ال تەكسەرۋ شارالارى جوسپارلى, جوسپاردان تىس جانە رەيدتىك فورماتتا وتەدى. ياعني, باقىلاۋ جۇمىستارى بەكىتىلگەن جىلدىق جوسپار نەگىزىندە جانە تۇرعىنداردان تۇسكەن شاعىمدار بويىنشا جۇرگىزىلسە, بۇعان قوسا ءورت جانە گاز قاۋىپسىزدىگىن قامتاماسىز ەتۋ ماقساتىندا بىرلەسكەن رەيدتەر دە ۇيىمداستىرىلادى.
«2025 جىلى 41 نىسانعا قاتىستى 28 تەكسەرۋ جۇرگىزىلدى. ناتيجەسىندە 19 ايىپپۇل سالىنعان. ايىپپۇلدار اكىمشىلىك قۇقىق بۇزۋشىلىق تۋرالى كودەكستىڭ 306-بابى 1-بولىگى, 298-بابى 1-بولىگى جانە 462-بابى 3-بولىگى بويىنشا سالىندى», دەيدى مامان.
سونىمەن قاتار كاسىپكەرلەرگە انىقتالعان كەمشىلىكتەردى جويۋ تۋرالى نۇسقامالار بەرىلگەن.
«اتالعان 41 نىساننىڭ ىشىندە: 3 نىسانعا – تابيعي گاز نەگىزىندە, 22 نىسانعا – گاز باللوندارى تۇرعىسىندا, 16 نىسانعا – گازگولدەرلەر بويىنشا كەمشىلىكتەردى جويۋ بويىنشا نۇسقامالار بەرىلدى», دەدى مامان.
ماماننىڭ ايتۋىنشا, تەكسەرۋ بارىسىندا قايتالانىپ كەزدەسەتىن زاڭبۇزۋشىلىقتار بار.
«ەڭ ءجيى كەزدەسەتىن ماسەلەلەردىڭ قاتارىندا گاز جابدىقتارىنا ۋاقىتىلى تەحنيكالىق قىزمەت كورسەتىلمەۋى, گاز اناليزاتورلارىنىڭ بولماۋى, جەلدەتۋ جۇيەسىنىڭ دۇرىس جۇمىس ىستەمەۋى بار. سونداي-اق گاز باللوندارىن زاڭسىز پايدالانۋ, گاز جۇيەسىنە ءوز بەتىنشە وزگەرىس ەنگىزۋ, باللونداردى اس ۇيدە نەمەسە جىلۋ كوزدەرىنە جاقىن ساقتاۋ, ارنايى بەكەتتەردىڭ ورنىنا اۆتوگاز قۇيۋ ستانتسيالارىندا تولتىرۋ, ءتۇتىن مۇرجالارى مەن جەلدەتكىشتەردىڭ تالاپقا ساي بولماۋى سياقتى ورەسكەل بۇزۋشىلىقتار انىقتالىپ جاتادى», دەيدى راقىمجان بەكتانوۆ.
زاڭ تالاپتارىنا سالعىرت قاراعان كاسىپكەرلەرگە قولدانىلاتىن اكىمشىلىك شارالار دا قاتاڭ. ءتارتىپ بۇزعاندارعا ايىپپۇل سالىنىپ, كەمشىلىكتەردى تۇزەتۋ جونىندە نۇسقاما بەرىلەدى. ال قاجەت بولعان جاعدايدا نىساننىڭ قىزمەتى ۋاقىتشا توقتاتىلىپ, ءتىپتى تۇپكىلىكتى جابىلۋى دا مۇمكىن. وسى رەتتە ايتا كەتەيىك, نىسان جۇمىسىنا نۇكتە قويۋ تەك سوت شەشىمى نەگىزىندە عانا جۇزەگە اسادى.
ماماننىڭ ايتۋىنشا, قوعامدىق تاماقتانۋ ورىندارىندا گاز باللوندارىن قولدانۋ ءتارتىبى دە قاتاڭ رەتتەلگەن. اتاپ ايتقاندا, باللوندار ارنايى قاۋىپسىزدىك تالاپتارىنا ساي ورنالاستىرىلىپ, نىسان ءتيىستى ورتكە قارسى قۇرالدارمەن جاراقتاندىرىلۋى ءتيىس. ال كەيبىر تەحنيكالىق جاعدايلاردا عيمارات ىشىندە گاز باللوندارىن پايدالانۋعا شەكتەۋ قويىلادى.
بۇگىندە ەلورداداعى تۇرعىن ۇيلەردىڭ ءبىرىنشى قاباتىندا ورنالاسقان ءدامحانالار مەن اسحانالاردىڭ جايى دا ەرەكشە باقىلاۋعا الىنعان.
«قازاقستان رەسپۋبليكاسىنىڭ «گاز جانە گازبەن جابدىقتاۋ تۋرالى» زاڭىنا سايكەس, ەكى قاباتتان جوعارى تۇرعىن ۇيلەردە گاز باللوندارىن ساقتاۋعا نەمەسە پايدالانۋعا تىيىم سالىنادى. بۇل تالاپ تۇرعىنداردىڭ قاۋىپسىزدىگى ءۇشىن ەنگىزىلگەن. سەبەبى مۇنداي نىسانداردا گازدى دۇرىس پايدالانباۋ – زور قاۋىپتى جاعدايعا اكەلۋى مۇمكىن», دەيدى مامان ر. بەكتانوۆ.
ونىڭ سوزىنشە, كاسىپكەرلەر گاز جابدىقتارىنىڭ قاۋىپسىزدىگىنە تۇراقتى تۇردە ىشكى باقىلاۋ جۇرگىزۋگە مىندەتتى. اتاپ ايتقاندا, جىلىنا كەمىندە ءبىر رەت تولىق تەحنيكالىق تەكسەرۋ جاسالۋى ءتيىس بولسا, كەيبىر قۇرىلعىلاردىڭ جاي-كۇيى ءار التى اي سايىن ءجىتى تەكسەرىلۋى قاجەت. ەڭ باستىسى, بۇل جۇمىستاردى تەك ارنايى ليتسەنزياسى بار گاز قىزمەتى ماماندارى عانا جۇرگىزۋى ءتيىس.
ايتا كەتەرلىگى, قاۋىپسىزدىك ماسەلەسى – تەك قۇزىرلى ورگانداردىڭ عانا مىندەتى ەمەس, ءاربىر تۇرعىننىڭ ازاماتتىق جاۋاپكەرشىلىگى مەن قىراعىلىعىنا تىكەلەي بايلانىستى.
«ەگەر گاز ءيىسىن سەزسەڭىز نەمەسە كۇماندى جاعداي بايقاساڭىز, دەرەۋ ءتيىستى قىزمەتتەرگە, اتاپ ايتقاندا, 104 – اپاتتىق گاز قىزمەتىنە, 112 نەمەسە 101 – توتەنشە جاعدايلار قىزمەتىنە نەمەسە Komek 109 – قالالىق مونيتورينگ ورتالىعىنا حابارلاۋ قاجەت», دەيدى مامان.
«قازىرگى ۋاقىتتا گاز باللوندارىن QR-كود ارقىلى تسيفرلىق تاڭبالاۋ جۇيەسىن ەنگىزۋ جوسپارلانىپ وتىر. بۇل – باللونداردىڭ قايدا تولتىرىلعانىن جانە قاشان تەكسەرىلگەنىن باقىلاۋعا مۇمكىندىك بەرەدى», دەيدى راقىمجان بەكتانوۆ.
