە ىسكەرلىك ورتالىعى رەتىندە ەلدىڭ ەكونوميكالىق دامۋىندا ەرەكشە ورىن الاتىنىن ايتتى. ول قالانىڭ الەۋەتىن تولىق پايدالانۋ ءۇشىن بارلىق مۇددەلى تاراپ كۇش بىرىكتىرۋ قاجەت ەكەنىن دە تىلگە تيەك ەتتى. الايدا, ەلەۋلى جەتىستىكتەرگە قاراماستان, شاھاردىڭ دامۋىنا جانە باسەكەگە قابىلەتتىلىگىنە كەرى اسەرىن تيگىزەتىن ماسەلەلەر دە بار. كەزدەسۋدە ولاردى شەشۋ جولدارى دا ءسوز بولدى.
سونىمەن قاتار ساپار بارىسىندا سەناتورلار ءال-فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىلارىمەن جانە ستۋدەنتتەرىمەن كەزدەستى. جيىنعا قاتىسۋشىلار مەملەكەت باسشىسى الماتىدا جاس عالىمدارمەن كەزدەسۋ كەزىندە بەلگىلەپ بەرگەن مىندەتتەرگە توقتالدى. سونداي-اق ءىس-شارادا عىلىمي كادرلار دايارلاۋ, ولاردىڭ بىلىكتىلىگىن ارتتىرۋ, زەرتتەۋ جوبالارىنا الەۋمەتتىك جانە قارجىلىق قولداۋ كورسەتۋ, يننوۆاتسيالىق ادىستەمەلەر مەن تەحنولوگيالاردى ەنگىزۋ باعىتتارى بويىنشا ۇسىنىستار ايتىلدى.
سەنات توراعاسى عاسىرعا جۋىق تاريحى بار ۋنيۆەرسيتەت ۇلتىمىزدىڭ ادامي كاپيتالىن دامىتۋ جانە كادرلىق الەۋەتىن نىعايتۋ جولىندا تاريحي ءرول اتقارعانىن, سونداي-اق, عىلىم مەن يننوۆاتسيانى دامىتۋعا ۇلكەن ىقپال ەتىپ كەلە جاتقانىن اتاپ ءوتتى.
«پرەزيدەنتىمىز قاسىم-جومارت كەمەل ۇلى توقاەۆتىڭ باستاماسىمەن ادىلەتتى قازاقستان قۇرۋعا جانە ازاماتتاردىڭ ءال-اۋقاتىن ارتتىرۋعا ارنالعان جۇيەلى جۇمىس اتقارىلىپ جاتىر. وسىنداي كەشەندى جاڭعىرۋلار اياسىندا تالانتتى, بەلسەندى جاستارعا جۇيەلى تۇردە قولداۋ كورسەتۋگە ۇلكەن كوڭىل ءبولىنىپ كەلەدى. قازىرگى تاڭدا جاستاردىڭ ساپالى ءبىلىم الۋىنا, ولاردىڭ عىلىممەن, شىعارماشىلىقپەن, سپورتپەن شۇعىلدانۋىنا جانە جاس مامانداردى جۇمىسپەن قامتۋعا ءتيىستى جاعداي جاسالىپ جاتىر. وسى رەتتە ادىلەتتى قازاقستان قۇرۋ بارشامىز ءۇشىن ورتاق مىندەت ەكەنىن ءتۇسىنۋىمىز كەرەك. ونىڭ ءساتتى ىسكە اسىرىلۋى ءار ازاماتتىڭ بەلسەندىلىگىنە بايلانىستى. جاستار قاي كەزەڭدە دە جاڭعىرۋدىڭ قوزعاۋشى كۇشى ەكەنى بەلگىلى. بۇل – ۇلكەن جاۋاپكەرشىلىك. وسى جولدا ءاردايىم بىرلىك پەن ىنتىماق, ادىلدىك پەن جاۋاپكەرشىلىك, زاڭ مەن ءتارتىپ, ەڭبەكقورلىق پەن كاسىبي بىلىكتىلىك سياقتى ىرگەلى قۇندىلىقتارعا تابان تىرەۋ قاجەت», دەگەن ماۋلەن اشىمباەۆ مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالار تۋرالى دا ايتىپ ءوتتى.
الماتىعا ساپار كەزىندە سەنات توراعاسى الماتى قالاسى اكىمدىگىنىڭ عيماراتىنا باردى, سونداي-اق, قر تجم سەيسمولوگيالىق بايقاۋ جانە زەرتتەۋلەر ۇلتتىق عىلىمي ورتالىعىنىڭ قىزمەتىمەن تانىستى. ودان بولەك, اباي اتىنداعى دارىندى بالالارعا ارنالعان رەسپۋبليكالىق مامانداندىرىلعان ورتا مەكتەپ-ينتەرناتىنىڭ قۇرىلىسىنا ارنالعان جيىنعا قاتىستى جانە «Astana Motors» زاۋىتىنىڭ جاڭادان سالىنىپ جاتقان بلوگىمەن تانىسىپ, ونەركاسىپ ورنىنىڭ ەڭبەك ۇجىمىمەن كەزدەستى.
