فوتو: gov.kz
9 ماۋسىمعا دەيىن سوزىلاتىن ءدۇبىرلى دودادا پاريج وليمپياداسىنا قاتىسقان بالۋانداردىڭ بارلىعى, باسقا دا سپورتشىلار كۇش سىناسادى. جارىس جولىنا شىعاتىن 313 قاتىسۋشىنىڭ 134-ءىنىڭ قورجىنىندا جولداما بار. گرەك-ريم كۇرەسىنەن وتەتىن باسەكەدە قازاق ەلى نامىسىن ايدوس سۇلتانعالي (60 كگ), دەمەۋ جادىراەۆ (77 كگ), نۇرسۇلتان تۇرسىنوۆ پەن ءشامىل وجاەۆ (86 كگ) جانە ءالىمحان سىزدىقوۆ (130 كگ) قورعايدى. ەركىن كۇرەس شەبەرلەرىنىڭ تارتىسىندا ازامات داۋلەتبەكوۆ (86 كگ), الىشەر ەرعالي مەن ريزابەك ايتمۇحان (97 كگ) جانە يۋسۋپ باتىرمۇرزاەۆتىڭ (125 كگ) ونەرىن تاماشالايمىز. ايەلدەر كۇرەسىنەن ەمما تيسينا مەن مارينا سەدنەۆا (55 كگ), ديانا كايۋموۆا مەن يرينا كۋزنەتسوۆا (59 كگ), يرينا كازيۋلينا (65 كگ) جانە ءجاميليا باقبەرگەنوۆا مەن گۇلمارال ەركەباەۆا (72 كگ) بوزكىلەمگە شىعادى.
– بۇل وليمپيادا قارساڭىنداعى ەڭ سوڭعى سىناق. بۋداپەشتەگى باسەكەدەن كەيىن قورىتىندى رەيتينگ شىعارىلادى. سونىڭ نەگىزىندە تورتجىلدىقتىڭ باستى دوداسىنىڭ جەرەبەسى تارتىلادى. ياعني رەيتينگتە جوعارى تۇرعان بالۋاندار وزىنەن ءبىرشاما تومەن جايعاسقان سپورتشىلارمەن شەبەرلىك بايقاسادى. بۇل مۇمكىندىكتى ءبىز قالت جىبەرمەۋگە ءتيىسپىز. قازىرگى كەزدە ازامات داۋلەتبەكوۆتىڭ عانا ەسەبى تۇگەل. ول رەيتينگتە ءبىرىنشى ورىندا تۇر. قالعاندارىنىڭ ۇپايى كەم. ماجارستاندا سول ولقىلىقتىڭ ورنىن تولتىرۋعا بارىنشا كۇش سالۋعا ءتيىسپىز, – دەيدى ەركىن كۇرەستەن مەملەكەتتىك جاتتىقتىرۋشى داستان قاناتقانوۆ.
ەستەرىڭىزگە سالا كەتەيىك, قازاقستان قۇراماسىنىڭ قورجىنىندا وليمپيادانىڭ جەتى جولداماسى بار. ونىڭ تورتەۋىن گرەك-ريم كۇرەسىنەن يەلەنسەك, ۇشەۋى ەركىن كۇرەس شەبەرلەرىنىڭ ەنشىسىندە. ال ايەلدەر كۇرەسىنىڭ وكىلدەرىنە بىردە-ءبىر ليتسەنزيا بۇيىرمادى.
