وسى كىسىنىڭ اناسى راحيما عالياكبارقىزى اقمولا قالاسىنىڭ قالىپتاسۋىنا اتسالىسقان كوپەس حالفين اۋلەتىنەن ەدى. راحيما حالفينانىڭ جاس كۇنىندە ۇلتتىق كيىمدەگى سۋرەتى قايراتكەر وزبەكالى جانىبەكتىڭ «ەحو» (جاڭعىرىق) اتتى جيناعىنا ەنگەن.
بۇل ەسكى سۋرەت حح عاسىر باسىندا اقمولا قالاسىندا تۇسىرىلسە كەرەك. «Cabinet Portrait» اتاۋى سول شاقتا فوتوگرافيا ماركاسى مەن ءستيلىنىڭ ەۋروپادان جەتكەنىن اڭعارتادى.
مارقۇم گۇلنار حايرەتدينقىزىنىڭ ايتۋىنشا, تۇرەگەپ تۇرعان – ناعاشى اعاسى سىزدىق ءحالفيننىڭ جۇبايى. ال وتىرعان ەكەۋدىڭ سول جاعىنداعى قازاقى كەلبەتتى حانىم – ءماستۋرا ابىلايقىزى (بۇل ابىلاي – ايگىلى اعا سۇلتان قوڭىرقۇلجانىڭ ۇلى). ول – عالياكبار ءحالفيننىڭ ايەلى, ياعني گۇلنار حايرەتدينقىزىنىڭ ناعاشى اجەسى.
حالفين اۋلەتىنىڭ كوبى باقيعا كوشكەندە اقمولانىڭ ەسكى قورىمىنا قويىلعان. حان كەنە ساربازدارى, الاش قايراتكەرى سماعۇل سادۋاقاس ۇلى, ت.ب. تۇلعالار سۇيەگى جەرلەنگەن «قاراوتكەل» زيراتى باس قالانىڭ بايقوڭىر اۋدانى («جاستار» شاعىن اۋدانى) اۋماعىندا تۇر.
بۇگىندە استانادا ەسىمى كوپ اتالمايتىن كوپەس حالفين اۋلەتى الاش قوزعالىسىنا ەداۋىر قارجى بولگەن. 1-گيلديالى كوپەس ءۋالي حالفيننەن تارايتىن سىزدىق, ءابدىراحمان, عالياكبار قىتايدىڭ, بۇحارانىڭ, تۇركىستاننىڭ, رەسەيدىڭ تۇكپىر-تۇكپىرىمەن ساۋدا-ساتتىق جاساپ, اقمولانىڭ ەكونوميكاسى مەن مادەنيەتىن كوتەرگەنى ارحيۆ دەرەكتەرىندە حاتتالىپ تۇر.
ەلوردا ارقا توسىنە كوشكەنگە دەيىن ەسكى ورتالىقتا وسى اۋلەتتىڭ قوس قاباتتى بىرنەشە ءۇيى تۇردى. ول عيماراتتار بولشەۆيكتەر كەلگەندە ءتۇرلى مەكەمەگە بەرىلگەنى ءمالىم.
سابىر ءشارىپ,
PhD
