1977 جىلى گروزنىيدا دۇنيەگە كەلگەن ماگومەد اديەۆ ۇلتتىق قۇرامانىڭ تىزگىنىن 2022 جىلى ۇستادى. ونىڭ باسشىلىعىمەن 21 رەت جاسىل الاڭعا شىققان جەرلەستەرىمىز 11 ماتچتى ءوز پايداسىنا شەشتى. توعىز مارتە ۇتىلىپ, تاعى ءبىر ويىندا تەڭ ەسەپ تىركەلدى. ەڭ باستى تابىسىمىز – ۇلتتار ليگاسىنىڭ ۆ ديۆيزيونىنا جولداما الۋىمىز. بۇل تۋرنيردە ءبىزدىڭ فۋتبولشىلار ازەربايجان, سلوۆاكيا جانە بەلارۋس قۇرامالارىنان باسىم ءتۇستى.
اديەۆ جەتەكشىلك ەتكەن تۇستا فۋتبولشىلارىمىز جاقسى ونەر كورسەتكەنىن جوققا شىعارمايمىز. اسىرەسە 2024 جىلعى ەۋروپا چەمپيوناتىنىڭ ىرىكتەۋ تۋرنيرىندەگى ويىندارى وتە اسەرلى بولدى. سىرت الاڭدا سلوۆاكيا (1:0) مەن فينلياندياعا (2:1) سان سوقتىردىق. «استانا ارەنادا» داڭقتى دانيادان 0:2 ەسەبىمەن ۇتىلىپ جاتىپ, ۇزىلىستەن كەيىن قارسىلاستار قاقپاسىن قاتارىنان ءۇش مارتە ءدال كوزدەپ, سەنساتسيالىق ناتيجە تىركەدىك – 3:2. ماتچتىڭ 73 مينۋتىندا باحتيەر ءزاينۋتدينوۆتىڭ پەنالتيدەن, 86 جانە 89 مينۋتتاردا اسحات تاعىبەرگەن مەن ابات ايىمبەتوۆتىڭ سوققان عالامات گولدارى جايىندا جانكۇيەرلەر ءالى كۇنگە دەيىن تاڭدانا اڭگىمەلەپ ءجۇر. ەگەر سوڭعى كەزدەسۋدە سلوۆەنيانى ۇتقانىمىزدا, «ەۋرو-2024» جارىسىنىڭ جولداماسى قورجىندا ەدى. بىراق ونداي باق بىزگە بۇيىرمادى.
ىرىكتەۋ تۋرنير بارىسىندا 10 ويىننان كەيىن 18 ۇپاي جينادىق. بۇل – ءبىز ءۇشىن بۇرىن-سوڭدى بولماعان كورسەتكىش. ءوز توبىمىزدا ءتورتىنشى ورىن الىپ, پلەي-وففتا كۇش سىناسۋعا مۇمكىندىك الدىق. بىراق شەشۋشى باسەكەدە جولىمىز بولمادى. بۇل مەجەدە ازۋلى گرەكيا 5:0 ەسەبىمەن تاس-تالقانىمىزدى شىعاردى. دەسەك تە, قارت قۇرلىقتىڭ باستى دوپ دوداسىنا ءبىر تابان جاقىنداي ءتۇسۋىمىز بارشا كورەرمەنگە كەرەمەت ەموتسيالار سىيلادى. ەڭ باستىسى, حالىق قايتا فۋتبول كورە باستادى. وعان دالەل – ۇلتتىق كوماندامىز جاسىل الاڭعا شىققاندا «استانا ارەنادا» بوس ورىن تابىلمايتىن. فۋتبول ونەرى ەلىمىزدە قايتا تىرىلگەندەي بولىپ, بىزدە دە دوپ تەبە الاتىن جاقسى ويىنشىلاردىڭ بارىنا انىق كوز جەتكىزدىك.
وسىدان ءبىراز ۋاقىت بۇرىن ماگومەد مۇسا ۇلى قىزمەتىنەن كەتەتىنىن مالىمدەدى. ءوزىنىڭ وسى شەشىمىن وتباسىلىق جاعدايىمەن بايلانىستىردى. ونىڭ ۇستىنە اديەۆ بيىلعى جىلدىڭ ءساۋىر ايىندا گروزنىيدىڭ «احمات» كلۋبىنىڭ تىزگىنىن ۇستاپ ۇلگەردى. ەندى ونىڭ ورنىنا كەلگەن ستانيسلاۆ چەرچەسوۆ جايىندا نە بىلەمىز؟
ستانيسلاۆ سالام ۇلى 1963 جىلى الاگيردە تۋدى. سولتۇستىك وسەتيانىڭ تۋماسى 1982-2002 جىلدار ارالىعىندا ۆلاديكاۆكاز بەن ماسكەۋدىڭ «سپارتاك», «لوكوموتيۆ», درەزدەننىڭ «دينامو», اۋستريانىڭ «تيرول», كسرو, تمد جانە رەسەي قۇرامالارىنىڭ قاقپاشىسى بولدى. سپورتتىق مانسابىن اياقتاعاننان كەيىن اۋستريا, رەسەي, پولشا جانە ماجارستاننىڭ بىرقاتار كوماندالارىن جاتتىقتىردى. 2007 جىلى ماسكەۋدىڭ «سپارتاك» كلۋبىنىڭ رەسەي پرەمەر-ليگاسىندا كۇمىس مەدالدى ەنشىلەۋىنە سۇبەلى ۇلەس قوستى. 2016 جىلى «لەگيانى» پولشا چەمپيونى ەتىپ, ەل كۋبوگىن يەلەندى. سوڭعى جۇمىس ورنى – بۋداپەشتىڭ «فەرەنتسۆاروشى». وسى ۇجىممەن بىرگە چەرچەسوۆ ماجارستاننىڭ ەكى دۇركىن چەمپيونى اتانىپ, ءبىر رەت ەل كۋبوگىندە باس جۇلدەنى ولجالادى.
2016–2021 جىلدار ارالىعىندا ستانيسلاۆ چەرچەسوۆ رەسەيدىڭ ۇلتتىق قۇراماسىنىڭ باس باپكەرى بولدى. وسى قىزمەتتەگى ونىڭ تابىسى – 2018 جىلى ءوز ەلىندە وتكەن الەم چەمپيوناتىنىڭ شيرەك فينالىنا شىعۋى. توپتىق تۋرنيردە ولار ساۋد ارابياسى (5:0) مەن مىسىردى (3:1) ۇتىپ, ۋرۋگۆايعا (0:3) ەسە جىبەردى. پلەي-وففتىڭ 1/8 فينالىندا يسپانيامەن (1:1, 4:3) تەڭ ويناپ, پەنالتي سوعۋ بارىسىندا باسىم ءتۇستى. ودان كەيىن حورۆاتيامەن كۇش سىناستى. شيرەك فينالدىڭ دا تاعدىرى «سپورتتىق لوتەرەيا» ارقىلى شەشىلدى. نەگىزگى ۋاقىتتا جەڭىمپاز انىقتالمادى – 2:2. ال 11 مەترلىك نۇكتەدەن حورۆاتتار دالدىك تانىتتى – 4:3. 2020 جىلعى رەسەيلىكتەر «ەۋرو» دوداسىنىڭ ىرىكتەۋ تۋرنيرىندە سۇرىنگەننەن كەيىن چەرچەسوۆ ءوز ورنىن بوساتتى.
شىنى كەرەك, جەرگىلىكتى ماماندار مەن جانكۇيەرلەردىڭ دەنى ستانيسلاۆ چەرچەسوۆتىڭ قازاقستانعا كەلۋىن قالامادى. بىراق ولاردىڭ پىكىرىنە ەشكىم قۇلاق اسپادى. كفف باسشىلارى 60 جاستاعى باپكەردى وزدەرى اتتاي قالاپ الدى. كەيبىر دەرەك كوزدەرىنە سەنسەك, اتالعان ازامات كەلسىمشارت بويىنشا جىلىنا 1,2 ميلليون ەۋرو مولشەرىندە جالاقى الادى. ءبىز ءۇشىن ەڭ ماڭىزدىسى – قازاقستان فۋتبولىنىڭ كوسەگەسى كوگەرگەنى, ويىنشىلاردىڭ دەڭگەيىنىڭ وسكەنى, ۇلتتىق كوماندامىزدىڭ الەم جانە ەۋروپا چەمپيوناتتارىنا جولداما العانى. وسىنداي اسا جاۋاپتى مىندەتتى اتقارۋ ستانيسلاۆ سالام ۇلىنا جۇكتەلىپ وتىر. جاڭادان تاعايىندالعان باس باپكەرگە ءبىز الداعى ءدۇبىرلى دودالاردا ساتتىلىك تىلەيمىز.
