«العاش رەت 2019 جىلى ورىنبور وبلىستىق مەملەكەتتىك ارحيۆىنە بارىپ, 1742 جىلى ورىنبور گەنەرال-گۋبەرناتورى نەپليۋەۆتىڭ قۇپيا كەڭەسشىسى جازعان حاتتارىن تاپتىق. مۇندا ابىلقايىر حاننىڭ ەسىمى اتالعان. ور قالاسىن سالۋ جونىندە اڭگىمە بولادى. قۇجات ەسكى كەڭسە تىلىندە جازىلعاندىقتان, وقۋ قيىن. كوشىرمەلەرىن ءتۇسىرىپ, عىلىمي اينالىمعا جىبەردىك. وسى جەردەگى قازاق تاريحىنا قاتىستى, اسىرەسە كىشى ءجۇزدىڭ سۇلتاندارى تۋرالى سوڭعى قۇجات 1918 جىلى تىركەلگەن», دەيدى اقتوبە وبلىستىق مەملەكەتتىك مۇراعاتى ديرەكتورىنىڭ ورىنباسارى سۆەتلانا كنيجنيك.
2022 جىلى باشقۇرتستان رەسپۋبليكاسى ۇلتتىق مەملەكەتتىك ارحيۆىنەن ىبىراي ءالتىنساريننىڭ اقتوبەدەگى ەكى باسقىشتىق ۋچيليششە جانىنان قولونەر, تەرى وڭدەۋدى ۇيرەتەتىن بولىمشە اشۋ تۋرالى ورىنبور وقۋ وكرۋگى قورعانشىلىق كەڭەسىنە جازعان حاتتارى تابىلدى. تاعى ءبىر ماڭىزدى قۇجات – ۋفاداعى «عاليا» مەدرەسەسى شاكىرتتەرىنىڭ تاڭعى جاتتىعۋ كەزى, ۇستازدارىنىڭ توپ بولىپ تۇسكەن فوتوسۋرەتتەرى. ەڭ قۇندىسى «عاليادا وقىپ جاتقان ءبىر توپ قازاق شاكىرتتەرىنىڭ 1916 جىلى تۇسىرىلگەن فوتوسۋرەتى دەپ ايتۋعا بولادى. وتە ءساندى كيىنىپ, باستارىنا تاقيا كيگەن ون التى شاكىرت ەكى قاتار بولىپ تۇسكەن. ءبىرىنشى قاتاردا سول جاق شەتتە وتىرعان جازۋشى جيەنعالي تىلەپبەرگەنوۆ. ول «عاليادا» وقىپ جۇرگەندە, ستۋدەنت جاستاردىڭ «ساداق» قولجازبا جۋرنالىن شىعارعان. فوتوسۋرەت استىنداعى تۇسىنىكتەمە كەيىن جازىلعان. ءبىر نازار اۋدارارلىعى, تومەنگى قاتاردا التىنشى بولىپ وتىرعان جىگىتتى «مۇستافا شوقاي» دەپ كورسەتكەن. انىقتاپ قاراعاندا, ول شوقايعا ۇقسامايدى. جالپى, بۇل سۋرەتتەگى ازاماتتاردى كىم بىلەدى ەكەن؟ بالكىم توڭكەرىس الدىندا وقىعان مۇعالىمدەردىڭ ۇرپاقتارى تانىپ قالار. جيەنعالي تىلەپبەرگەنوۆتىڭ جانىندا وتىرعان جىگىت كەيىن لەنين وردەنىن يەلەنگەن, قازاق كسر-ءنىڭ ەڭبەك سىڭىرگەن مۇعالىمى زەينەلعابيدەن يمانجانوۆ دەپ جازىلعان. قاسىنداعىلار –ۇستاز حامزا يبراگيموۆ, حاقان ەرەجەپوۆ دەپ كورسەتىلگەن.
فوتوسۋرەتتەگى ون التى جىگىتتىڭ تاعدىرى كەيىن قالاي ءورىلدى ەكەن؟
اقتوبە وبلىسى
